قازاقستان • 03 جەلتوقسان، 2020

اۋتسورسينگ جۇمىسكەرلەرىنىڭ قۇقىقتارى نەگىزگى قىزمەتكەرلەردىكىمەن تەڭەسەدى

25 رەت كورسەتىلدى

سەنات سپيكەرى ماۋلەن اشىمباەۆتىڭ توراعالىعىمەن پالاتا وتىرىسى ءوتتى، دەپ حابارلايدى Egemen.kz پارلامەنت سەناتىنىڭ ءباسپاسوز قىزمەتىنە سىلتەمە جاساپ.

وندا سەنات دەپۋتاتتارى "قازاقستان رەسپۋبليكاسىنىڭ كەيبىر زاڭنامالىق اكتىلەرىنە پەرسونال بەرۋ جونىندەگى قىزمەتتەردى كورسەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭدى ەكى وقىلىمدا قابىلدادى. اتالعان زاڭعا پارلامەنت دەپۋتاتتارى باستاماشى بولدى.

بۇل زاڭ اۋتسورسينگتىك كومپانيا جۇمىسكەرلەرىنىڭ ەڭبەك قۇقىعىن قامتاماسىز ەتۋگە، ولارعا ءوندىرىس كەزىندە العان جاراقاتتارى مەن سوعان بايلانىستى قايتىس بولعان جاعدايدا وتەماقى تولەۋگە جانە الەۋمەتتىك ساقتاندىرۋ جۇيەسىنە قاتىسۋعا مۇمكىندىك بەرەدى. سەناتورلاردىڭ ايتۋىنشا، پەرسونالداردى بەرۋ قىزمەتىنە قاتىستى قۇقىقتىق رەتتەۋدىڭ بولماۋىنا بايلانىستى قارىزدىق ەڭبەك جۇمىسكەرلەرىنىڭ قۇقىقتارىن ورەسكەل بۇزۋعا جول بەرىلگەن. بىردەي لاۋازىمدا جۇمىس ىستەيتىن، اتقاراتىن مىندەتى، بىلىكتىلىگى ءبىر دەڭگەيدەگى جۇمىسكەرلەر كومپانيانىڭ شتاتتىق قىزمەتكەرلەرىنەن ايتارلىقتاي تومەن جالاقى الادى.

ولار سالالىق كەلىسىم شارتتارىمەن قورعالماعان جانە جۇمىستاعى زياندى جاعداي ءۇشىن قوسىمشا تولەمدەر المايدى. ۇجىمدىق كەلىسىمشارتتارعا دا قاتىسپايدى، سوعان سايكەس ەشقانداي الەۋمەتتىك قولداۋمەن قامتاماسىز ەتىلمەيدى. سالانىڭ قىزمەتتىك ءتۇرى بويىنشا الەۋمەتتىك ساقتاندىرۋ جۇيەسىندە ساقتاندىرىلماعاندىقتان جۇمىس بارىسىندا العان جاراقات پەن سوعان بايلانىستى قايتىس بولعان كەزدە دە ءتيىستى دەڭگەيدە قورعالمايدى.

"ەڭبەك ماسەلەسى قاشاندا وتە ماڭىزدى. سوندىقتان بۇل سالانى زاڭمەن قورعاۋ ءۇشىن ءاردايىم ناقتى قادامدار جاسالىپ كەلەدى. سونىڭ ءبىرى – بۇگىن قابىلدانىپ وتىرعان زاڭ"، دەدى ماۋلەن اشىمباەۆ.

