فوتو: تuranasia.kz
«قازگيدرومەت» دەرەگىنە سايكەس, اۋقىمدى انتيتسيكلون قازاقستان اۋماعىنىڭ كوپ بولىگىندە اشىق ءارى قۇرعاق اۋا رايىن قالىپتاستىرادى. تەك باتىس وڭىرلەردە اتموسفەرالىق فرونتتاردىڭ ىقپالىنان جاڭبىر جاۋىپ, نايزاعاي وينايدى.
رەسپۋبليكا بويىنشا تۇمان ءتۇسىپ, سولتۇستىك پەن ورتالىقتا كوكتايعاق بولادى. سونىمەن قاتار سولتۇستىكتە, وڭتۇستىكتە جانە وڭتۇستىك-شىعىستا جەلدىڭ كۇشەيۋى بولجانىپ وتىر.
تۇركىستان وبلىسىنىڭ سولتۇستىگىندە شاڭدى داۋىل كۇتىلەدى. مۇندا سولتۇستىك-شىعىستان سوققان جەلدىڭ ەكپىنى 23 م/س-قا دەيىن جەتەدى. ال شىمكەنتتە جەلدىڭ جىلدامدىعى 15-20 م/س شاماسىندا بولادى.
اقمولا وبلىسىندا كۇننىڭ جىلىنۋىنا بايلانىستى قار قارقىندى ەرىپ, وزەندەر مەن سۋ ارنالارىنىڭ دەڭگەيى كوتەرىلۋى ىقتيمال. ۇقساس جاعداي پاۆلودار وبلىسىندا دا بايقالادى. سولتۇستىك قازاقستاندا اۋا تەمپەراتۋراسى كۇندىز 7-12°C-قا دەيىن كوتەرىلەدى.
ۇلىتاۋ وبلىسىنىڭ سولتۇستىگى مەن شىعىسىندا, سونداي-اق قاراعاندى وبلىسىنىڭ كەي اۋماقتارىندا تۇمان تۇسەدى.
اتىراۋ وبلىسىندا سولتۇستىك, وڭتۇستىك جانە شىعىس بولىكتەردە جاڭبىر جاۋىپ, نايزاعاي وينايدى. تۇندە جانە تاڭەرتەڭ باتىسىندا تۇمان تۇسەدى. جەلدىڭ ەكپىنى 15-20 م/س-قا دەيىن كۇشەيەدى.
جەتىسۋ وبلىسىندا سولتۇستىك-باتىستان سوققان جەلدىڭ ەكپىنى كەي ۋاقىتتا 30 م/س-تان اسادى, بۇل وڭىردە داۋىلدى جاعداي تۋىنداۋى مۇمكىن.
سونىمەن قاتار 25 ناۋرىزدا اقتوبە, الماتى جانە استانا قالالارىندا اۋا ساپاسىنىڭ ناشارلاۋى كۇتىلەدى. مامانداردىڭ تۇسىندىرۋىنشە, قولايسىز مەتەورولوگيالىق جاعدايلار – تىمىق اۋا رايى, ءالسىز جەل, تۇمان جانە ينۆەرسيا سياقتى فاكتورلاردىڭ اسەرىنەن زياندى زاتتاردىڭ جينالۋى. مۇنداي كەزدە ەلدى مەكەندەردە اۋانىڭ لاستانۋ دەڭگەيى ارتۋى ىقتيمال.
