بىرەۋ ساتۋشىعا باتىل بارىپ, ساپاسىز ءونىمدى ساتىپ العان جاعدايدا بۇزىلعان قۇقىقتاردى قالپىنا كەلتىرۋدى تالاپ ەتەدى. ال كەيبىرەۋلەرى جاي ارالاسپاعاندى ءجون كورەدى, ويتكەنى ولار كوبىنەسە ءوز قۇقىقتارىن بىلمەيدى.
تاۋار-اقشا قاتىناستارى شەڭبەرىندە كوپتەگەن «ىڭعايسىز» جاعدايلار بار. ادەتتە, دۇكەندەر مەن سۋپەرماركەتتەردە ولار اقاۋلى تاۋارلاردى وڭاي اۋىستىرادى نەمەسە اقشاسىن قايتارادى: جىرتىلعان ءسۇت قورابى, ساپاسىز نەمەسە مەرزىمى ءوتىپ كەتكەن ونىمدەر جانە ت.ب. ولار كيىم-كەشەكتەر نەمەسە اياق كيىمدەر ءسىزدىڭ تالعامىڭىز بەن ستيلىڭىزگە سايكەس كەلمەسە, اقشاسىن تولىق قايتارىپ بەرەدى. مۇنداي جاعدايدا ەڭ ماڭىزدىسى – سىزدە تاۋاردىق نەمەسە فيسكالدى تۇبىرتەك بولۋ قاجەت جانە قايتارۋدى 14 كۇننەن كەشىكتىرمەۋ كەرەك.
قازاقستاندىق زاڭناماعا سايكەس, ازاماتتار تاۋارلارعا اقشانى قايتارۋعا نەمەسە ءونىم ءتيىستى ساپادا بولسا دا ايىرباستاۋعا قۇقىلى. ادەتتە, بۇل ازىق-ت ۇلىك ەمەس ونىمدەردە بولادى, ەگەر سىزگە ءتۇسى, ولشەمى نەمەسە ءستيلى سايكەس كەلمەسە. سونىمەن قاتار ساتىپ الىنعان ءونىمدى پايدالانۋعا ۇلگەرمەگەنىڭىز جانە ساتىپ الۋ فاكتىسى بويىنشا قۇجاتتاردى ساقتاعانىڭىز ماڭىزدى بولىپ تابىلادى. بۇل ەرەجە ءدارى-دارمەكتەرگە, ش ۇلىقتارعا, ءىش كيىمدەرگە, مەترلىك تاۋارلارعا, وسىمدىكتەر مەن جانۋارلارعا, ۇيالى بايلانىس ابونەنتتىك قۇرىلعىلارىنا قولدانىلمايدى.
ەگەر ساتۋشىدا (وندىرۋشىدە) سۇرانىس ۇسىنىلعان كەزدە اۋىستىرۋ ءۇشىن قاجەتتى تاۋارلار بولماسا, اۋىستىرۋ وسىنداي تالاپ تۋىنداعان كۇننەن باستاپ كۇنتىزبەلىك ون كۇن ىشىندە جۇرگىزىلۋى كەرەك.
ساراپتامانىڭ ەگجەي-تەگجەيىنە جەكە توقتالعانجون. قايتارىلعان تاۋارلاردىڭ ساپاسىن قوسىمشا تەكسەرۋدىڭ قۇنىن ساتۋشى تولەيدى. ەگەر تاۋارلارعا وسىنداي ساراپتاما جۇرگىزۋ ناتيجەسىندە تاۋارلاردا اقاۋلار جوق ەكەندىگى نەمەسە تۇتىنۋشىعا تاۋارلاردى بەرگەننەن كەيىن پايدالانۋدىڭ, ساقتاۋدىڭ نەمەسە ءۇشىنشى تۇلعالاردىڭ ءىس-ارەكەتتەرىنىڭ نەمەسە فورس-ماجورلىق جاعدايلاردىڭ بەلگىلەنگەن ەرەجەلەرىن بۇزۋ سالدارىنان تۋىنداعانى انىقتالسا, تۇتىنۋشى ساتۋشىعا ساراپتاما جۇرگىزۋ شىعىندارىن, سونداي-اق ونى وتكىزۋگە بايلانىستى شىعىنداردى, جۇك تاسىمالداۋ شىعىندارىن وتەۋگە مىندەتتى.
تۇتىنۋشى تاۋاردىڭ ساپاسىن باقىلاۋعا جانە ساراپتاماعا جەكە ءوزى نەمەسە ءوزىنىڭ وكىلى ارقىلى قاتىسۋعا, سونداي-اق تاۋارلاردى ءوز ەسەبىنەن ساراپتامادان وتكىزۋگە قۇقىلى.
ءونىمدى نەمەسە قوسالقى بۇيىمدى اۋىستىرۋ كەزىندە كەپىلدىك مەرزىمى, ەگەر ول كەلىسىمشارتتا وزگەشە كوزدەلمەسە, ونى تۇتىنۋشىعا بەرگەن كۇننەن باستاپ قايتا ەسەپتەلەدى.
بۇزىلعان, اقاۋلى ءونىمدى قايتارۋ نەمەسە ايىرباستاۋ ەرەجەلەرى جەڭىلدىكتى نەمەسە ءونىمدى جوندەۋگە تولەم تولەۋدى بولجايدى. ەرەكشەلىكتەرى كەلەسى بولىپ تابىلادى:اقاۋلارىساتىپ الۋ كەزىندە جاريالانعان جانە تاۋارلار جەڭىلدىكپەن ساتىلعان كەزدە نەمەسە ساتىپ الۋشىنىڭ ءوزى پايدالانۋ ەرەجەلەرىن بۇزعان جاعدايلاردا.
