ءبىلىم • 05 جەلتوقسان، 2020

پاۆلودار كىتاپحاناسىنىڭ بالالار ادەبيەتى بولىمىنە كۇردەلى جوندەۋ جۇرگىزىلدى

138 رەت كورسەتىلدى

س.تورايعىروۆ اتىنداعى پاۆلودار وبلىستىق كىتاپحانانىڭ بالالار ادەبيەتى ءبولىمى (لۋناچارسكي كوشەسى، 9/2 ءۇي) كۇردەلى جوندەۋدەن ءوتىپ، قولدانىسقا قايتا بەرىلدى. قايتا جاڭارتىلعان كىتاپحاناعا ءوڭىر باسشىسى ابىلقايىر سقاقوۆ ارنايى كەلىپ، اتقارىلعان جۇمىسقا وڭ باعا بەردى، دەپ حابارلايدى Egemen.kz.

عيماراتقا كۇردەلى جوندەۋ جۇمىسى «جۇمىسپەن قامتۋ جول كارتاسى» باعدارلاماسى اياسىندا جۇرگىزىلدى. 1969 جىلدان بەرى جوندەلمەگەن عيمارات العاش رەت زاماناۋي ستاندارتقا سايكەستەندىرىلىپ وتىر.

– مەملەكەت كىتاپحانالار مەن باسقا دا الەۋمەتتىك نىسانداردىڭ جاعدايىنا ۇلكەن كوڭىل ءبولىپ كەلەدى. بالالار وقۋ ورتالىعىنىڭ تۇڭعىش پرەزيدەنت كۇنى قارساڭىندا اشىلۋى – ايتۋلى وقيعا. جوندەۋ جۇمىستارىنىڭ ساپالى اتقارىلعانى كوزگە بىردەن كورىنىپ تۇر. پاندەميا اياقتالعان سوڭ بۇل جەردە بالالار الاڭسىز ءبىلىم الاتىن بولادى. جۇمىستى تەز ءارى تياناقتى اتقارعان مەردىگەر كومپانياعا ريزاشىلىق بىلدىرەمىن، – دەدى ابىلقايىر سقاقوۆ.

ايتا كەتەرلىگى، وبلىستىق كىتاپحانانىڭ بالالار ادەبيەتى بولىمىنە قازاقستان جازۋشىلار وداعىنىڭ مۇشەسى، اقىن، بالالار ادەبيەتىنىڭ كورىنەكتى وكىلى، جەرلەسىمىز سۇلەيمەن بايازيتوۆتىڭ ەسىمى بەرىلدى.

– اكەم بالالاردى قاتتى جاقسى كورەتىن. سوندىقتان بولار ونىڭ شىعارماشىلىعىندا بالالار ادەبيەتى ۇلكەن ورىن الدى. بۇگىن وسى ورتالىقتى ارالاپ شىعىپ، كەرەمەت اسەر الدىم. وسى جەردە بالالار الاڭسىز ءبىلىم السا دەيمىن. بۇل تەك كىتاپ وقۋعا ارنالعان ورىن ەمەس، جەتكىنشەكتەردى وتانسۇيگىشتىككە، پاتريوتيزمگە، ادەبيەت الەمىنە تاربيەلەيتىن رۋحاني وردا بولارىنا سەنەمىن. اكەمنىڭ ەڭبەگىن ەلەپ-ەسكەرىپ، قۇرمەت تۇتقان جاندارعا مىڭ العىس، – دەيدى جازۋشىنىڭ ۇلى مۇحيت.

