بۇگىندە وبلىس ورتالىعىنىڭ اۋماعى بويىنشا 6 جانە ستەپنوگورسك قالاسىنىڭ ماڭىندا 3 سانيتارلىق بەكەت جۇمىس ىستەۋدە. وندا كارانتين تالاپتارىنىڭ ساقتالۋىن قاداعالاۋ شارالارىنا 66 پوليتسيا قىزمەتكەرى جۇمىلدىرىلعان. بريفينگتە اسەت بايتەلەنوۆ سانيتارلىق بەكەتتەردە تۇرعان پوليتسيا قىزمەتكەرلەرى ەلەكتروندىق پلانشەتتەرمەن قامتاماسىز ەتىلگەنىن جانە قالالارعا كىرىپ-شىعاتىن كولىكتەر ارنايى ەلەكتروندى بازا ارقىلى تەكسەرىلىپ وتىراتىنىن ايتتى.
وسىنداي تەكسەرىستەردىڭ ناتيجەسىندە 130 اكىمشىلىك قۇقىق بۇزۋشىلىق انىقتالعان. سانيتارلىق بەكەتتەردەن ءوتۋ كەزىندە سانيتارلىق تالاپتاردى بۇزعانى ءۇشىن 25 جۇرگىزۋشى جاۋاپكەرشىلىككە تارتىلعان. سونداي-اق, جۇرگىزۋشى كۋالىگىنەن ايىرىلسا دا, سانيتارلىق بەكەتتەردەن وتپەك بولعان جۇرگىزۋشىلەر دە كەزدەسكەن. كوكشەتاۋ قالاسىنىڭ ماڭىنداعى سانيتارلىق بەكەتتە پوليتسيا قىزمەتكەرلەرى سونداي 12 جۇرگىزۋشىنىڭ جولىن كەسكەن. ماس كۇيىندە كولىك جۇرگىزگەن ەكى جۇرگىزۋشى, قاۋىپسىزدىك بەلدىگىن تاقپاعان 24 جۇرگىزۋشى جاۋاپقا تارتىلعان. 20 اۆتوكولىك مامانداندىرىلعان ايىپپۇل تۇراعىنا قويىلعان.
ءوز سوزىندە بايانداماشى ۇستىمىزدەگى ايدا نۇر-سۇلتان – پەتروپاۆل تاس جولىندا ورنالاسقان №1 سانيتارلىق بەكەتتە جەرگىلىكتى پوليتسيا باسقارماسى مەن كولىك باقىلاۋ ينسپەكتسياسى بىرلەسىپ, جولاۋشىلاردى زاڭسىز تاسىمالداعان تاكسي جۇرگىزۋشىسىن ۇستاپ, اكىمشىلىك حاتتاما تولتىرعانىن, كارانتين ايماعىنا وتۋگە رۇقساتى جوق كولىكتەردى كىرگىزبەۋ جانە شىعارماۋ ماقساتىندا ءتيىستى جۇمىستار جۇرگىزىلىپ جاتقانىن ايتتى.
اقمولا وبلىسى
