سۋرەتتى تۇسىرگەن ەرلان ومار, «EQ»
كەنەتتەن تاپ بولعان بۇل جاعدايدا بىردەن وقۋ-تاربيە ءىسىن جالعاستىرىپ اكەتۋ وڭاي ەمەس ەكەنى ايتپاسا دا تۇسىنىكتى جايت. جوسپاردا بەكىتىلگەن ءپان بويىنشا ساباقتى قاشىقتان وقىتۋعا بولاتىن شىعار. بۇرىن وقۋشى تاۋلىكتىڭ جارتىسىنا جۋىق ۋاقىتىن مەكتەپ قابىرعاسىندا وتكىزىپ, ساباقتان كەيىن ءتۇرلى ءىس-شارالارعا قاتىسىپ, قىزىعۋشىلىعى مەن بەيىمدىلىگىنە بايلانىستى ءارتۇرلى ۇيىرمەلەردە, سەكتسيالاردا ۋاقىتىن وتكىزدى. ال قازىرگىدەي قاشىقتان وقىتۋ جاعدايىندا مەكتەپ تاراپىنان ۇزدىكسىز تاربيە بەرىپ, بالانىڭ ۇيدە زەرىگىپ, قانداي دا تەرىس ىقپالعا ءتۇسىپ, زياندى ارەكەتتەرگە ءۇيىر بولماۋى ءۇشىن نە ىستەۋ قاجەت؟
بۇل جاعدايدى ەسكەرە وتىرىپ, نۇر-سۇلتان قالاسى ج.جاباەۆ اتىنداعى №4 مەكتەپ-گيمنازياسىندا تاربيەلىك ءىس-شارالاردى قالاي ۇيىمداستىرعانىمىز جونىندە تاجىريبەمىزبەن بولىسكىمىز كەلەدى.
تاربيە تۇجىرىمداماسىندا 8 باعىت قامتىلعان تاربيە جوسپارىن قۇردىق. جوسپار قۇرۋدا ۇلتتىق قۇندىلىقتارعا نەگىزدەلگەن وتباسىلىق تاربيە مەن ادامگەرشىلىك تاربيەنى باستى نازاردا ۇستادىق. وقۋشىلاردىڭ عالامتور, تەلەفون, نوۋتبۋك سياقتى قۇرىلعىلارعا قولجەتىمدىلىكتەرىن ەسكەرە وتىرىپ, قاشىقتان تاربيەلىك ءىس-شارالارىمىزدى باستاپ كەتتىك. مەكتەبىمىزدىڭ كوركەم ەڭبەك ءپانىنىڭ مۇعالىمى عاليا كاۋىپباەۆا «ينتەرەردى جابدىقتاۋعا ارنالعان ءساندى بۇيىمدار جاساۋ» تاقىرىبىندا قولونەر باعىتىندا كۋرس ۇيىمداستىردى. بۇل كۋرسقا مەكتەبىمىزدىڭ وقۋشىلارى عانا ەمەس, رەسپۋبليكانىڭ تۇكپىر-تۇكپىرىنەن باسقا دا وقۋشىلار مەن اتا-انالار عالامتور جەلىسى ارقىلى قاتىستى. تىكەلەي ەفيردە بايلانىسقا شىققان اتا-انالار, ءوز پىكىرلەرىن پاراقشاعا جازىپ, شەبەر ۇستازدان ۇيرەنگەندەرىن بىرگە جاسادى.
سونىمەن قاتار ارىپتەسىمىز جۇننەن ءارتۇرلى ەپيزودتاردى سۋرەتتەپ, كارتينا جاساۋدى ۇيرەتتى. ۇدايى ءبىر اي بويى وقۋشىلارمەن بىرگە جاساعان بۇيىمدارىن عالامتور جەلىسى ارقىلى ساتىلىمعا قويدى. ادامداردىڭ كارتيناعا قىزىعۋشىلىعى جوعارى بولدى. مۇعالىممەن بىرگە قىلقالامىن سەرىك ەتكەن وقۋشىلار قاشىقتان وقۋ بارىسىندا عالامتور جەلىسى ارقىلى تابىس كوزىنە دە يە بولدى.
ۇلتتىق قۇندىلىقتاردى بويىنا سىڭىرگەن, مەكتەبىمىزدىڭ ۇلگىلى اتا-انالارىنىڭ ءبىرى شاكەن تۇرار پاندەميا كەزىندە مەكتەپپەن تىعىز بايلانىستا بولىپ, بالدىرعاندارعا اجە اڭگىمەسى مەن ەرتەگىسىن تارتۋ ەتىپ وتىردى.
مەكتەبىمىزدىڭ وقۋشىلارى مەن اتا-انالارى قاشىقتان ۇيىمداستىرىلعان بارلىق ءىس-شاراعا قاتىسىپ, جۇلدەلى ورىندارعا يە بولدى.
وقۋشىلاردىڭ كارانتين كەزىندە پسيحولوگيالىق كۇيزەلىسكە تۇسپەۋىنە قاشىقتان ۇيىمداستىرعان بۇل تاربيەلىك ءىس-شارالاردىڭ ماڭىزى زور بولدى دەگەن ويدامىن. الداعى ۋاقىتتا قانداي دا ءبىر بەلگىلەنگەن مەرزىم ارالىعىندا قاشىقتان ءبىلىم بەرگەن جاعدايدا تۇجىرىمدامادا كورسەتىلگەن 8 باعىتتى قامتىپ, وقۋشى جانە اتا-انالارمەن بىرلەسە وتىرىپ تاربيە جۇمىسىن ۇزدىكسىز جۇرگىزە بەرەمىز دەگەن ويدامىن.
ەركىن تۋلباكان,
ج.جاباەۆ اتىنداعى №4 مەكتەپ-گيمنازياسى ديرەكتورىنىڭ تاربيە ءىسى جونىندەگى
ورىنباسارى
نۇر-سۇلتان
