جاڭا كىتاپتىڭ تانىستىرىلىمى جۇبان مولداعاليەۆ اتىنداعى باتىس قازاقستان وبلىستىق عىلىمي امبەباپ كىتاپحاناسىندا ءوتتى. تۇساۋكەسەرگە ايتقالي نارىكوۆ, اقۇشتاپ باقتىگەرەەۆا سىندى تانىمال قالامگەرلەر, ءوڭىر باسشىلارى قاتىستى.
– كىتاپ جازۋ – ۇلكەن ەڭبەك. شىعارماشىلىق ونەرىڭىزگە ءابدىجامىل نۇرپەيىسوۆ, دۋلات يسابەكوۆ, اقۇشتاپ باقتىگەرەەۆالار جوعارى باعا بەردى. كىتاپ جازۋ ءابدىجامىل اعامىزدىڭ شىعارماسىنىڭ اتاۋىمەن ايتساق «قانمەن, تەرمەن» جازىلاتىن ەڭبەك. بۇگىنگى كەشكە وسى جاعدايدى تۇسىنەتىن, ءسىزدىڭ شىعارماشىلىعىڭىزدى جاقسى كورەتىن جاندار جينالىپ وتىر. ولاردىڭ قاتارىندا ءبىز دە بارمىز. سىزگە شىعارماشىلىق تابىس تىلەيمىز, – دەدى باتىس قازاقستان وبلىسى اكىمىنىڭ ورىنباسارى سەرىك ەگىزباەۆ.
العاش رەت 2014 جىلى «جازۋشى» باسپاسىنان جارىق كورگەن «وكىنىش» شىعارماسىن بەلگىلى سىنشى, ادەبيەت زەرتتەۋشىسى باقىت ساربالا ۇلى «بۇگىنگى كۇننىڭ بايسالدى پروزاسى» دەپ باعالاعان بولاتىن. «جۇلدىز» جۋرنالىندا جاريالانعان «ميرانىڭ ماحابباتى» اتتى كولەمدى ماقالاسىندا سىنشى «وكىنىشتى» رومان دەپ اتاپ, «قازىرگى ادەبيەتىمىزدىڭ ادەمى دە الەۋەتتى ۇلگىلەرىنە جاتادى دەسەك تە جاراسادى ەكەن» دەگەن ەدى. قازاقستان رەسپۋبليكاسى مادەنيەت جانە سپورت مينيسترلىگىنىڭ ءتىل ساياساتى كوميتەتى «مادەنيەت جانە ونەر سالاسىنداعى باسكەلەستىكتى جوعارىلاتۋ, قازاقستاندىق مادەني مۇرانى ساقتاۋ, زەردەلەۋ مەن ناسيحاتتاۋ جانە مۇراعات ءىسىنىڭ جۇزەگە اسىرىلۋ تيىمدىلىگىن ارتتىرۋ» باعدارلاماسى اياسىندا «ادەبيەتتىڭ الەۋمەتتىك ماڭىزدى تۇرلەرىن ساتىپ الۋ, باسىپ شىعارۋ جانە تاراتۋ» كىشى باعدارلاماسى بويىنشا 3 مىڭ تيراجبەن شىققان بۇل كىتاپ ەندى قازاقستاننىڭ بارلىق وڭىرىندەگى كىتاپحانالارعا تەگىن تاراتىلماق.
– رەسپۋبليكا كولەمىندە, جالپى ادەبيەتتە قازاق قىزدارى كوپ ەمەس قوي, بىلەسىزدەر. پروزا جازۋ, كىتاپ جازۋ – وڭاي شارۋا ەمەس. ميرا ادامدار تاعدىرىن, قازاق قىزىنىڭ, ايەلىنىڭ باسىنان وتەتىن سەزىمىن قوزعاپ جۇرگەن قالامگەر, – دەگەن اقۇشتاپ باقتىگەرەيقىزى جازۋشىنىڭ ءوز تاعدىرى دا وڭاي بولماعانىن, جارىنان ەرتە ايرىلىپ, جالعىز قىزىن قاتارعا قوسقان ەرلىگىنە ەرەكشە توقتالىپ ءوتتى.
ءيا, ميرا حامزاقىزى ادەبيەت پەن جۋرناليستيكا سالاسىن قاتار الىپ جۇرگەن قالامگەر. ورال قالاسىنىڭ اكىمى ابات شىنىبەكوۆ قالالىق «جايىق ءۇنى» گازەتىن ءبىراز جىلدان بەرى باسقارىپ كەلە جاتقان جازۋشىعا العىس حات تابىس ەتىپ, جاستارعا وي سالاتىن, رۋحاني كەمەلدەنۋىنە ۇلەس قوساتىن كىتاپ ءۇشىن ريزاشىلىعىن ءبىلدىردى.
جاڭا كىتاپتىڭ تۇساۋكەسەرىندە اقىن, قازاقستان جازۋشىلار وداعى باتىس قازاقستان وبلىستىق فيليالىنىڭ توراعاسى باۋىرجان حاليوللا, پەداگوگيكا عىلىمدارىنىڭ دوكتورى, پروفەسسور شالقىما قۇرمانالينا, ماحامبەت اتىنداعى باتىس قازاقستان ۋنيۆەرسيتەتىنىڭ دوتسەنتى, فيلوسوفيا دوكتورى ايداربەك اقبولاتوۆ جانە باسقالارى قالامگەردىڭ شىعارماشىلىعى حاقىندا ءوز پىكىرلەرىن ايتتى. بەلگىلى ونەر قايراتكەرلەرى نۇرجان سەرتەكوۆ, مۇرات امانشيەۆ, مايرا حايداروۆا, حورلان شامەلوۆا مەن نۇرجيان حاسانوۆالار ءان مەن كۇيدەن شاشۋ شاشىپ, جازۋشىنىڭ شىعارمالارىنان مونولوگ وقىدى.
كەش سوڭىندا اۆتور ميرا شۇيىنشاليەۆا وقىرماندارىنا العىسىن ايتىپ, شىعارماشىلىق جولىندا كومەكتەسكەن, اق جول تىلەگەن اعا-اپالارىنا ريزاشىلىعىن ءبىلدىردى.
