وبلىستىڭ جاس پاتريوتتارىن قۇرمەتتەۋ ءراسىمى تۇركىستان قالاسىنداعى وبلىستىق جاستار رەسۋرستىق ورتالىعىندا ءوتتى. ءىس-شاراعا تۇركىستان وبلىسى اكىمدىگىنىڭ, وبلىستىق قورعانىس ىستەرى جونىندەگى دەپارتامەنتىنىڭ, قازاقستان رەسپۋبليكاسى قارۋلى كۇشتەرى ارداگەرلەرىنىڭ وڭىرلىك كەڭەسىنىڭ وكىلدەرى جانە جاتتىقتىرۋشى-وقىتۋشىلار قاتىستى.
ء«دال وسىنداي جارىستار ارقىلى ءبىز جاستاردىڭ ازاماتتىق بورىشىن جانە وتاندى قورعاۋ بويىنشا كونستيتۋتسيالىق مىندەتتەرىن ورىنداۋعا دايىندىعى مەن پراكتيكالىق قابىلەتتەرىن قالىپتاستىرامىز. قازىر ءبىزدىڭ الدىمىزدا ارىس قالاسىنىڭ ءارتۇرلى مەكتەپتەرىنىڭ وقۋشىلارى عانا ەمەس, كوپتى بىلەتىن جانە كوپ نارسەنى ۇيرەنگەن ۇيىمشىل ۇجىم تۇر. بۇل ولاردىڭ جانىندا ۇنەمى بولعان جانە بارلىق باستامالارىندا قولداۋ كورسەتكەن جاتتىقتىرۋشى-وقىتۋشىلارىنىڭ ەڭبەگى. وسى جەڭىسپەن بارلىق قاتىسۋشىلاردى شىن جۇرەكتەن قۇتتىقتايمىن!» دەدى وبلىستىق قورعانىس ىستەرى جونىندەگى دەپارتامەنت باستىعىنىڭ ورىنباسارى, مايور جاندوس كۇلدەرباەۆ.
كۋبوكتار, مەدالدار, ديپلومدار جانە باعالى سىيلىقتارمەن ماراپاتتالعان جاس پاتريوتتار, كورسەتكەن قولداۋى مەن قامقورلىعى ءۇشىن العىستارىن ءبىلدىردى.
«الدا ءالى تالاي شىڭداردى باعىندىرۋىمىز كەرەك. بۇل رەتتە ءبىز وتكەن جيىندا كورسەتكەن ناتيجە بويىنشا دەڭگەيدى ۇنەمى ۇستاپ تۇرۋعا ءتيىسپىز. ءبىز تەحنولوگيانىڭ قارقىندى دامىپ كەلە جاتقان عاسىرىندا ءومىر ءسۇرىپ جاتىرمىز. ءبىز ءوز ءپاتريوتيزمىمىزدى ءىس جۇزىندە دالەلدەي وتىرىپ, ەلگە پايدا اكەلۋ ءۇشىن بارلىق جاڭالىقتاردى يگەرە ۇلگەرۋىمىز كەرەك», دەدى «ۇزدىك جاس سارباز» نوميناتسياسىنىڭ جەڭىمپازى ابدىبەك قۋانىش.
ايتا كەتسەك, بيىل «ايبىن» اسكەري-پاتريوتتىق جاستار جيىنى العاش رەت ونلاين رەجيمدە ءوتتى. وعان بۇكىل قازاقستاننان 39 كوماندا قاتىستى. ولار اسكەري-قولدانبالى سپورت تۇرلەرى بويىنشا, زياتكەرلىك جانە شىعارماشىلىق كونكۋرستاردا ءوزارا سايىستى.
