ششۋچينسك قالاسىنىڭ 46 جاستاعى تۇرعىنى ينتەرنەت جەلىسىندەگى بەلگىلى ءبىر جارنامالىق سايتتا اۋديو-بەينە قۇرىلعىسى بار اۆتوقالام-تەلەفون ساتىلاتىنى تۋرالى حابارلاما ورنالاستىرعان. ونى «Hi-Tech» جەدەل-الدىن الۋ ءىس-شاراسى نەگىزىندە بۋراباي اۋدانىنىڭ پوليتسيا ءبولىمىنىڭ كريمينالدىق پوليتسيا بولىمشەسىنىڭ قىزمەتكەرلەرى ينتەرنەت جەلىسىنە مونيتورينگ جۇرگىزۋ بارىسىندا انىقتادى.
مۇنداي قۇرىلعىلار اقپاراتتى جاسىرىن تۇردە اۋديوعا جازۋ نەمەسە بەينەكامەراعا ءتۇسىرىپ الۋ ءۇشىن پايدالانىلادى. وسى ورايدا, مۇنىمەن اينالىساتىندار قازاقستان رەسپۋبليكاسى قىلمىستىق كودەكسىنىڭ 399-بابىنداعى «اقپاراتتى جاسىرىن الۋدىڭ ارنايى تەحنيكالىق قۇرالدارىن زاڭسىز دايىنداۋ, ءوندىرۋ, ساتىپ الۋ, وتكىزۋ نەمەسە پايدالانۋ» بولىگىندە كورسەتىلگەنىندەي, جاۋاپقا تارتىلادى.
بۇل فاكتى سوتقا دەيىنگى تەرگەۋدىڭ بىرىڭعاي تىزىلىمىنە ەنگىزىلىپ, قازىرگى ۋاقىتتا قۇرالدى تەكسەرۋ ءۇشىن ساراپتاما تاعايىندالعان. تەرگەۋ امالدارى جالعاسۋدا.
اعىمداعى جىلدىڭ 27-28 قازان ارالىعىندا وبلىس اۋماعىندا «Hi-Tech» جەدەل-الدىن الۋ ءىس-شاراسى وتكىزىلدى. جەدەل-الدىن الۋ ءىس-شاراسىنىڭ نەگىزگى ماقساتى كيبەرقىلمىستاردى انىقتاۋ, جولىن كەسۋ جانە اشۋ, ينتەرنەت جەلىسى ارقىلى بۇرىن جاسالعان ۇرلىقتار مەن الاياقتىقتاردى اشۋ بولىپ تابىلادى.
اقمولا وبلىسى
