بىرەۋدىڭ ادال ەڭبەگىن وڭاي جولمەن پايدالانىپ كەتكىسى كەلگەندەردىڭ ءبىرازى قۇرىقتالعانىمەن, انىقتالماعان جاعدايلار ءالى دە بار. ماسەلەن, وبلىستىق پوليتسيا دەپارتامەنتىنىڭ مالىمەتىنشە, وڭىردە اعىمداعى جىلدىڭ 10 ايىندا 169 مال ۇرلىعى تىركەلگەن. شارۋالاردان 623 باس مال ۇرلانعان. بىراق جەرگىلىكتى پوليتسەيلەردىڭ جەدەل ارەكەتىنىڭ ناتيجەسىندە, 295 باس مال يەلەرىنە قايتارىلىپ, جالپى قۇنى 30 ميلليون تەڭگەدەن استام ماتەريالدىق شىعىن وتەلگەن. الايدا قالعان مالدىڭ قايدا كەتكەنى بەلگىسىز. بۇل ورايدا اۋىلدى جەرلەردە تۇراتىن تۇرعىندار كۇن سۋىتىپ, قار تۇسسە بولدى, مال ۇرلىعىنىڭ كوبەيەتىنىن ايتىپ دابىل قاعۋدا.
بيىلعى قازان ايىندا جۋالى اۋدانىنىڭ تۇرعىنى اۋداندىق پوليتسيا بولىمىنە اۋلاسىنداعى مال قورادان جىلقىسىنىڭ ۇرلانعانى تۋرالى شاعىمدانعان. كەلتىرىلگەن جالپى شىعىن كولەمى 1 ميلليون تەڭگەنى قۇرايدى.
اتالعان دەرەككە قاتىستى جەدەل ىزدەستىرۋ جۇمىستارى جۇرگىزىلىپ, ناتيجەسىندە كۇدىكتى رەتىندە جۋالى اۋدانىنىڭ 54 جاستاعى تۇرعىنى ۇستالعان. بۇل كۇندە ول جاساعان قىلمىسىن تولىعىمەن مويىنداپ, تاراز قالاسىنداعى ۋاقىتشا ۇستاۋ اباقتىسىنا قامالعان. مۇنداي جاعداي قازان ايىندا جۋالى اۋدانىنىڭ شاقپاقاتا اۋىلىندا دا ورىن العان. ۇرلانعان مال يەسىنە 600 مىڭ تەڭگە كولەمىندە شىعىن كەلگەن. الايدا كوپ ۇزاماي ۇرلىقتىڭ ءىزى اشىلىپ, قىلمىسقا قاتىسى بار دەگەن كۇدىكپەن تاراز قالاسىندا تۇراتىن جۋالى اۋدانىنىڭ تۋماسى ۇستالىپ, تاراز قالاسىنداعى №13 تەرگەۋ اباقتىسىنا قاماۋعا الىنعان. سونىمەن قاتار ت.رىسقۇلوۆ اۋدانى جارلىسۋ اۋىلىنىڭ تۇرعىنى تاۋ ەتەگىندەگى جايىلىمنان ءۇش جىلقىسىنىڭ ۇرلانعانىن ايتىپ, پوليتسياعا ارىز جازعان. مۇندا دا ەكى كۇدىكتى ۇستالىپ, ۋاقىتشا ۇستاۋ يزولياتورىنا قامالعان. بۇل كۇندە ۇرلانعان جىلقىلار يەسىنە قايتارىلعان. بۇگىندە مال ۇرلىعى ءوڭىردىڭ بارلىق اۋدان, اۋىلدارىندا بار. بىراق قۇرىقتالعان قىلمىسكەرلەردەن بولەك, ءالى كۇنگە دەيىن ءىزىن جاسىرىپ جۇرگەندەرى قانشاما. ءبىر ءۇيدىڭ بالا-شاعاسىنىڭ اۋزىنان جىرىپ, ءبىر كادەگە دايىنداپ وتىرعان مالىن ءبىر تۇندە ۇپتەپ كەتەتىن ۇرىلاردىڭ قاراسى ازايماي تۇر.
قازىرگى كەزدە وڭىردە مال ۇرلىعىنىڭ الدىن الۋ ماڭىزدى. بۇل ورايدا وبلىستا «مال ۇرىسى» جەدەل الدىن الۋ ءىس-شاراسى ۇيىمداستىرىلعان بولاتىن. ءۇش كۇننىڭ وزىندە وبلىستىڭ پوليتسيا قىزمەتكەرلەرى مال ۇرلىعىنىڭ 16 دەرەگىن اشقان. قابىلدانعان شارالار ناتيجەسىندە يەلەرىنە 72 باس مال قايتارىلعان. بۇل دا وڭىردە مال ۇرلىعىنىڭ ءورشىپ تۇرعانىن كورسەتەدى. جۋىردا عانا ت.رىسقۇلوۆ اۋدانىنان 23 باس ءىرى-قارا مال ۇرلانىپ, ايماق تۇرعىندارىن ءارى-ءسارى كۇيگە تۇسىرگەن بولاتىن. ال سول مالداردى ۇرلاعان بايزاق اۋدانىنىڭ ەكى تۇرعىنى بولىپ شىقتى. سونىمەن قاتار مال ۇرلىعىنا قاتىسى بار 93 ادام, ونىڭ ىشىندە 35 ادامنان تۇراتىن 16 توپ ۇستالعان.
جامبىل وبلىسى
