زەرتتەۋ كەلەسى پارامەترلەر بويىنشا جۇرگىزىلگەن:
- قازاقستانداعى بولشەك ەلەكتروندى ساۋدا نارىعىنىڭ كولەمى
- قازاقستانداعى بولشەك ەلەكتروندى ساۋدانىڭ ءوسۋ قارقىنى
- 2019 جانە 2020 جىلدارىنداعى العاشقى 9 ايداعى بولشەك ەلەكتروندى ساۋدانىڭ ورتاشا چەگى جانە ورتاشا چەكتىڭ وزگەرۋى
بۇل رەتتە زەرتتەۋ جۇرگىزۋشىلەر تەك جەكە تۇلعالاردىڭ ونلاين ساتىلىم تاۋارلارىن جەتكىزىپ بەرۋ نەمەسە دۇكەننەن وزدەرى الىپ كەتۋىمەن بايلانىستى كاسىپكەرلىك ءتۇرىن نەگىزگە العان.
نەگىزگى تسيفرلار:
- بولشەك ەلەكتروندى ساۋدا نارىعىندا – تەڭگەمەن جاسالعان ساۋدا 93 پايىزعا ارتقان;
- لوكداۋن كەزىندە – دوللارمەن تولەنگەن ورتاشا چەك 4 پايىزعا ازايعان;
- لوكداۋن كەزىندە – ونلاين ساتىپ الۋ (ترانزاكتسيا) 16 پايىزعا ارتقان;
- لوكداۋننان كەيىن – تەڭگەمەن جاسالعان ساۋدا سوماسى 65 پايىزدى قۇراعان.
ەلەكتروندى بولشەك ساۋدا نارىعى
ەلەكتروندى بولشەك ساۋدا نارىعى 2019 جىلمەن سالىستىرعاندا 2020 جىلدىڭ العاشقى 9 ايىندا 93 پايىزعا وسكەن: 198 ملرد تەڭگەدەن 382 ملرد تەڭگەگە.
«سونداي-اق ترانزاكتسيا (ونلاين تاپسىرىس) سانى دا ءوستى جانە تەڭگەمەن ورتاشا شەك 18 جانە 63 پايىزدى قۇرادى. دوللارمەن ەسەپتەسكەن نارىق كولەمى دە ءوسىم كورسەتتى, الايدا تەڭگەگە قاراعاندا از: ساتىلىم سوماسىندا – 79, ال ورتاشا چەكتە 52 پايىزدى قۇرايدى. 2019 جىلدىڭ I توقسانىمەن سالىستىرعاندا 2020 جىلدىڭ I توقسانىندا تەڭگەمەن ساتىلىم 47 پايىزعا, دوللارمەن 42 پايىزعا وسكەن. بىراق ترانزاكتسيا سانى 9 پايىزعا ازايدى» دەپ جازىلعان زەرتتەۋدە.
ەكسپەرتتەردىڭ باعامداۋىنشا, پاندەميا كەزىندە ساتۋشى دا, ساتىپ الۋشى دا مول تاجىريبە جينادى. نارىق وكىلدەرى جاڭا ويىنشىلاردىڭ كەلۋىمەن, كومپانيالاردىڭ قامتۋ ايماعى مەن اسسورتيمەنتىنىڭ كەڭەيۋىنەن ەلەكتروندى ساۋدا 2021 جىلى دا ودان ءارى دامي تۇسەدى دەپ سانايدى.
«شەكتەۋلەرگە بايلانىستى بيىل ونلاين ساۋدا قارقىندى دامىدى. كاسىپكەر مەن كليەنتتىڭ اراسىن تەك سايت عانا جالعاپ تۇردى. سول سەبەپتى, كوپتەگەن كومپانيا ونلاين ساۋداعا دەن قويدى. ناتيجەسىندە, ءبىر جىلدىق دامۋ جوسپارى 1-2 ايدا ورىندالدى» دەپ جازادى Mechta.kz.
لوكداۋن كەزىندەگى بولشەك ەلەكتروندى ساۋدا (1ت 2020/2ت 2020)
Kaspi.kz پاندەميا كليەنت مىنەز-قۇلقىنىڭ وزگەرۋ پروتسەسىن جانە ونلاين-ساتىلىمنىڭ جاڭا سەگمەنتتەرگە ەنۋىن جىلدامداتتى دەپ ەسەپتەيدى. سونىڭ ناتيجەسىندە:
- 50 جاستان اسقان ساتىپ الۋشىلار ۇلەسى ارتقان;
- ادامدار تاماق پەن تۇرمىستىق زاتتاردى ونلاين ساتىپ الا باستاعان;
- شالعاي قالالار مەن اۋىلداردا دا بۇل ۇردىسكە بەلسەندى قوسىلعان.
2020 جىلدىڭ I توقسانىمەن سالىستىرعاندا II توقساندا تەڭگەمەن ساۋدا جاساۋ 34 پايىزعا وسكەن. I توقسانىمەن سالىستىرعاندا II توقساندا دوللارمەن ساۋدا جاساۋ 4 پايىزعا كەمىپ كەتكەن.
