سەميناردىڭ ماقساتى – ارحەولوگيالىق زەرتتەۋلەر ناتيجەسىندە تابىلعان مەتالل بۇيىمداردى كونسەرۆاتسيالىق وڭدەۋ جۇمىسى بارىسىن تالقىلاۋ, سونداي-اق وسى سالادا حالىقارالىق دەڭگەيدە تاجىريبە مەن ءبىلىم الماسۋ.
شارا بارىسىندا قاتىسۋشىلار كونسەرۆاتسيالىق وڭدەۋ جانە قالپىنا كەلتىرۋ جۇمىستارىنىڭ ەرەكشەلىكتەرىن زەرتتەۋگە, سونىمەن قاتار وسى سالا بويىنشا مامانداردى تاربيەلەۋگە ارنالعان «ارحەولوگيالىق مەتالدى كونسەرۆاتسيالىق وڭدەۋ» ادىستەمەلىك قۇرالىن باستى تالقىعا سالدى.
بۇل ەڭبەكتى كونسەرۆاتسيالىق وڭدەۋ جانە قالپىنا كەلتىرۋ بويىنشا مامانداردىڭ تاعىلىمداما باعدارلاماسىنان ءوتۋى كەزىندە قولدانۋ ماقساتىندا نارا قالاسىنداعى مادەني مۇرانى عىلىمي-زەرتتەۋ ينستيتۋتى جانىنداعى مادەني مۇرانى ساقتاۋ جونىندەگى حالىقارالىق ىنتىماقتاستىق ورتالىعى قۇراستىرعان.
اتالعان جۇمىستا قازىرگى جاپونيادا كونسەرۆاتسيالىق وڭدەۋ كەزىندە ءجيى قولدانىلاتىن كونسەرۆاتسيالىق وڭدەۋ جانە قالپىنا كەلتىرۋ ادىستەرى بويىنشا ەڭ ءتيىمدى تەتىكتەر كورسەتىلگەن. سوندىقتان بۇل ادىستەمەلىك نۇسقاۋلىق بەلگىلى ءبىر ءادىس بويىنشا انىقتاما كىتاپشاسى تۇرىندە ەمەس, نەگىزگى جانە باستاپقى ءبىلىم الۋ ءۇشىن قوسىمشا حرەستوماتيا رەتىندە شىعارىلعان. ويتكەنى ءارتۇرلى تەحنيكالاردى ۇيرەنۋ ارقىلى جۇمىستا ەڭ قولايلى ءادىس-تاسىلدەردى قولدانۋعا بولادى. ياعني كەز كەلگەن تەحنيكانىڭ قولدانۋ ءۇردىسىن زەرتتەۋ جانە ونى ءتۇسىنۋ ارقىلى وزگە دە ەلدەردىڭ وسى سالادا كەزىككەن ماسەلەلەرىن شەشۋگە مۇمكىندىك تۋىندايدى.
سونداي-اق ونلاين-سەميناردا «ارحەولوگيالىق مەتالدى كونسەرۆاتسيالىق وڭدەۋ» تاقىرىبىندا ەركىن پىكىرتالاس الاڭى ۇيىمداستىرىلىپ, سالا ماماندارى وزەكتى ماسەلەلەردى تالقىلاپ, وڭىرلىك جانە حالىقارالىق دەڭگەيدە كونسەرۆاتسيالىق وڭدەۋ جانە قالپىنا كەلتىرۋ جۇمىستارىن دامىتۋدا قولدانعان تىڭ يدەيالارىمەن ءبولىستى.
سەمينارعا بەلگىلى قازاقستاندىق جانە جاپوندىق رەستاۆراتورلار مەن ارحەولوگ-عالىمدار قاتىستى.
جيىن قورتىندىسىندا قاتىسۋشىلار قۇرامى الداعى جىلى دا ءدال وسى تاقىرىپ توڭىرەگىندە كەزدەسۋ ۇيىمداستىرۋعا ۋادەلەسىپ تارقاستى.