ساتىپ الۋ تۋرالى جانە ساۋدا مەكەمەسىندە بولۋ جايلى سۋرەت تۇسىرسەڭىز جاقسى بولار ەدى. ەسىڭىزدە بولسىن, دۇكەندەردە سۋرەتكە تۇسىرۋگە تىيىم سالىنبايدى. ەگەر چەك جوعالىپ كەتسە نەمەسە بەرىلمەسە, بۇل سىزگە ۇلكەن كومەك بولادى. جوعالعان چەك, ارينە, قايتارۋ مەن ايىرباستاۋدا قيىندىق تۋدىرادى. كەيبىر جاعدايلاردا جارامدىلىق مەرزىمىن دالەلدەۋ نەمەسە كەپىلدىك مەرزىمىن ءدال بەلگىلەۋ ماڭىزدى بولىپ تابىلادى. چەك بولماعان كەزدە مۇنى ىستەۋ وتە قيىن.
ساتىپ الۋشى جارامدىلىق مەرزىمى نەمەسە كەپىلدىگى ءالى دە جالعاساتىن ءونىم بۇزىلعان جاعدايدا ونىڭ اقاۋلارى تۋرالى مالىمدەۋگە قۇقىلى ەكەنىن ءبىلۋىڭىز كەرەك. سوندىقتان كەپىلدىك تالونىن ءاردايىم ساقتاۋ قانشالىقتى ماڭىزدى ەكەندىگى تۇسىنىكتى. كەپىلدەمە بولماعان جانە شىعارىلعان كۇنى بەلگىسىز جاعدايلاردا قايتارۋ ساتىپ الىنعان كۇننەن باستاپ ەكى جىل ىشىندە جۇزەگە اسىرىلادى. ەرەكشەلىكتەرى ساتۋشىلارمەن جەكە تالقىلانادى جانە ول كەلىسىمدەردە قاراستىرىلعان. جارامدىلىق مەرزىمى اياقتالعاننان كەيىن, ەكى جىلدان از ۋاقىت وتكەن سوڭ, تاۋارلار قايتارىلۋعا جاتادى. بىراق ءسىز ءونىمنىڭ زاقىمدانۋى ساتىپ الۋدان بۇرىن بولعانىن دالەلدەۋىڭىز كەرەك.
جوعارىدا ايتىلعانداردى قورىتىندىلاي كەلە, فيسكالدى نەمەسە تاۋارلىق تۇبىرتەكتىڭ شەشۋشى ءرولى تۋرالى, وسى ساۋدا نۇكتەسىندە ساتىپ الۋ تۋرالى فوتوسۋرەتتى جاساۋ جايلى تاعى ءبىر رەت ەسكە سالۋ عانا قالادى. ءسىزدىڭ قۇقىعىڭىزدى قورعاۋ ءۇشىن كەپىلدەمە نەمەسە مەرزىم اياقتالعانعا دەيىن تۇبىرتەكتەردى جانە ساتىپ الۋعا بايلانىستى بارلىق قۇجاتتاردى ساقتاعانىڭىز ءجون. سوندا ءسىزدىڭ ءىسىڭىزدى دالەلدەۋ جانە اقشانى قايتارۋ نەمەسە ءونىمدى ايىرباستاۋ وڭاي بولادى.
ەگەر ساتۋشى اقشانى قايتارۋدان باس تارتسا, ازاماتتار تۇتىنۋشىلاردىڭ قۇقىقتارىنىڭ بۇزىلعاندىعى تۋرالى تۇتىنۋشىلاردىڭ قۇقىقتارىن قورعاۋ كوميتەتىنە تەلەگرامم-بوت kzpp_bot, ەلەكتروندى ۇكىمەت پورتالى https://egov.kz/cms/ru/services/citizen_and_the_government/e_app, جەدەل جەلى ارقىلى حابارلاي الادى +7 (7172) 75-06-42, 75-16-32, 74-98-32, 74-98-36 نەمەسە جازباشا ءوتىنىش جازا الادى. سونىمەن قاتار وسىعان بايلانىستى قازاقستاندىقتار تۇتىنۋشىلاردىڭ قۇقىقتارىن قورعاۋدىڭ بىرىڭعاي اقپاراتتىق جۇيەسىن قولدانا الادى. تۇتىنۋشىلاردىڭ قۇقىقتارىن قورعاۋدىڭ بىرىڭعاي اقپاراتتىق جۇيەسىنىڭ قاناتقاقتى جوباسى ىسكە قوسىلعان, جۇيەگە ۇيالى تەلەفون نەمەسە كومپيۋتەر ارقىلى weask.kz سايتىنا كىرۋگە بولادى. تۇتىنۋشىلار اقىلدى جۇيەنى پايدالانا وتىرىپ, ۋاكىلەتتى ورگانعا حابارلاسپاس بۇرىن ساتۋشىمەن ماسەلەنى تىكەلەي شەشۋگە تىرىسا الادى. الايدا ەگەر 10 كۇن ىشىندە ساتۋشى شاعىمعا جاۋاپ بەرمەسە, ول تۇتىنۋشىلاردىڭ قۇقىقتارىن قورعاۋ كوميتەتىنە تۇسەدى. سوندىقتان قۇقىقتارىڭىزدى قورعاۋعا ابدەن بولادى, باستىسى ونى قالاي جاساۋ كەرەكتىگىن ءبىلۋ.