سەكتورداعى تۇتىنۋشىلار سانى كارانتين كەزىندە كۇرت وسكەن. الايدا ورتاشا چەك سوماسى تومەندەپ كەتكەن.
لوكداۋن كەزىندەگى بولشەك ەلەكتروندى ساۋدا (2ت 2020/2ت 2019)
2019 جىلدىڭ II توقسانىمەن سالىستىرعاندا 2020 جىلدىڭ II توقسانىندا تەڭگەمەن ساۋدا جاساۋ 59 پايىزعا ءبىر-اق كوبەيگەن. دوللارمەن ساۋدا جاساۋ 45 پايىزعا, ال ترانزاكتسيا سانى 16 پايىزعا كوبەيگەن.
«2019 جىلدىڭ II توقسانىندا ەلەكتروندى ساۋدا نارىعىنداعى جالپى ساتىلىم 113 ملرد تەڭگە بولسا, وسى كورسەتكىش بيىل II توقساندا 59 پايىزعا ارتقان. وسىعان دەيىن ەلەكتروندى ساۋداعا ءوتۋدى قاراستىرماعان شاعىن جانە ورتا بيزنەس وكىلدەرى پاندەميا قىسپاعىنا تاپ بولىپ, كليەنتتەرىنەن ايىرىلدى. ەسەسىنە e-commerce سەكتورىنىڭ ماڭىزدى ويىنشىلارى ءوز پوزيتسيالارىن نىعايتا ءتۇستى. ناتيجەسىندە, ترانزاكتسيا 16 پايىزعا ءوسىم كورسەتتى. تەڭگەمەن جاسالعان ورتاشا چەك 37 پايىزدى قۇراپ وتىر. رەسپوندەنتتەر پاندەميا ەلەكتروندى ساۋدا نارىعىنا جاڭا ءۇردىس اكەلىپ عانا قويعان جوق, 2019 جىلى باستاۋ العان ترەندتەردى كۇشەيتىپ جىبەردى دەپ ەسەپتەيدى» دەپ جازىلعان زەرتتەۋدە.
لوكداۋننان كەيىنگى بولشەك ەلەكتروندى ساۋدا نارىعى
III توقسانداعى لوكداۋننان كەيىنگى كەزەڭدە تەڭگە جانە دوللارمەن جاسالعان ساۋدا كولەمى 65 پايىزعا ارتقان. III توقسانداعى ەلەكتروندى ساۋدا نارىعى 186 ملرد تەڭگەنى قۇرادى. II توقسانمەن سالىستىرعاندا III توقساندا تەڭگەمەن جاسالعان ساۋدا 65, دوللارمەن ساۋدا 64 پايىزعا ءوستى. ترانزاكتسيا 28 پايىزعا ارتتى. سونداي-اق 3 توقساندا تەڭگە جانە دوللارمەن جاسالعان ساۋدانىڭ ورتاشا چەگى ءبىر-بىرىمەن تەڭەسكەن – 28 پايىز.
«III توقساندا تج رەجيمى توقتاپ, ادامداردىڭ وفلاين دۇكەندەرگە بارۋ مۇمكىندىگى تۋىنداعانىنا قاراماستان تەڭگە جانە دوللار ەكۆيۆالەنتىندە ترانزاكتسيالار مەن ورتاشا چەك وسە تۇسكەن. ترانزاكتسيا سانى II توقساندا – 5,5 ملرد تەڭگە بولسا, III توقساندا 7,1 ملرد تەڭگەگە جەتكەن. ورتاشا چەك 26 مىڭ تەڭگەگە, شەتەل ۆاليۋتاسىمەن 62 دوللارعا دەيىن جەتكەن» دەلىنگەن زەرتتەۋ ماتىنىندە.
بۇل ورايدا ساراپشىلار ء«بىر جاعىنان بۇل تەندەنتسيا تۇرعىنداردىڭ تالاپتاردى ساقتاپ, ادامدار كوپ شوعىرلانعان ورىندارعا بارماۋى سەبەپتى بولسا, ەكىنشى جاعىنان ەلەكتروندى ساۋدا نارىعى قىزمەتتەر مەن تاۋارلار سپەكترىن جەدەل كەڭەيتىپ, سەرۆيس ساپاسىن جاقسارتقاندىقتان ونلاين ساۋدا ءوز قۇنىن جويمادى» دەپ سانايدى.
دەسە دە ەكسپەرتتە قازاقستاندا ەلەكتروندى ساۋدا ءالى وتە تومەن دەڭگەيدە, دەگەنمەن ونلاين ساۋدانىڭ ءوسۋ پوتەنتسيالى وتە جوعارى دەيدى. ولار بيىلعى كورسەتكىشتەردىڭ كەلەر جىلى اسا جوعارى قارقىنمەن ءوسىپ كەتەرىنە سەنبەيدى. دەگەنمەن جىل ساناپ ونلاين ساۋدا اياسىنىڭ كەڭەيە تۇسەرىنە كۇمان كەلتىرمەيدى.
الماتى
