تجم مالىمەتىنشە, وقيعا 26 قاراشادا كەشكى ساعات 20:00 شاماسىندا بولعان. الماتى وبلىسى تجد كەزەكشى پۋلتىنە تالدىقورعان قالاسىنىڭ ەركىن اۋىلى, قازاقستان كوشەسىنىڭ بويىنداعى جەكە تۇرعىن ۇيلەردىڭ بىرىندە شاعىن گاز باللونى (سىيىمدىلىعى 5 ليتر) جارىلدى دەگەن حابارلاما تۇسكەن.
"الدىن الا بولجام بويىنشا, تۇرمىستىق گاز باللونىن جىلىتۋ ءۇشىن پەشتىڭ جانىنا قويۋ جارىلىسقا سەبەپ بولعان", دەدى تجم رەسمي وكىلى تالعات ءۋالي.
وقيعا ورنىندا الماتى وبلىسى تجد 28 قىزمەتكەرى, 8 تەحنيكاسى, 8 جەدەل جاردەم بريگاداسى, پوليتسيا, گاز قىزمەتى جانە جەرگىلىكتى اتقارۋشى ورگانداردىڭ قىزمەتكەرلەرى جۇمىس ىستەدى. سونداي-اق زارداپ شەگۋشىلەردىڭ تۋىستارىنا پسيحولوگيالىق كومەك كورسەتۋ ءۇشىن الماتى وبلىسى تجد-نىڭ ەكى پسيحولوگى جۇمىلدىرىلدى.
"تجم ازاماتتاردان گاز باللوندارىن پايدالانۋ جانە قولدانۋ كەزىندە ساقتىق شارالارىن قاتاڭ ساقتاۋدى سۇرايدى", دەدى ۆەدومستۆو وكىلى.
