ايماقتار • 28 قاراشا، 2020

باعدارلاما كومەگىمەن بيزنەس باستادى

38 رەت كورسەتىلدى

قازالى اۋدانىنا قاراستى جانكەنت اۋىلىنىڭ تۇرعىنى شاپاعات ءابدۋالي تىزبەكتى تور شىعارۋدى قولعا الدى. جەكە كاسىپكەر ءوز كاسىبىن باستاپ كەتۋ ءۇشىن مەملەكەتتىك باعدارلامانىڭ كومەگىنە جۇگىنگەن، دەپ حابارلايدى Egemen.kz.

وسىلايشا اۋىل تۇرعىنى 2019 جىلى «ەڭبەك» باعدارلاماسىنىڭ اياسىندا 505 مىڭ تەڭگە قايتارىمسىز گرانت الدى. قازىرگى تاڭدا تىزبەكتى تور شىعارىپ، اۋدان تۇرعىندارىنا ءتيىمدى باعادا ساتۋدا.

بۇل ءىستى جاقىندا باستاعانىنا قاراماستان شاپاعات ءابدۋالي ءوزىنىڭ كاسىبىن ودان ءارى كەڭەيىتكىسى كەلەدى. سەبەبى ساپالى ءارى قولجەتىمدى باعاداعى جەرگىلىكتى ونىمگە سۇرانىس جوعارى. سوندىقتان جەكە كاسىپكەر اۋداندىق كاسىپكەرلىك، ونەركاسىپ جانە تۋريزم بولىمىنە «بيزنەستىڭ جول كارتاسى 2020-2025» باعدارلاماسى ارقىلى 2 ملن تەڭگە قايتارىمسىز گرانت الۋ ءۇشىن جوبا ۇسىنىپ قويدى.

ءبولىم باسشىسى اقتىلەۋ بورىقۇلاقوۆتىڭ ايتۋىنشا، «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى ارقىلى نەسيە الىپ، ءوز كاسىبىن باستاعان قازالىلىقتاردىڭ قاتارى كوبەيگەن. وعان باستى سەبەپ – كاسىبىن باستاپ كەتۋ ءۇشىن الىنعان قارجىنى قايتارۋدىڭ قاجەتى جوق.

– وتكەن جىلمەن سالىستىرعان قايتارىمسىز نەسيە العان جەرلەستەرىمىزدىڭ قاتارى ەداۋىر كوبەيگەن. ماسەلەن، 2019 جىلى 240 ادام عانا نەسيە السا، بيىلعى جىلدىڭ 1 قاراشاسىنا دەيىن 904 تۇرعىن قايتارىمسىز گرانتقا قول جەتكىزدى. الداعى تاعى دا 20 ادام ءوز كاسىبىن باستاۋعا مۇمكىندىك الادى. بۇل جەردە تاعى ءبىر ايتىپ كەتەتىن جايت، وتكەن جىلى بەرىلەتىن قارجى كولەمى 505 مىڭ تەڭگە بولسا، بيىل 555 مىڭ تەڭگەگە كوبەيدى. بۇل ارينە مەملەكەت تاراپىنان اۋىل تۇرعىندارىنا كاسىبىن باستاپ، ودان ءارى وركەندەتۋ ءۇشىن بەرىلگەن ۇلكەن قولداۋ، – دەيدى اۋداندىق كاسىپكەرلىك، ونەركاسىپ جانە تۋريزم ءبولىمىنىڭ باسشىسى اقتىلەۋ تالايلى ۇلى.

سوڭعى جاڭالىقتار

ۇقساس جاڭالىقتار