بەرليندە قازاقستان مەن گەرمانيا اراسىندا ەكىجاقتى ساياسي ديالوگ پەن ساۋدا-ينۆەستيتسيالىق ىنتىماقتاستىق ماسەلەلەرىنە ارنالعان سىرتقى ىستەر مينيسترلىكتەرىنىڭ ساياسي كونسۋلتاتسيالارى ءوتتى.
قازاقستان سىرتقى ىستەر ءمينيسترىنىڭ ورىنباسارى مارعۇلان بايمۇحان جانە گەرمانيا سىرتقى ىستەر مينيسترلىگىنىڭ شىعىس ەۋروپا, وڭتۇستىك كاۆكاز جانە ورتالىق ازيا مەملەكەتتەرىمەن ىنتىماقتاستىق جونىندەگى ۋاكىلى ميحاەل زيبەرت جەتەكشىلىك ەتكەن كەلىسسوزدەر بارىسىندا جىل ىشىندەگى بىرلەسكەن جۇمىستىڭ ناتيجەلەرى, اسىرەسە پرەزيدەنت قاسىم-جومارت توقاەۆتىڭ 2019 جىلدىڭ جەلتوقسانىندا جانە 2020 جىلدىڭ اقپانىندا گەرمانياعا جاساعان ساپارلارى اياسىندا قول جەتكىزىلگەن كەلىسىمدەردىڭ جۇزەگە اسىرىلۋى تالقىلاندى.
كونسۋلتاتسيالار بارىسىندا سونداي-اق ەكى مەملەكەتتىڭ بۇۇ جانە وزگە دە حالىقارالىق ۇيىمدار شەڭبەرىندەگى ىقپالداستىق ماسەلەلەرى تالقىلاندى. تاراپتار جاقىندا ەقىۇ-نىڭ باسشىلىق لاۋازىمدارىنا قازاقستان مەن گەرمانيا ۇمىتكەرلەرىنىڭ تاعايىندالۋى جونىندە ءوزارا قۇتتىقتاۋلارمەن الماستى: قايرات ءابدىراحمانوۆ از ۇلتتار ىستەرى جونىندەگى جوعارى كوميسسار, ال حەلگا شميد باس حاتشى بولىپ سايلاندى. سۇحباتتاسۋشىلار سونداي-اق قازاقستان مەن ەۋروپالىق وداق اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىم مەن گەرمانيانىڭ «جاسىل ورتالىق ازيا» باستاماسىن جۇزەگە اسىرۋ بويىنشا پىكىر الماستى.
COVID-19 پاندەمياسىنا قاراماستان قازاقستاندىق جانە گەرمان سەرىكتەستەرىنىڭ تىكەلەي جانە قاشىقتىقتان جەمىستى قارىم-قاتىناس ورناتىپ جاتقانىنا قاناعاتتانۋشىلىق ءبىلدىرىلىپ, قازاقستان ۇكىمەتىنىڭ گەرمان ينۆەستورلارىمەن جۇمىس جونىندەگى جۇمىس توبىنىڭ, قازاقستاندا تۇراتىن ەتنيكالىق نەمىستەر جونىندەگى ۇكىمەتارالىق كوميسسيانىڭ, ساۋدا-ەكونوميكالىق ىنتىماقتاستىق جونىندەگى ۇكىمەتارالىق جۇمىس توبىنىڭ, قازاقستان-گەرمان ىسكەرلىك كەڭەسىنىڭ جانە بەرلين ەۋرازيالىق كلۋبىنىڭ ەكىجاقتى ىنتىماقتاستىقتى دامىتۋعا قوسىپ جاتقان ەلەۋلى ۇلەسى اتاپ ءوتىلدى. مادەني-گۋمانيتارلىق جانە ءبىلىم بەرۋ سالالارىنداعى ارەكەتتەستىكتى نىعايتۋدىڭ ماڭىزدىلىعى قايتا قۋاتتالدى.
كەلىسسوزدەرگە قاتىسقان قازاقستاننىڭ گەرمانمياداعى ەلشىسى داۋرەن كارىپوۆ جانە "Kazakh Invest" ۇك" اق باسقارما توراعىسىنىڭ ورىنباسارى عالىم وزبەكوۆ مەملەكەتىمىزدەگى ينۆەستيتسيالىق مۇمكىندىكتەر مەن ونىڭ وسى سالاداعى ساياساتى تۋرالى باياندادى.
كونسۋلتاتسيالار قورىتىندىسىمەن تاراپتار ەكىجاقتى ىنتىماقتاستىقتىڭ كوپتەگەن سالالارى بويىنشا قىزمەتتى جالعاستىرۋعا ۋاعدالاستى.
سونداي-اق بەرليندە م.بايمۇحان رەسەي, ورتالىق ازيا ەلدەرى جانە "شىعىس سەرىكتەستىك پەن" قوعامارالىق ىنتىماقتاستىق جونىندەگى گەرمانيا ۇكىمەتىنىڭ ۇيلەستىرۋشىسى, بۋندەستاگ دەپۋتاتى يوحانن زااتحوففپەن كەزدەستى. سۇحباتتاسۋشىلار قازاقستاندا جانە گەرمانيادا وتەتىن الداعى ءىس-شارالار كۇنتىزبەسىن, ونىڭ ىشىندە 2021 جىلدىڭ 10 قاڭتارىنداعى پارلامەنت ءماجىلىسى دەپۋتاتتارىن سايلاۋى جانە 26 قىركۇيەگىندەگى گەرمانياداعى فەدەرالدىق سايلاۋعا دايىندىق تاقىرىپتارىن دا قوزعادى.
وتاندىق ديپلومات ەلىمىزدەگى اۋقىمدى ساياسي جانە دەموكراتيالىق رەفورمالاردىڭ, سونداي-اق "حالىق ۇنىنە قۇلاق اساتىن مەملەكەت" تۇجىرىمداماسىنىڭ جۇزەگە اسىرىلۋىنىڭ بارىسى جونىندە ماعلۇمات بەردى. ءوز كەزەگىندە ي.زااتحوفف قازاقستانداعى دەموكراتيالاندىرۋعا باعىتتالعان وزگەرىستەرگە جانە پارتيالار اراسىنداعى ساياسي باسەكەلەستىكتىڭ ارتۋىنا جانە ءماجىلىستىڭ جاڭارتىلعان قۇرامىمەن جەمىستى قارىم-قاتىناستى جالعاستىرۋعا شىنايى قىزىعۋشىلىعىن ءبىلدىردى.