وسىعان وراي قازاقستان رەسپۋبليكاسىنىڭ ەڭبەك كودەكسىنە بىرقاتار وزگەرىستەر ەنگىزىلدى. سوعان بايلانىستى اۋتسورسينگتىك كومپانيا جۇمىسكەرلەرىنە ەڭبەكاقى تولەۋ كەزىندە كەمسىتۋشىلىككە تىيىم سالىنادى. سونداي-اق، قوسىمشا جىل سايىنعى تولەنەتىن ەڭبەك دەمالىسى، جوعارىلاتىلعان جالاقى، اۋىر، زياندى جانە قاۋىپتى جۇمىستا ىستەيتىن اۋتسورسينگتىك كومپانيا قىزمەتكەرلەرى ءۇشىن قىسقارتىلعان جۇمىس ۋاقىتى قاراستىرىلعان. ودان بولەك، ازاماتتىق، كاسىپكەرلىك كودەكستەر مەن بىرقاتار زاڭدارعا تۇزەتۋلەر ەنگىزۋ كوزدەلگەن.

سونىمەن قاتار وتىرىس بارىسىندا سەناتورلار "قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى تۋرالى" قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىن قارادى.

بۇل زاڭ جوباسى اكىمشىلىك-اۋماقتىق قۇرىلىس سالاسىنا قاتىستى زاڭنامالاردى جەتىلدىرۋگە ارنالعان. سونداي-اق، زاڭ جوباسى ۇكىمەتكە قالالاردىڭ مارتەبەسىن اۋىلعا وزگەرتۋ ماسەلەسىن قايتا قاراۋ جونىندە ۇسىنىس ەنگىزۋ ءۇشىن وكىلەتتى جانە اتقارۋشى ورگاندارعا قۇزىرەت بەرۋ تەتىكتەرىن قاراستىرادى.

"وسى قۇجات قازاقستاننىڭ اكىمشىلىك-اۋماقتىق قۇرىلىسى تۋرالى زاڭنامانى جەتىلدىرۋگە ارنالعان. الداعى ۋاقىتتا بۇل زاڭ ەلدى مەكەندەردى الەۋمەتتىك-ەكونوميكالىق تۇرعىدان دامىتۋعا جانە تۇرعىنداردىڭ ءومىر ءسۇرۋ ساپاسىن جاقسارتۋعا ىقپال ەتەدى دەپ سەنەمىز"، دەدى سەنات توراعاسى.

سەنات وتىرىسىندا دەپۋتاتتار جوعارعى سوت سۋديالارىن سايلاۋ جانە قىزمەتتەن بوساتۋ تۋرالى ماسەلەنى دە قارادى. قازاقستان رەسپۋبليكاسى پرەزيدەنتىنىڭ ۇسىنۋى بويىنشا ساكەن ابدوللا جانە مادەنيەت وماربەكوۆا جوعارعى سوت سۋديالارى بولىپ سايلاندى. جاڭادان سايلانعان سۋديالار انت بەردى. مەملەكەت باسشىسىنىڭ ۇسىنۋىنا جانە كونستيتۋتسياعا سايكەس سەناتورلار گاحارمان دۇيسەنباەۆتى جوعارعى سوت سۋدياسى قىزمەتىنەن بوساتتى.

وتىرىس بارىسىندا پرەمەر-ءمينيستردىڭ اتىنا ءۇش دەپۋتاتتىق ساۋال جولداندى. اقىلبەك كۇرىشباەۆ ءوز ساۋالىندا ۆەتەريناريا ماسەلەسىن كوتەرسە، سەناتور ايگۇل قاپباروۆا ازاماتتاردىڭ ەلىمىزدىڭ وڭتۇستىگىنەن سولتۇستىگىنە كوشۋىنە قاتىستى وزەكتى جايتتارعا نازار اۋداردى. ال، مۇرات باقتيار ۇلى ۇلتتىق اۋدارما ورتالىعىنىڭ كىتاپ باسۋ جانە اۋدارۋ جۇمىستارى بويىنشا ءسوز قوزعادى.

سوڭعى جاڭالىقتار

بيىل 200 جاڭا مەكتەپ سالىنادى

ءبىلىم • بۇگىن، 14:47

ۇقساس جاڭالىقتار