قىتاي ۇزاق ۋاقىت بويى الەمدەگى كەدەيلەرى كوپ ەلدەردىڭ قاتارىنا كىرىپ كەلگەن-ءدى. سول سەبەپتى ءابسوليۋتتى كەدەيلىكپەن كۇرەسۋ سي تسزينپين ساياساتىنىڭ باستى باعىتتارىنىڭ بىرىنە اينالدى. وسىعان بايلانىستى 2020 جىلدىڭ اياعىنا دەيىن ەلدەگى كەدەيشىلىكپەن كۇرەسىپ, كىرىسى تومەن وتباسى بولمايتىنىنا ۋادە بەرگەن-ءدى. وسى ساياسات اياسىندا سي تسزينپين 2014 جىلى ەلدەگى 832 اۋداننىڭ الەۋمەتتىك جاعدايىن جاقسارتۋعا كىرىستى.
قىتاي باسشىسىنىڭ وسى جىلدى تاڭداۋى بەكەر ەمەس. كەلەر جىلى كوممۋنيستىك پارتيانىڭ قۇرىلعانىنا 100 جىل تولادى. بۇل ايتۋلى داتا كەڭ كولەمدە, جارقىن جەتىستىكتەرمەن اتاپ ءوتىلۋى ءتيىس.
وتكەن دۇيسەنبىدە سينحۋا اگەنتتىگى كەدەي اۋداندار تىزىمىندەگى سوڭعى 9 ايماقتىڭ تۇرمىسى جاقسارعانىن حابارلادى. ولاردىڭ ءبارى گۋيچجوۋ پروۆينتسياسىندا ورنالاسقان. CGTN ارناسى ءوز كەزەگىندە قىتاي مەجەلى مەرزىمنەن ءبىر اي بۇرىن كەدەيشىلىكتەن قۇتىلۋ جوسپارى ورىندالعانىن ايتىپ, جارياعا جار سالدى. سىرتقى ىستەر ءمينيسترىنىڭ وكىلى چجاو ليتسزيان ءباسپاسوز جيىنىندا قىتايدىڭ العا قويعان ماقساتى ورىندالعانىن جەتكىزدى.
Global Times گازەتىنە سۇحبات بەرگەن ساراپشىلاردىڭ ءبىرى كەدەيشىلىكپەن كۇرەستىڭ قانشالىقتى تابىستى اياقتالعانىن ءبىلۋ ءۇشىن ۋاقىت كەرەك ەكەنىن ايتادى. ونىڭ پايىمداۋىنشا, بەيجىڭ بيلىگى كەڭ كولەمدى زەرتتەۋ جۇرگىزۋى ءتيىس. ياعني, ونىڭ قورىتىندىسى 2021 جىلدىڭ ورتاسىنا تامان عانا انىقتالادى. بۇل – بىرىنشىدەن.
ەكىنشىدەن, ماسەلە كەدەيلىك شەگىن انىقتاۋدى ەسەپتەۋگە كەلىپ تىرەلەدى. قىتاي بيلىگى ءابسوليۋتتى كەدەيلىك دەڭگەيىنە جىلدىق تابىسى 2300 يۋانعا جەتپەيتىن تۇرعىنداردى جاتقىزادى. ال الەمدىك بانكتىڭ ەسەپتەۋى بويىنشا جىلدىق تابىسى 700 دوللارعا جەتپەيتىندەر وتە كەدەيلەر تىزىمىنە كىرەدى. ياعني, بەيجىڭ بيلىگى كەدەيلەردى انىقتاۋ ءتاسىلى الەمدىك ستاندارتتان وزگەشە بولىپ تۇر.
جان باسىنا شاققانداعى ۇلتتىق جالپى كىرىستىڭ (GNI) ەل ىشىندەگى ايىرماشىلىعى ۇلكەن. ماسەلەن, بۇكىل ەل بويىنشا بۇل كورسەتكىش 10 410 دوللارعا تەڭ. ال اۋىلدى جەرلەردەگى تۇرعىنداردىڭ جىلدىق ورتاشا تابىسى 2440 دوللاردى قۇرايدى. ايىرماشىلىق وتە ۇلكەن. ءتىپتى ۇلكەن قالالارداعى تۇرعىنداردىڭ تابىسىندا دا ايىرماشىلىق وراسان. ماسەلەن, بەيجىڭ, شانحاي سەكىلدى مەگاپوليستەردىڭ تابىسى اناعۇرلىم ارتىق.
ونىڭ ۇستىنە, قىتاي كەدەيشىلىكتى جەڭگەن كۇننىڭ وزىندە ەلدە تۇرمىسى تومەن وتباسىلار وتە كوپ. قىتاي پرەمەر-ءمينيسترى لي كەتسيان مامىردا 600 ميلليون قىتايلىقتىڭ اي سايىنعى ورتاشا تابىسى 1000 يۋان دەپ مالىمدەگەن. دەمەك, ەل حالقىنىڭ 40 پايىزدان استامىنىڭ تابىسى 150 دوللارعا جەتەر-جەتپەس.
بۇدان بولەك, بەيجىڭ بيلىگىنىڭ كەدەيلىكپەن كۇرەس تاسىلىنە دە سۇراق كوپ. كەيبىر كەدەي اۋدانداردا اۋىل تۇرعىندارىن تۇگەلدەي جاڭا مەكەنگە كوشىرگەن وقيعالار تىركەلگەن. وسىلايشا تۇرمىسى تومەن وڭىرلەردە جاڭا جۇمىس ورنىن اشىپ, جول سالىپ, اۋىز سۋ جەتكىزۋدىڭ ورنىنا حالىقتى جاعدايى جاقسى اۋداندارعا اپارىپ ورنالاستىرعان.
ايتسە دە, قىتاي تاراپى كەدەيشىلىكپەن كۇرەستە قول قۋسىرىپ وتىردى دەۋگە كەلمەس. سي تسزينپين 2014 جىلى ءوز جوسپارىن جاريالاعاننان كەيىن قىرۋار شارۋا اتقارىلدى. بىلتىر 1 ميلليونعا جۋىق تۇرعىنعا تازا اۋىز سۋ جەتكىزىلدى. الىس ەلدى مەكەندەرگە اپاراتىن جاڭا جولدار سالىنىپ, ولاردىڭ ۇزىندىعى 4,2 ميلليون شاقىرىمدى قۇرادى.
ءبىر قىزىعى, قىتايدىڭ بۇقارالىق اقپارات قۇرالدارى كەدەيلىكتى جەڭدىك دەپ قۋانىپ جاتقانىنا قاراماستان, ەلدەگى باستى بيلىك بۇل تۋرالى ءۇنسىز. ساراپشىلار مۇنىڭ باستى سەبەبى كوممۋنيستىك پارتيا العا قويىلعان ماقساتتىڭ قانشالىقتى ناقتى ورىندالعانىنا كوز جەتكىزۋدى كوزدەۋىندە جاتىر دەپ ەسەپتەيدى.
قورىتا ايتقاندا, كەدەيلىكپەن كۇرەستىڭ ناتيجەسى رەسمي تۇردە ايتىلماعانىمەن, كوپ ۇزاماي-اق قىتاي بيلىگى بۇل تۋرالى ارنايى مالىمدەمە جاسايتىنىن بولجاۋ قيىن ەمەس.
