بۇگىن تاڭدا تاراز قالاسىندا 18 887 ادام ءۇي كەزەگىندە تۇر. جىل سوڭىنا دەيىن 765 تۇرمىسى تومەن جانە كوپبالالى وتباسى پاتەرمەن قامتاماسىز ەتىلەدى.
اعىمداعى جىلى تاراز قالاسىندا "نۇرلى جەر" باعدارلاماسى بويىنشا 15-ءشى شاعىناۋداندا 3025 پاتەردى قۇرايتىن 54 كوپقاباتتى تۇرعىن ءۇيدىڭ قۇرىلىسى باستالعان بولاتىن. جوسپار بويىنشا اتالعان ۇيلەردىڭ 47-ءسى جىل سوڭىنا دەيىن تولىق پايدالانۋعا بەرىلىپ ءبىتۋى قاجەت. قالعان 7 ءۇيدىڭ قۇرىلىسى 2021 جىلعا وتپەلى. بۇل تۋرالى تاراز قالاسىنىڭ اكىمى ايتقازى قارابالاەۆ حابارلادى.
"الداعى ۋاقىتتا 15-ءشى شاعىناۋدانداعى قۇرىلىس جۇمىستارى تولىقتاي اياقتالاتىن بولسا, وندا 8 مىڭ 500 وتباسىنا ارنالعان 190 كوپقاباتتى ءۇي پايدا بولادى. قازىرگى تاڭدا وندا 35 تۇرعىن ءۇيدىڭ قۇرىلىسى اياقتالعان. سونىمەن قاتار, 2019 جىلدان وتپەلى 16 تۇرعىن ءۇيدىڭ قۇرىلىسى جالعاسۋدا. بۇدان بولەك, 10 ارەندالىق جانە 9 كرەديتتىك تۇرعىن ۇيلەردىڭ قۇرىلىسى ءجۇرىپ جاتىر"，دەدى شاھار باسشىسى.
سونداي-اق, اتالعان مەملەكەتتىك باعدارلاما اياسىندا, الداعى ۋاقىتتا قالاداعى "اۆتوبەكەت" اۋماعىنداعى 100 گەكتاردا 14-ءشى شاعىناۋدانى بوي كوتەرمەك. وندا 5 331 وتباسىنا ارنالعان 5 قاباتتى 33 ءۇي, 9 قاباتتى 27 ءۇي جانە 12 قاباتتى 5 تۇرعىن ءۇي سالۋ جوسپارلانىپ وتىر. قازىرگى تاڭدا اتالعان القاپ گاز جانە بايلانىس جەلىلەرىمەن قامتاماسىز ەتىلسە, جىلۋمەن قامتۋ جۇمىستارى اعىمداعى جىلى اياقتالاتىن بولادى.
جالپى مۇنداعى ينجەنەرلىك ينفراقۇرىلىمداردىڭ قۇرىلىس جۇمىستارىن كەلەر جىلى تولىعىمەن اياقتاۋ جوسپارلانۋدا.
