بۇل – شىنايى مەرەكە. ويتكەنى ن.نازارباەۆ - تاۋەلسىزدىك الىپ, الەم ەلدەرى الدىندا ءوزىنىڭ جەكە مەملەكەت رەتىندە مارتەبەسىن ايقىنداعان, كورشىلەرمەن ۇلانعايىر شەكارانى بەلگىلەپ, نارىقتىق ەكونوميكا لەگىندە دامۋ جولىن تاڭداعان قازاقستاننىڭ العاشقى تىزگىنىن قولىنا العان تۇلعا. تۇڭعىشتىڭ اتى - تۇڭعىش, الىپ وداقتان ءبولىنىپ شىققان تاۋەلسىز ەلدىڭ ودان ارعى تاعدىرىنا كوپشىلىك, اسىرەسە كەڭەستىك جۇيەنىڭ كوسەمدەرى كۇدىكپەن قارادى. كۇنى ەرتەڭ-اق وزدىگىنەن ەل بولىپ كەتۋدىڭ قيىندىعىن سەزىنىپ, وداق قاناتىنى ڭاستىنا اقيتىپ ورالادى دەگەن ءۇمىت پەن قىزعانىشتارىن كۇيرەتىپ, «وداقتاس» بولعان وزگە ەلدەرمەن بىرگە قازاقستان دا كەرەگەسىن كەڭگە جايىپ, ۋىعىن نىقتاپ, شاڭىراعىن شالقاق ۇستادى. ىشكى جانە سىرتقى ساياساتتا سارابدال جولىن تاڭداپ, بىرنەشە ەلدەردە ەلشىلىكتەر اشىلدى, اتوم قارۋىنان باس تارتىپ الەم ەلدەرىنە بەيبىتشىلىكتىڭ سارا جولىن ۇسىندى. ەكونوميكالىق الەۋەتكە باسا نازار اۋدارىلىپ, قازاقستاندا بىرنەشە باعىتتا جاڭا تەمىرجول جەلىلەرى مەن اۆتوموبيل جولدارى سالىنىپ, بىرنەشە شەت مەملەكەتتەرگە اۋە رەيستەرى اشىلدى. سونداي-اق اقتاۋ قالاسىنداعى تەڭىز پورتى جاڭعىرتىلىپ, قارقىن-قۋاتى ارتتىرىلدى, زاماناۋي قۇرالدارمەن جابدىقتالىپ, جۇمىس جۇرگىزۋ جۇيەسى جاڭا باعىتتا دامىپ كەلەدى.
حالىقتىڭ ءال-اۋقاتىن ارتتىرۋ پرەزيدەنت نازارىنان تىس قالعان جوق – زەينەتكرەلەر تۇراقتى تۇردە زەينەتاقىلارىنا قول جەتكىزىپ, ستۋدەنتتەر شاكىرتاقىسىن ۇزبەي الىپ تۇردى. جاستار بىرنەشە ءتىل مەڭگەرىپ, شەتەلدەردە وقۋعا مۇمكىندىك السا, كوپ بالالى انالارعا دا ايرىقشا قامقورلىق جاسالدى.
قۇقىققورعاۋ سالاسى ەلباسى ن.نازارباەۆتىڭ قامقورلىق-قولداۋىنا يە بولدى. ويتكەنى, قوعامدىق ءتارتىپتى قامتاماسىز ەتۋ – تۇرعىنداردىڭ قاۋىپسىز ءومىرىنىڭ كەپىلى. ءتارتىپ ساقشىلارى باسپانامەن قامتاماسىز ەتىلىپ, جالاقى ماسەلەسى كۇن تارتىبىنە قويىلدى.
ءبىز بۇگىندە قانداي يگىلىككە قول جەتكىزىپ, قانداي كەمەل كەلەشەكتى جوسپارلاساق, بارلىعىنىڭ باستاۋىندا ەلباسى نۇرسۇلتان ءابىش ۇلىنىڭ كەمەڭگەر باسشىلىعى, بولاشاققا جول سىلتەگەن ساياساتكەرلىك باستاما-شەشىمى تۇر. بۇگىندە ەل اعاسى اتانىپ, حالقىنىڭ ىقىلاسىنا يە بولعان ەلباسى ءالى دە ءوزىنىڭ اقىل-كەڭەسىن, ءبىلىم-بىلىگىن ەل دامۋىنا قوسىپ كەلەدى. كەيبىر كورشى مەملەكەتتەردە ورىن الىپ جاتقان بەي-بەرەكەتسىزدىكتەرگە قاراپ, ءوز ەلىمىزدەگى اۋىزبىرلىككە, ەڭ باستى مۇددە رەتىندە ەل تىنىشتىعىن الدىڭعى ورىنعا قويعان ازاماتتاردىڭ پاراساتىنا ريزا بولاسىڭ.
ەلىمىز دە, ەلباسى دا امان بولىپ, قازاقستاننىڭ كوك تۋى زەڭگىر كوكتە جەلبىرەي بەرسىن.
قانات جارىلعاپوۆ,
ماڭعىستاۋ وبلىسى قاجد باسشىسىنىڭ ورىنباسارى,
ادىلەت پودپولكوۆنيگى
