تۇراقتى بىرىنشىلىكتىڭ كەيىنگى بەس ويىنىندا قاتارىنان جەڭىلگەن «بارىس» جانكۇيەرلەردىڭ كوڭىلىنە سەلكەۋ تۇسىرگەن ەدى. سۇرەڭسىز ويىنداردان كەيىن جانكۇيەرلەر الدىندا ءوز ايىبىن جۋىپ-شايۋعا تىرىسقان جەرلەستەرىمىز, مىنە, ەكىنشى ماتچتا دا جەڭىسكە جەتىپ, كورەرمەندەرىن قۋانتۋدا. العاش ماسكەۋدىڭ «سپارتاك» كلۋبىن 2:1 ەسەبىمەن تىزە بۇكتىرسە, كەيىنگى باسەكەدە سوچيدەن كەلگەن قارسىلاستارىنىڭ قاقپاسىنا جاۋاپسىز ەكى شايبا سوقتى.
جەرلەستەرىمىز كەزدەسۋ تاعدىرىن ءبىرىنشى كەزەڭدە-اق شەشىپ تاستادى دەۋگە بولادى. ماتچتىڭ 12-مينۋتىندا ۆيكتور سۆەدبەرگتەن پاس العان رومان ستارچەنكو ەسەپ اشسا, اراعا ءبىر مينۋت سالىپ «بارىستىڭ» شۆەتسيالىق شابۋىلشىسى ياكوب ليليا تابلوداعى كورسەتكىشتى 2:0-گە جەتكىزدى. قالعان ەكى كەزەڭدە قارسىلاستار ءبىر-ءبىرىنىڭ قاقپا كىلتىن تابا المادى. وسىلايشا, «بارىس» قاتارىنان ەكىنشى ويىندا جەڭىسكە جەتتى. ەندى جەرلەستەرىمىز كەلەسى كەزدەسۋىن بۇگىن ءياروسلاۆلدىڭ «لوكوموتيۆ» كلۋبىمەن وتكىزەدى.
