باستى قارجىلىق قاداعالاۋشىنىڭ مالىمەتىنشە, 2020 جىلدىڭ قاراشا ايىنىڭ باسىندا اتالعان سەكتورعا بانكتەر 2,3 ترلن تەڭگە بەرگەن. ال بىلتىر شاعىن بيزنەس 2,1 ترلن تەڭگە العان ەدى. ءبىر جىل ىشىندە بولىنگەن سوما 9,5 پايىزعا نەمەسە 200 ملرد تەڭگەگە ءوسىپ تۇر. زاڭدى تۇلعالار 1,9 ترلن تەڭگە السا, جەكە تۇلعالار 354,5 ملرد تەڭگە نەسيە العان.
ايماقتار اراسىندا الماتى كوش باستاپ تۇر. الماتىداعى شاعىن بيزنەسكە بيىل 1,35 ترلن تەڭگە بولىنگەن ء(بىر جىلدا 17,4 پايىز ءوسىم). ودان كەيىن نۇر-سۇلتان (265 ملرد تەڭگە) جانە قاراعاندى وبلىستارى (80 ملرد تەڭگە) تۇر. شىعىس قازاقستان وبلىسى مەن شىمكەنت قالاسى دا 70 ملرد تەڭگە مەجەسىن ەڭسەرگەن.
وبلىستاردىڭ ىشىندە از قاراجات العان ولكە – قىزىلوردا وبلىسى (28,3 ملرد تەڭگە), الماتى وبلىسى (24 ملرد تەڭگە). ال ەڭ از سوما ەندى جاڭارىپ, تۇلەپ كەلە جاتقان تۇركىستان وبلىسىنا تيەسىلى. اتالعان ولكەدەگى شاعىن بيزنەس كاسىپورىندارى 5,7 ملرد تەڭگەنى قاناعات تۇتقان.
مەملەكەت شاعىن جانە ورتا بيزنەستى 2022 جىلعا دەيىن ۇجىمدىق تابىس سالىعىنان, جەكە تابىس سالىعىنان, الەۋمەتتىك جانە بىرىڭعاي جەر سالىعىنان بوساتقان ەدى.
ۇلتتىق ستاتيستيكا بيۋروسىنىڭ اقپاراتىنا سۇيەنسەك, 2019 جىلدىڭ اياعىنداعى دەرەك بويىنشا ەلىمىزدە 439 839 كومپانيا تىركەلگەن. سونىڭ 431 044-ءى شاعىن كاسىپكەرلىك نىساندارى ەكەن. وسىنىڭ ءوزى-اق شاعىن كاسىپكەرلىكتىڭ وتاندىق بيزنەستە قانشالىقتى ۇلەسى جوعارى ەكەنىن اڭعارتسا كەرەك.
كەلەر جىلدىڭ باسىنان باستاپ ەكىنشى دەڭگەيلى بانكتەر جانە "اگرارلىق نەسيە كورپوراتسياسى" ارقىلى جەڭىلدەتىلگەن نەسيە بەرىلە باستايدى. ورتا جانە شاعىن بيزنەس سۋبەكتىلەرى ءۇشىن شەكتى مولشەر – 3 ملرد تەڭگە بولسا, جەكە كاسىپكەر رەتىندە تىركەلگەندەر ءۇشىن 50 ملن تەڭگەدەن اسپاۋى ءتيىس. بولىنگەن قاراجات ناۋرىز ايىنىڭ سوڭىنا دەيىن يگەرىلۋى ءتيىس. بۇل دا شاعىن كاسىپكەرلىككە بەرىلەتىن نەسيە كولەمىن ارتتىرا تۇسەرى ءسوزسىز. ونى بيزنەس يەلەرى قانشالىقتى قاجەتىنە جاراتادى, جەڭىلدەتىلگەن نەسيە ءتيىمدى بولدى ما, جوق پا, ول كەلەسى ماتەريالدىڭ جۇگى بولماق.
