جاتاقحانالاردىڭ جايى جاقسى بولماي تۇر

ماسەلەن, تاراز قالاسىنداعى جامبىل پو­لي­تەحنيكالىق جوعارى كوللەدجىنىڭ الەۋ­ە­تى وتە جاقسى. ءبىلىم بەرۋدەگى جاڭا­شىل­­دىقتار, تىڭ باستامالار مۇندا كوپ. بىراق اتالعان ءبىلىم نىسانىنىڭ جاتاقحاناسىنا كو­ڭىل بولىنبەگەن. ياعني, كۇردەلى جوندەۋ قا­جەت. مۇندا جاڭارتۋ جۇمىستارى سوڭعى رەت 10 جىل بۇرىن جۇرگىزىلىپتى. سودان بەرى جاتاقحانا كۇردەلى جوندەۋ كورمەگەن كۇيى تۇر. ايتا كەتەيىك, كوللەدج جاتاقحاناسى 40 جىلعا جۋىق ستۋدەنتتەردىڭ ءۇيى بولعان. سول سياقتى جامبىل اۋدانىندا ور­نا­لاسقان №17 جامبىل كوللەدجىنىڭ جاتاق­حا­ناسىندا دا وسىنداي ماسەلە بار. بۇ­گىن­گىدەي كۇردەلى جاعدايعا قاراماستان, ستۋ­دەنت­تەر اتالعان كوللەدجدە ءداستۇرلى وقۋ فورماتىندا ءبىلىم الۋدا. بىراق جاتاق­حانا جايسىز, ءبىر سوزبەن ايتقاندا, تۇرۋعا قولايسىز. ءتىپتى بولمەلەرىنىڭ ەسىگى مۇلدەم ق ۇلىپتانبايدى. ال كوللەدج باسشىلىعى توزىعى جەتكەن عيماراتتى قايتا-قايتا سىرلاپ, اكتەپ ارەڭ ۇستاپ وتىر. اتالعان كوللەدجدە جۋىناتىن ار­نايى ورىن بولما­عان­دىقتان جاس­تار سەنبى, جەكسەنبى كۇندەرى ۇيلەرىنە جىبە­رى­لەدى.

بۇل كۇندە تالاس اۋدانىنىڭ ورتالىعى قاراتاۋ قالاسىندا 4 كوللەدج بار. قا­لاداعى №2 قاراتاۋ كوللەدجىنىڭ جا­تاقحاناسىندا 36 ستۋدەنت تۇرادى. عي­ما­رات 1977 جىلى سالىنعان. مۇندا دا جا­تاقحانانى كۇردەلى جوندەۋدەن وتكىزۋ ما­سەلەسى تۋىنداعان. بۇگىندە جاتاق­حا­نا عيماراتى ەسكىرىپ, تەرەزەلەرى سىن­عان. ەسىكتەرى ق ۇلىپتانبايدى جانە عي­ما­راتتىڭ سىرتىندا «جاتاقحانا» دەگەن اتاۋى دا جازىلماعان. بۇل كوللەدج بىلتىر جۇرگىزىلگەن مونيتورينگ نا­تيجەسىندە ە­لىمىزدەگى ەڭ ناشار 10 كول­لەدجدىڭ تىزىمىنە ەنىپتى. قالعان 3 كول­لەد­جدىڭ جاتاقحاناسىنىڭ جاعدايى ورتاشا. سونداي-اق جۋالى اۋدانىندا ورنالاسقان №16 جۋالى كوللەدجىنىڭ جاتاقحاناسىنا دا كۇردەلى جوندەۋ قاجەت. جالپى, 32 ورىنعا ارنالعان جاتاقحانادا كارانتين تالاپتارىنا سايكەس قازىر 20 ستۋدەنت تۇرىپ جاتىر. الايدا ستۋدەنتتەر تا­راپىنان جاتاقحاناعا دەگەن سۇرانىس وتە جوعارى. بىراق بارىنە بىردەي ورىن جەتكىزۋ تاعى مۇمكىن ەمەس. بيىلعى وقۋ جىلىنىڭ وزىندە جاتاقحانادان ورىن الۋعا 50 ستۋدەنت ءوتىنىم بەرىپتى. وڭىردەگى كول­لەدج جاتاقحانالارىنىڭ بۇگىنگى جاع­دا­يى وسىنداي.

وسى ورايدا Nur Otan پارتياسى وبلىستىق فيليالى جانىنداعى Jas Otan جاس­تار قاناتىنىڭ مۇشەلەرى دە وڭىردەگى كول­لەدجدەرگە زەردەلەۋ جۇمىستارىن جۇرگىزىپ, اتالعان كەمشىلىكتەردى وبلىس­تىق ءبىلىم باسقارماسىنا جولداعان. ەندى ال­داعى ۋاقىتتاردا قۇزىرلى مەكەمە اتال­عان ماسەلەلەرگە بايلانىستى قان­داي شە­شىم شىعارادى, ول ۋاقىتتىڭ ەنشى­سىن­دە­گى دۇنيە.