ەلۋ جىلدان استام ۋاقىت جوندەۋ كورمەگەن نىساندا جاس جەتكىنشەكتەردىڭ ءبىلىم الۋىنا، ۋاقىتتارىن ءتيىمدى وتكىزۋىنە بارلىق جاعداي جاسالعان. كىتاپحاننىڭ قىزمەت كورسەتۋ جۇيەسى بىرنەشە ايماققا بولىنگەن. ماسەلەن،  ء«بىلىمپاز» ايماعىندا ابونەمەنت پەن وقۋ زالى بار. بۇل جەردە وقىرماندار ءۇشىن ۇيگە كىتاپ الۋعا نەمەسە وقۋ زالىندا وتىرىپ كىتاپ، گازەت-جۋرنالدار وقۋعا مۇمكىندىك بار. «بالدىرعان» وقۋ ايماعىندا مەكتەپكە دەيىنگى جانە باستاۋىش مەكتەپ جاسىنداعى بالالارعا ارنالعان تانىمدىق ويىندار ايماعى شوعىرلانعان. «وركەن» ۇلتتىق شىعارماشىلىق ايماعىندا بالالاردىڭ وقۋعا دەگەن قىزىعۋشىلىعىن ۇلتتىق سالت-داستۇرلەر ارقىلى دامىتۋعا، شىعارماشىلىققا باۋلۋعا باسىمدىق بەرىلمەك. اتالعان ايماقتا قازاقستان جازۋشىلار وداعىنىڭ پاۆلودار وبلىستىق فيليالى مەن كىتاپحانا ۇجىمى بىرلەسكەن جوبالاردى جۇزەگە اسىرۋدى جوسپارلاۋدا. «IT-بالا» مەديا ايماعى جاس وقىرمانداردى كومپيۋتەرلىك ساۋاتتىلىققا باۋلۋ، اقپاراتتىق مادەنيەتتى قالىپتاستىرۋعا ارنالعان. «زەردە» ينتەللەكتۋالدىق ايماعىندا ءتۇرلى تاقىرىپتارداعى  سەمينارلار، كونفەرەنتسيالار، پرەزەنتاتسيالار، ترەنينگتەر، ويىن-ساۋىق شارالارى وتەتىن بولادى. زاماناۋي تەحنيكالار ارقىلى جاس وقىرماندارعا ءار ءتۇرلى جانرداعى بەينەفيلمدەر كورسەتىلىپ، جاستاردىڭ تانىم كوكجيەگىن كەڭەيتۋگە دەن قويىلماق.

– مەن 6-سىنىپتا وقيمىن. ورتالىقتىڭ جاڭارتىلىپ قايتا اشىلعانىن الەۋمەتتىك جەلى ارقىلى ءبىلىپ، قۋانىپ وتىرمىن. كىتاپحانانىڭ ءىشى جارقىراپ تۇر. كىتاپ وقۋدان شارشاعان ساتتە بوي سەرگىتەتىن ويىن الاڭدارىن دا كورىپ قالدىم. ءوز باسىم كارانتيندىك شەكتەۋلەردىڭ اياقتالعانىن اسىعا كۇتەمىن. كىتاپحانا مەن دوستارىمدى ساعىندىم،– دەيدى جاس وقىرمان ايزات ءالفارابي.

س.تورايعىروۆ اتىنداعى وبلىستىق كىتاپحانانىڭ باسشىسى شولپان شاحمەتوۆا بالالار ادەبيەتى بولىمىندە 86 مىڭنان استام كىتاپ قورى بار ەكەنىن اتاپ ءوتتى. كىتاپحانا قورى ۇنەمى جاڭا كىتاپتارمەن تولىقتىرىلىپ تۇرادى. جىل سايىن ورتا ەسەپپەن 5 مىڭنان استام جاس وقىرمان وسىندا كەلىپ، بوس ۋاقىتىن ءتيىمدى وتكىزۋگە مۇمكىندىك الادى. ءىشى جارىق ءارى جىلى كىتاپحانا تولىقتاي زاماناۋي تەحنيكالىق قۇرالدارمەن جابدىقتالعان. جاڭارتىلعان نىسان بالالار ءۇشىن قىزمەت كورسەتۋگە ساقاداي ساي.  

سوڭعى جاڭالىقتار

ۇقساس جاڭالىقتار