تاياۋدا اشىق بيۋدجەتتەردىڭ ينتەراكتيۆتى كارتاسىنىڭ رublicbudget.kz سايتىنا مونيتورينگ جۇرگىزىلدى. جەدەل ءىس-شارا قورىتىندىسىندا بىرقاتار مەملەكەتتىك ورگاندار مەن كۆازيمەملەكەتتىك سەكتوردا ساتىپ الۋ, جۇمىستار جانە قىزمەت كورسەتۋ باعاسىنىڭ اسىرا جوسپارلانعانى انىقتالدى.
ماسەلەن, ستەپنوگورسك قالاسى ءبىلىم ءبولىمىنىڭ بيۋدجەتتىك باعدارلاما اكىمگەرى قىلقان جاپىراقتى اعاشتان تىلىنگەن تاقتايلاردى جالپى سوماسى 4 400 000 تەڭگەگە, ياعني, ءبىر داناسىن 80000 تەڭگەدەن ساتىپ الۋدى جوسپارلاعان بولىپ شىقتى. الايدا, قۇرىلىس ماتەريالدارى نارىعىن جانە باسقا ۇيىمداردىڭ مەملەكەتتىك ساتىپ الۋ جوسپارلارىن تالداۋ بارىسىندا, ۇقساس تاۋاردىڭ ورتاشا قۇنى 800-دەن 2000 تەڭگە ارالىعىن قۇرايتىنى بەلگىلى بولدى. ءوڭىردىڭ سىبايلاس جەمقورلىققا قارسى ءىس-قيمىل ۆەدومستۆوسىنىڭ جوسپارلانعان تاۋارلارعا وڭتايلى باعانى قايتا قاراۋ جانە بەلگىلەۋ تۋرالى ۇسىنىستارىنان كەيىن مەملەكەتتىك ساتىپ الۋ باعاسى تومەندەتىلدى. ناتيجەسىندە قالالىق ءبىلىم ءبولىمىنىڭ بيۋدجەت قاراجاتىنىڭ جالپى ۇنەمدەلۋى 4 300 000 تەڭگەنى قۇرادى.
سونداي-اق, «كوكشەتاۋ جىلۋ» مەملەكەتتىك كاسىپورنى مەتالل دانەكەرلەۋ ەلەكتوردتارىنىڭ ارقايسىسىن 1456 تەڭگەدەن ساتىپ الۋدى جوسپارلاپ, جالپى 9629984 تەڭگە قارجى جۇمساۋدى ۇيعارعان. شىن مانىسىندە الگى ەلەكترودتىڭ ارقايسىسىنىڭ باعاسى 549 تەڭگەدەن اسپايدى. دەپارتامەنتتىڭ ۇسىنىس حاتىنان كەيىن قارجى وپەراتسياسى قايتا قارالىپ, كاسىپورىننىڭ 6 ميلليون تەڭگەلىك قارجىسى ۇنەمدەلىپ وتىر.
ءوڭىردىڭ سىبايلاس جەمقورلىققا قارسى ۆەدومستۆوسىنىڭ ارالاسۋىمەن «ستەپنوگرسك ۆودوكانال» كاسىپورنىندا 7 ملن تەڭگەگە جۋىق مەملەكەت قارجىسىنىڭ ارتىق جۇمسالۋىنا جول بەرىلمەدى. كاسىپورىن قۇبىرلاردان سۋ تاراتۋدىڭ شويىن تەتىكتەرىن ساتىپ الۋ ءۇشىن باستاپقىدا 1 470 000 تەڭگە ء(ار داناسى 85 مىڭ تەڭگە) ءبولۋدى جوسپارلاعان.
جالپى, وبلىستىق سىبايلاس جەمقورلىققا قارسى ءىس-قيمىل دەپارتامەنتى جۇرگىزگەن مونيتورينگ بارىسىندا, جوسپارلانعان مەملەكەتتىك ساتىپ الۋ باعاسىن تومەندەتۋ ارقىلى ۇستىمىزدەگى جىلى 350 ملن تەڭگە بيۋدجەت قارجىسىنىڭ ۇنەمدەلۋى قامتاماسىز ەتىلدى.
