ايماقتار • 27 قاراشا، 2020

اقتاۋدا ءتۇرلى دياگنوز قويىلعان 17 بالاعا وتا جاسالدى

9 رەت كورسەتىلدى

نۇر-سۇلتان قالاسىنان كەلگەن تانىمال بالالار دارىگەرى ماڭعىستاۋ وبلىستىق بالالار اۋرۋحاناسىنىڭ دارىگەرلەرىنە ارناپ شەبەرلىك ساباعىن وتكىزدى، - دەپ حابارلايدى Egemen.kz

ايتا كەتۋ كەرەك، اعابەك چيكيناەۆ بۇعان دەيىن ليتۆا، پولشا، اقش، گەرمانيا، رەسەي، فرانتسيا، انگليا جانە باسقا ەلدەردە تاعىلىمدامادان وتكەن. ول «بالالارداعى كەۋدە دەفورماتسياسىن ەمدەۋ» تاقىرىبىندا كانديداتتىق قورعاعان. بالالارداعى كەۋدە قۋىسىنىڭ، جامباس بۋىنىنىڭ جانە اياقتىڭ دامۋ اقاۋلارىن ەمدەيتىن بىلىكتى مامان. تۋا بىتكەن جانە جۇرە پايدا بولعان ورتوپەديالىق پاتولوگياسى بار بىرنەشە بالاعا كۇردەلى وتا جاساعان.

دارىگەردىڭ اقتاۋ شاھارىنا كەلۋى ماڭعىستاۋ وبلىستىق كوپبەيىندى بالالار اۋرۋحاناسىنىڭ ديرەكتورى امانبەك جۇمىروۆتىڭ نۇر-سۇلتان قالاسىنداعى N2 كوپبەيىندى اۋرۋحاناسى باسشىلىعىمەن جۇرگىزىلگەن ءساتتى كەلىسسوزدىڭ ارقاسىندا مۇمكىن بولدى.

-بۇل مەنىڭ اقتاۋ قالاسىنا ءبىرىنشى رەت كەلۋىم. ءۇش كۇن ىشىندە بالالار اۋرۋحاناسىنىڭ ماماندارىمەن ءوز تاجىريبەممەن ءبولىستىم. اياق، قول، تسەرەبرالدى سال اۋرۋى سياقتى پاتولوگياسى بار بالالار كوپ ەكەندىگىن جاسىرماۋىمىز كەرەك. بۇگىنگى كۇنى ەڭ اۋىر فورماسى بار اۋرۋلار كوپ كەزدەسەدى. جالپى كەز-كەلگەن اۋرۋدىڭ الدىن-الۋ ماڭىزدى. ول ءۇشىن دارىگەرگە ۋاقىتىندا حابارلاسقان ءجون. اۋرۋحاناعا كەلەتىن بولساق قاجەتتى جابدىقتار دا، بىلىكتى ماماندار دا بار ەكەن. جالپى ءبىز ايماقتارعا ءجيى بارۋعا تىرىسامىز، ويتكەنى كىشكەنتاي ناۋقاستارعا حيرۋرگيالىق وتانى تەگىن جاساۋ مۇمكىندىگى تۋادى. ءبىز ءوز تاجىريبەمىزبەن بولىسۋگە ءاردايىم دايىنبىز، دەدى ول.

اعابەك چيكيناەۆتىڭ ايتۋىنشا، نۇر-سۇلتاندا جىلىنا ماڭعىستاۋ وڭىرىنەن وتا جاساتۋعا باراتىن بالالار شامامەن 17% قۇرايدى. اسىرەسە اقتاۋ قالاسىنان، بەينەۋ جانە ماڭعىستاۋ اۋدانىان كوپ. بۇدان بىلاي ەڭ كۇردەلى وتالاردى وبلىستىق بالالار اۋرۋحاناسىنىڭ بازاسىندا جاساۋعا بولادى جانە ەلورداعا بارۋدىڭ قاجەتى جوق.

ورىندالعان 17 وتادان باسقا 40 بالانىڭ اتا-انالارى اقىسىز كەڭەس الدى. كەلەسى جىلى اعابەك چيكيناەۆ ماڭعىستاۋ وبلىستىق اۋرۋحاناسىندا وسىنداي تاعى 2 شەبەرلىك ساباعىن وتكىزۋدى جوسپارلاپ وتىر. 

ايتا كەتۋ كەرەك، ەلوردالىق دارىگەردىڭ اقتاۋعا جاساعان ساپارى "Exxon Mobil" كومپانياسىنىڭ قارجىلاي قولداۋىنىڭ ناتيجەسىندە مۇمكىن بولدى. اتالمىش مەكەمە بىرنەشە جىلدان بەرى بالالار اۋرۋحاناسىنا جان-جاقتى قولداۋ كورسەتىپ كەلەدى.

 

 

ماڭعىستاۋ وبلىسى

سوڭعى جاڭالىقتار

بيىل 200 جاڭا مەكتەپ سالىنادى

ءبىلىم • بۇگىن، 14:47

ۇقساس جاڭالىقتار