سەناتور مۇرات باقتيار ۇلى تمد پارلامەنتارالىق اسسامبلەياسىنىڭ الەۋمەتتىك ساياسات جانە ادام قۇقىقتارى جونىندەگى تۇراقتى كوميسسياسىنىڭ وتىرىسىنا قاتىستى.
Covid-19 كوروناۆيرۋس ينفەكتسياسىنىڭ تارالۋىنا قارسى ءىس-قيمىل شارالارى وتىرىستىڭ نەگىزگى تاقىرىپتارىنىڭ ءبىرى بولدى. اتاپ ايتقاندا, تمد-عا قاتىسۋشى مەملەكەتتەردىڭ پارلامەنتارالىق اسسامبلەياسى كەڭەسىنىڭ جانە دۇنيەجۇزىلىك دەنساۋلىق ساقتاۋ ۇيىمىنىڭ ەۋروپالىق وڭىرلىك بيۋروسىنىڭ «Covid-19-عا قارسى ءىس-قيمىلداعى پارلامەنتتەردىڭ ءرولى تۋرالى» بىرلەسكەن مالىمدەمەسىنىڭ جوباسى قارالدى.
«پارلامەنتتەردىڭ Covid-19-عا قارسى تۇرۋداعى ءرولى تۋرالى» بىرلەسكەن مالىمدەمە ۋاقتىلى ءارى قاجەت بولىپ وتىر, ويتكەنى ءبىزدىڭ ەلدەرىمىزدىڭ پارلامەنتتەرى, تمد پارلامەنتارالىق اسسامبلەياسى كەڭەسى, سونداي-اق باسقا ەلدەردىڭ پارلامەنتتەرى مەن پارلامەنتتىك اسسامبلەيالارى ىنتىماقتاسىپ, جاھاندىق پاندەميانى جەڭۋگە كومەكتەسۋى كەرەك», دەدى مۇرات باقتيار ۇلى.
سەناتور سونداي-اق قازاقستاندىق تاراپ وسىعان دەيىن بۇل جوبا بويىنشا ەسكەرتۋلەر مەن ۇسىنىستار جىبەرگەنىن اتاپ ءوتتى. تۇراقتى كوميسسيا تالقىلاۋدان كەيىن قازاقستاندىق پارلامەنتشىلەر جولداعان بارلىق ەسكەرتۋلەردى قابىلدادى.
سەنات دەپۋتاتى نۇرلان قىلىشباەۆ تا تمد-عا قاتىسۋشى مەملەكەتتەردىڭ پارلامەنتارالىق اسسامبلەياسىنىڭ ەكونوميكا جانە قارجى جونىندەگى تۇراقتى كوميسسياسىنىڭ وتىرىسىنا قاتىستى.
وتىرىس جاريا-جەكەمەنشىك ارىپتەستىكتىڭ ءتۇرلى ماسەلەلەرىن رەتتەيتىن قۇجاتتاردى ازىرلەۋدەگى ءۇشىنشى كەزەڭدى اياقتايدى. بۇعان دەيىن تمد پاا Squire Patton Boggs كومپانياسىمەن جانە ەۋروپا قايتا قۇرۋ جانە دامۋ بانكىمەن ىنتىماقتاسا وتىرىپ «جاريا-جەكەمەنشىك ارىپتەستىك تۋرالى» ۇلگىلىك زاڭدى ازىرلەدى جانە تمد-عا قاتىسۋشى مەملەكەتتەردە جاريا-جەكەمەنشىك ارىپتەستىك تەتىكتەرىن دامىتۋ جانە قولدانۋ جونىندەگى ءىس جۇزىندەگى ۇسىنىمداردى دايىنداۋعا كىرىستى.
تمد پارلامەنتارالىق اسسامبلەياسىنىڭ مادەنيەت, اقپارات, تۋريزم جانە سپورت جونىندەگى تۇراقتى كوميسسياسىنىڭ وتىرىسىنا سەناتور دينار نوكەتاەۆا دا قاتىستى.
وتىرىستا تمد-عا قاتىسۋشى مەملەكەتتەردىڭ تسيفرلى دامۋ سالاسىنداعى ىنتىماقتاستىعى تۋرالى ۇسىنىمدار جوباسىن جانە تمد-عا قاتىسۋشى مەملەكەتتەردە باسپا باسىلىمىنىڭ مىندەتتى داناسىن ەلەكتروندى نىساندا بەرۋ ماسەلەسى بويىنشا بىرىڭعاي تاسىلدەردى بەلگىلەۋ جونىندەگى ۇسىنىمداردى ازىرلەۋ, سونداي-اق تۇراقتى كوميسسيانىڭ باسقا دا ماسەلەلەرى تالقىلانادى.
