ايماقتىق مەكتەپتە 30 ەرىكتى ءدارىس الاتىن بولادى. وقىتۋ كەلەسى باعىتتار بويىنشا جۇرگىزىلەدى:
- مەديتسينالىق ۇيىمدارعا ەرىكتىلىك كومەك كورسەتۋ;
- حالىقتىڭ مەديتسينالىق ساۋاتتىلىعىن ارتتىرۋ;
- العاشقى كومەك كورسەتۋگە ۇيرەتۋ;
- حالىق اراسىندا دونورلىقتى ناسيحاتتاۋ;
- حالىقتىڭ دەنساۋلىعىن نىعايتۋ جانە COVID-19 پروفيلاكتيكاسىن جۇرگىزۋ.
مەكتەپتە ءبىلىم الۋشىلار العاشقى كومەكتى ۋاقىتىلى كورسەتۋدى, توتەنشە جاعدايلار كەزىندە جەدەل كومەك كورسەتۋدى جانە جاعدايدى دۇرىس باعالاپ, كومەك جوسپارىن ساۋاتتى قۇرۋدى ۇيرەنەدى.
"2020 جىلى باستالعان پاندەميا مەديتسينا مەن دەنساۋلىق ساقتاۋ ءبىزدىڭ ەلدىڭ ءاربىر ازاماتى ءۇشىن ەڭ ماڭىزدى سالالار ەكەنىن كورسەتتى. وكىنىشكە قاراي, ءبىزدىڭ وڭىرلەردە مەديتسينالىق ماماندار جەتىسپەيدى. ال مەديتسينالىق ەرىكتىلىكتى دامىتۋ جانە سەرتيفيكاتتالعان مەديتسينالىق ەرىكتىلەردى دايارلاۋ ايماقتىق دەنساۋلىق ساقتاۋ سالاسىنا كومەكتەسەدى. ياعني, مەديتسينالىق ەرىكتىلەر - دارىگەرلەر مەن مەدبيكەلەردىڭ كومەكشىلەرى رەتىندە ناۋقاستارعا كومەك كورسەتىپ, تۇرعىندار اراسىندا پروفيلاكتيكالىق جۇمىستاردى جۇرگىزە الادى." - "قازاقستاننىڭ مەديتسينالىق جاستارى" رەسپۋبليكالىق قوعامدىق بىرلەستىگىنىڭ توراعاسى ابىلايحان ءابدىراش.
جاقىن ارادا تۇركىستان قالاسىندا ەرىكتىلەردى وقىتاتىن تاعى ءبىر مەكتەپ اشىلادى دەپ جوسپارلانۋدا.
"مەديتسينالىق ەرىكتىلەر مەكتەبى" الەۋمەتتىك جوباسى دەنساۋلىق ساقتاۋ سالاسىنداعى ەرىكتىلەر سانىن كوبەيتۋ ماقساتىندا قۇرىلدى. رەسپۋبليكالىق "مەديتسينا جاستارى" قوعامدىق بىرلەستىگى وكىلدەرىنىڭ ايتۋىنشا, ەرىكتىلىك ماماندىق ەمەس, حوببي بولىپ ەسەپتەلەدى. مەديتسينالىق ۋنيۆەرسيتەتتەر مەن كوللەدجدەر ستۋدەنتتەرىنىڭ بوس ۋاقىتتارى از, بىراق سوعان قاراماستان ولار ەرىكتىلىككە قىزىعۋشىلىق تانىتىپ جاتىر.
مەكتەپتە ءبىلىم العان مەديتسينالىق ەرىكتىلەر حالىقارالىق مەديتسينالىق ەرىكتىلىك تاجىريبەگە سۇيەنە وتىرىپ, جوعارى دەڭگەيدەگى ءبىلىم الاتىن بولادى, سونىمەن قوسا, مەديتسينا سالاسىنىڭ ۇزدىك ماماندارى وتكىزەتىن ترەنينگتەر مەن شەبەرلىك سىنىپتارعا قاتىساتىن بولادى.
پاندەميانىڭ باستالۋىمەن مەديتسينالىق ەرىكتىلەر قاجەتتىلىگى سەزىلە باستاعانىن اتاپ وتكەن ءجون. كوروناۆيرۋستىق ينفەكتسياسىمەن كۇرەستە الدىڭعى قاتاردا تۇرعان ەمدەۋ-پروفيلاكتيكالىق مەكەمەلەر مەديتسينالىق ەرىكتىلەردى وقىتۋ مەن نۇسقاۋلىق بەرۋگە ۋاقىتتارىن جانە باسقا دا رەسۋرستارىن جۇمسادى. وسىعان بايلانىستى قازىرگى ۋاقىتتا مەديتسينالىق ەرىكتىلەردى الدىن-الا دايىنداۋدىڭ قاجەتتىلىگى تۋىندايدى. "قازاقستاننىڭ مەديتسينالىق جاستارى" رەسپۋبليكالىق قوعامدىق بىرلەستىگى الدارىنا قويعان ماقساتتارى ءدال وسى.