بۇگىندە ءبىلىم ساپاسىن ارتتىرۋ – باستى تالاپ. مەملەكەت تاراپىنان كورسەتىلىپ وتىرعان قولداۋ دا از ەمەس. ەل پرەزيدەنتى قاسىم-جومارت توقاەۆ ءبىلىم ساپاسىنا «جاڭا جاعدايداعى قازاقستان: ءىس-قيمىل كەزەڭى» اتتى جولداۋىندا دا توقتالعان بولاتىن. الايدا ستۋدەنتتەردىڭ ساپالى ءبىلىم الۋى ءۇشىن دە جاعداي كەرەك. بىراق جامبىلداعى جاتاقحانالاردىڭ بۇگىنگى جاعدايى وسىنداي بولىپ تۇر. جىل سايىن وڭىردەگى ءبىلىم بەرۋ سالاسىنا ءتيىستى قاراجات بولىنەدى. اتالعان ءبىلىم نىساندارىنىڭ ءبارى دە وبلىستىق ءبىلىم باسقارماسىنا قاراستى بولعاندىقتان, باسقارما باسشىلىعىنىڭ وسى ۋاقىتقا دەيىن جاتاقحانا ماسەلەسىنە كوڭىل بولمەي كەلگەنى ءتىپتى تۇسىنىكسىز. بۇگىندە وبلىستا 46 تەحنيكالىق جانە كاسىپتىك ءبىلىم بەرۋ مەكەمەسى جۇمىس ىستەيدى. ونىڭ 23-ءى مەملەكەتتىك بولسا, 23-ءى جەكەمەنشىك. سونداي-اق مەملەكەتتىك 16 كوللەدجدە, مەملەكەتتىك ەمەس 3 كوللەدجدە جاتاقحانا بار.

«جالپى, وبلىستاعى 19 كوللەدجدەگى جاتاقحانالاردىڭ سىيىمدىلىعى 2 840 ادامدى قۇرايدى. شتاتتىق رەجىمدە جۇمىس ىستەپ وتىرعان №2 قاراتاۋ, №8 مويىنقۇم, №16 جۋالى جانە №17 جامبىل كوللەدجىندە 110 ستۋدەنت جاتاق­حا­نامەن قامتىلعان. سونىمەن قاتار 3 كوللەدجگە 750 ورىندىق جاتاق­حا­نا­عا قاجەتتىلىك بار», دەيدى وبلىستىق ءبىلىم باسقارماسى تەحنيكالىق جانە كاسىپ­تىك ءبىلىم بەرۋ ءبولىمىنىڭ باسشىسى التىناي جايلىشقىزى. ءبولىم باس­شىسىنىڭ ايتۋىنشا, №16 جۋالى كو­ل­لەدجى جاتاقحاناسىنىڭ عيماراتى تو­زى­عى جەتۋىنە بايلانىستى بىلتىر قا­را­شا ايىندا اۋدان تەڭگەرىمىنە بەرۋ قۇجاتتارى دايىندالىپ, وتكىزۋ-قابىلداۋ اكتىلەرى جاسالعان. بيىل عيماراتقا اۋدان تاراپىنان جوبالىق-سمەتالىق قۇ­جات­تار جاسالىپ, وبلىسقا 2021 جىلعا «جول كارتاسى» باعدارلاماسى اياسىندا قۇرىلىسىن جۇرگىزۋ ۇسىنىلعان. «№2 قا­راتاۋ كوللەدجىنىڭ جاتاقحاناسى بەس قاباتتان تۇرادى. بىراق ونىڭ ءۇشىنشى جانە بەسىنشى قاباتتارى پايدالانىلمايدى. جاتاقحانا قازىرگى تاڭدا 50 ورىنعا ىڭعايلاستىرىلىپ, ەكىنشى قاباتقا ور­نا­لاسقان. كوللەدجدىڭ ۇنەمدەلگەن قارا­جا­تىنان ستۋدەنتتەرگە تاماق دايىندايتىن, جۋىناتىن بولمە جانە اجەتحانا ىسكە قوسىلعان. كەلەسى جىلى №2 قاراتاۋ كوللەدجىن وڭتايلاندىرۋ جۇمىستارى جوس­پارلانىپ وتىر», دەيدى التىناي جايلىشقىزى.

قازىرگىدەي عىلىم مەن ءبىلىمنىڭ دا­مى­عان عاسىرىندا اۋداندارداعى كوللەدج جاتاقحانالارىنا كوڭىل بولىنبەۋى ەستىگەن قۇلاققا ەرسى جاعداي. تالاپقا ساي ەمەس جاتاقحانا «جىرىنىڭ» جامبىل وبلىسىندا جۋىق ارادا بىتەتىن ءتۇرى كو­رىنبەيدى. ونىڭ ۇستىنە, وبلىستاعى مەردىگەر كومپانيالار دا جاتاقحانا قۇ­رى­لىسىن جۇرگىزۋگە ق ۇلىقسىز ەكەن. نە سەبەپتى ولاي ەكەنى وزدەرىنە بولماسا, وزگە­لەرگە بەيمالىم. وسىلايشا بۇگىندە ستۋد­ەنتتەر توزىعى جەتكەن جاتاقحانادا اۋپى­رىمدەپ كۇنەلتۋدە. بۇگىنگى ستۋدەنت, ەر­تەڭگى ماماننىڭ ءالى قانشا ۋاقىت وسىلاي جۇرەتىنى بەلگىسىز...

جامبىل وبلىسى