– ەلباسى باستامالارىن جۇيەلى بەينەلەيتىن البومنىڭ جارىق كورۋى – ورتاق ەڭبەگىمىزدىڭ جەمىسى, – دەپ ماڭىزدى جيىننىڭ بەتاشار ءسوزىن ايتقان ەلباسى كىتاپحاناسىنىڭ ديرەكتورى, ساياسي عىلىمدار دوكتورى, پروفەسسور ءامىرحان راحىمجانوۆ, تۇڭعىش پرەزيدەنتىمىزدىڭ الدىڭعى قاتارلى مەملەكەتتەرمەن بىردەي ەكونوميكالىق كوشباسشىلىققا قول جەتكىزۋدە تسيفرلى تەحنولوگيالاردى يگەرۋ مەن ەنگىزۋىنىڭ ماڭىزىنا توقتالدى.
ودان كەيىن ماڭىزدى شارانىڭ ءمانى جايلى پىكىر بىلدىرگەن Astana IT University رەكتورى, تەحنيكا عىلىمدارىنىڭ دوكتورى دارحان احمەد-زاكي, ادامنىڭ پاراساتى بويىنداعى ءبىلىمى – جەكە قاسيەتتەرى مەن قۇندىلىق باعدارىمەن باعالاناتىنى جايلى ايتىپ: «قازىرگى اقپاراتتىق كەزەڭدە ەلدىڭ دامۋى دا ۇلتتىڭ زياتكەرلىك الەۋەتىنە تىكەلەي بايلانىستى بولىپ وتىر. ەلباسى جولداۋلارىنىڭ باستى پوستۋلاتى وسى اقيقاتقا نەگىزدەلەدى. قازاقستاننىڭ قوعامدىق-ساياسي ومىرىنە جاڭا ۇعىمدار ەنگەن سوڭ تىڭ ماقساتتاردى جۇزەگە اسىرۋ ءىسى جاڭا كوزقاراستاردى قاجەت ەتتى. وسى تۇستا نۇرسۇلتان ءابىش ۇلى جاستاردىڭ اقىل-قايراتىنا سەنىم ارتىپ, ولاردىڭ الەۋەتىن جاقسارتۋعا قولايلى جاعداي جاسادى. ناتيجەسىندە ەلىمىز ەكونوميكانىڭ, ساياساتتىڭ جانە قوعامدىق قاتىناستاردىڭ ءتۇرلى سالاسىنداعى ينتەگراتسيالىق پروتسەستەرگە كوبىرەك تارتىلا باستادى. نازارلارىڭىزعا ۇسىنىلىپ وتىرعان البوم – بۇل جۇمىستاردىڭ ايقىن كورىنىسى», دەدى.
– ەلباسى كىتاپحاناسى مەن Astana IT University قۇراستىرعان البومنان نۇرسۇلتان ءابىش ۇلى كوتەرگەن باستامالاردىڭ ءبارى ادامزات الەۋەتىن جاھاندىق باسەكەگە قابىلەتتى ەتۋگە باعىتتالعانىن ءتۇسىنىپ, ەلىمىزدەگى ءبىلىم بەرۋ جۇيەسىنىڭ جەر-جاھان ترەندتەرىمەن تۇسپا-تۇس دامىپ كەلە جاتقانىن اڭعارۋعا بولادى. البوم ەلباسىنىڭ ستراتەگيالىق بولجامىن مازمۇندايتىندىقتان, وسكەلەڭ ۇرپاققا قۇندى دەرەك بولماق, – دەدى ءىس-شارانىڭ قادىرلى قوناعى, ءبىلىم جانە عىلىم ءمينيسترىنىڭ كەڭەسشىسى, ساياسي عىلىمدار دوكتورى امانتاي نۇرماعامبەتوۆ.
تۇساۋكەسەر بارىسىندا ەلباسى كىتاپحاناسى مەن Astana IT University ىنتىماقتاستىق مەموراندۋمىنا قول قويدى.
