"پەحا" نەمەسە "گرەك" لاقاپ اتىمەن ەسىمى اڭىزعا اينالعان گولەودور قازاقستان فۋتبولىن تانىمال ەتۋگە جانە دامىتۋعا ەرەكشە ۇلەس قوستى. ونىڭ ەسىمى بارلىق شىنايى فۋتبول سۇيەر قاۋىمعا كەڭىنەن تانىمال. اسىرەسە, كسرو جوعارى فۋتبول قاۋىمداستىعىنىڭ مۇشەسى, قازاقستان فۋتبولىنىڭ 1950-1980 جىلدارداعى فلاگمانى بولعان ول "قايرات" كلۋبىنىڭ جانكۇيەرلەرى ءۇشىن ەستە قالارلىق ويىنشىلاردىڭ ءبىرى بولدى.
ە.پەحلەۆانيدي كەڭەس وداعى فۋتبولىنىڭ جوعارعى ليگاسى ماتچتارىنىڭ تاريحىندا ەڭ جىلدام سوعىلعان گولدىڭ اۆتورى رەتىندە رەكورد جاسادى. 1986 جىلعى 3 قىركۇيەكتە شابۋىلشى پەحلەۆانيدي سول كەزدەگى كسرو چەمپيونى – كيەۆتىك "دينامو" قاقپاسىنا ماتچ باستالعالى نە بارى 10 سەكۋند ىشىندە گول سوققان ەدى.
"پەحا" اسەم ءارى ەتالوندىق جەكە تەحنيكا مەن تاماشا ورىندالاتىن الىس سوققىلاردىڭ يەسى بولدى. زامانىنداعى چەمپيوناتتاردىڭ ەڭ كورنەكتى تۇلعالارىنىڭ بىرىنە اينالعان بۇگىنگى وردەن يەسى كەرەمەت بومبارديرلىك-مەرگەندىك قاسيەتتەردى بويىنا سىيعىزا ءبىلدى.
ە.پەحلەۆانيديدىڭ سپورتقا سىڭىرگەن ەڭبەگى كوپشىلىككە بەلگىلى, الايدا ونىڭ ەڭ ماڭىزدى قاسيەتى – "قايرات" كلۋبىنا بەرىلگەندىگى ەدى. داڭق شىڭىنا شىققان فۋتبولشىنى "دينامو", "تسسكا", "سپارتاك" سياقتى كوپتەگەن اتاقتى جانە بەدەلدى كلۋبتار شاقىردى, بىراق ول قازاقستاندىق "قايراتقا" ادالدىعىن ساقتاپ, ۇسىنىستاردان باس تارتتى.
ء"يا. مەن ءۇشىن قازاقستاننان ارتىق ورىن جوق ەكەنىن ءاردايىم ايتىپ كەلەمىن. قانداي كوماندامىز بولعان ەدى! بىزبەن ماتچتارعا كەلۋگە كلۋبتار قورقاتىن. ءوز الاڭىمىز "تسەنترالنىيداعى" جەكپە-جەكتەردە بارلىق قارسىلاستاردى جەڭدىك. ال بىزگە قارسى قانداي كۇشتى كوماندالار شىققان ەدى!", دەپ "قايرات" ارداگەرى ءوز ەستەلىكتەرىمەن ءبولىستى.
قازاقستاننىڭ گرەكياداعى ەلشىسى الەكسەي ۆولكوۆ وردەندى تابىستاي وتىرىپ, ەل باسشىلىعىنىڭ ە.پەحلەۆانيديدىڭ قازاقستاندىق سپورتتى ناسيحاتتاۋعا قوسقان ۇلەسىن جوعارى باعالايتىنىن اتاپ ءوتتى.
"گرەكيادا تۇرىپ, ءسىز قازاقستاننىڭ سپورتتىق جەتىستىكتەرىن كوپشىلىككە ناسيحاتتاۋداسىز, فۋتبول فەدەراتسياسىنىڭ ءىس-شارالارىنا, ەلشىلىكتىڭ مادەني-بۇقارالىق قىزمەتىنە بەلسەنە قاتىساسىز. ەڭبەگىڭىز "قايراتتىڭ" فۋتبول اكادەمياسىنىڭ اشىلۋىمەن اتاپ ءوتىلدى. ءسىز كلۋبتىڭ ءار ويىنى تۋرالى حاباردار بولىپ, كەڭەس بەرىپ, جاستارمەن ءوز تاجىريبەڭىزبەن بولىسەسىز", دەپ ا.ۆولكوۆ ءوز ءسوزىن تۇيىندەدى.
