– 25 قاراشادا دوللار تەڭگەگە قاتىستى بيرجادا ورتا ەسەپپەن 422,90 دەڭگەيىندە ساۋدالاندى. اپتانىڭ باسىنان بەرى ۇلتتىق ۆاليۋتانىڭ باعامى 5 تەڭگەدەن استام نەمەسە 1,2%-عا نىعايدى. تەڭگەنىڭ وڭ سەرپىنى قولايلى سىرتقى كونيۋنكتۋرا, سونداي-اق ەكسپورتتاۋشىلاردىڭ سالىق تولەمدەرىن جۇزەگە اسىرۋ ءۇشىن شەتەل ۆاليۋتاسىن ساتۋى اياسىندا بولىپ جاتىر, – دەدى ول.
ينۆەستورلار كوروناۆيرۋسقا قارسى ازىرلەنىپ جاتقان ۆاكتسينالاردىڭ تيىمدىلىگى تۋرالى حابارلامالاردى وڭ باعالاۋدا, بۇل ەكونوميكالىق بەلسەندىلىكتىڭ تەز قالىپقا كەلۋ ىقتيمالدىعىن ارتتىرادى. سونىمەن قاتار اقش بيلىگىنىڭ د.ترامپ اكىمشىلىگىنەن دج.بايدەنگە رەسمي تۇردە بەرىلۋىنىڭ باستالعانى دا قولايلى احۋال قالىپتاستىردى.
– جەدەل ۆاكتسيناتسيا جانە وتىنعا دەگەن سۇرانىستىڭ تەز قالپىنا كەلۋى مۇناي باعاسىنا جاقسى اسەر ەتتى. Brent-ءتىڭ باعاسى بىرنەشە كۇن قاتارىنان ءوسىپ كەلەدى, ازيا نارىقتارىنداعى بۇگىنگى ساۋدا-ساتتىقتا ناۋرىزدىڭ باسىنان باستاپ العاش رەت باررەل 48 دوللاردان استى. وسىعان وراي نورۆەگيا كرونى مەن كانادا دوللارى سياقتى شيكىزات ەكسپورتتاۋشى ەلدەردىڭ ۆاليۋتالارى اپتانىڭ باسىنان 1,3%-عا جانە تيىسىنشە 0,6%-عا نىعايدى, – دەدى ن.تۇرسىنحانوۆ.
ونىڭ ايتۋىنشا, تەڭگە سىرتقى جانە ىشكى فاكتورلاردىڭ جايلىلىعىنان, ودان قالدى شيكىزات نارىعىنداعى جاعىمدى جاڭالىقتاردىڭ اسەرىنەن, سونداي-اق جەر قويناۋىن پايدالانۋشىلاردان تۇسكەن كولەمدى سالىقتاردىڭ ارقاسىندا نىعايىپ تۇر.
