Nur Otan ەل تاعدىرىنا جاۋاپتى
جيىندا ەلباسى سوڭعى بەس جىل ىشىندە پارتيا ءوزىنىڭ سايلاۋ الدىندا بەرگەن ۋادەلەرىنىڭ باسىم بولىگىن ورىنداعانىن اتاپ ءوتتى. قازاقستاننىڭ تۇڭعىش پرەزيدەنتى سوڭعى ءبىر جىلدىڭ ىشىندە پارتيا جۇمىسىن قايتا جانداندىرۋ باعىتىندا اۋقىمدى جۇيەلى ىستەر اتقارىلعانىنا نازار اۋدارتتى.
«قازاقتا «جۇرە بەرسەڭ, كورە بەرەسىڭ» دەگەن ءسوز بار. مىنەكي, سەزدى قاشىقتان وتكىزۋگە ءماجبۇر بولىپ وتىرمىز. وسىنداي زامانعا تاپ كەلدىك. بۇل دا ءومىرىمىزدىڭ ءبىر بەلەسى رەتىندە ەستە قالادى. امانشىلىق بولسا, الداعى ۋاقىتتا كەزدەسىپ, شۇيىركەلەسىپ, جۇزدەسىپ, قۇشاقتاساتىن بولارمىز. سول كۇنگە تەزىرەك جەتكىزسىن», دەدى سەزد جۇمىسىن اشقان ەلباسى.
بۇدان كەيىن مەملەكەت باسشىسى قاسىم-جومارت توقاەۆقا ءسوز بەرىلدى. ءوز سوزىندە پرەزيدەنت قازاقستان قازىرگى احۋالعا قاراماستان ستراتەگيالىق دامۋ ماقساتتارىن دايەكتى تۇردە ىسكە اسىرعانىن جەتكىزدى.
«پارتيامىزدىڭ كەزەكتەن تىس XX سەزى كۇردەلى ءارى ماڭىزدى كەزەڭدە وتكىزىلىپ وتىر. بۇل – مەملەكەتىمىزدىڭ قوعامدىق-ساياسي ومىرىندەگى ايتۋلى وقيعا. بۇگىندە Nur Otan پارتياسى ەل تاعدىرىنا جاۋاپتى ەڭ باستى ساياسي كۇشكە اينالدى. حالقىمىز بىزگە قاشاندا زور سەنىم ارتادى. اسىرەسە جاھاندىق داعدارىس كەزىندە ەل اماناتىنا ەرەكشە كوڭىل ءبولۋىمىز كەرەك. بۇكىل الەمگە تاراعان پاندەميا قازاقستانعا دا وڭاي تيگەن جوق. مەملەكەت ازاماتتارىمىزدىڭ دەنساۋلىعىن قورعاۋ ءۇشىن بارلىق قاجەتتى شارالاردى قابىلداپ جاتىر», دەدى ق.توقاەۆ.
مەملەكەت باسشىسى پارتيا تاراپىنان حالىققا ۇدايى قولداۋ كورسەتىلىپ كەلە جاتقانىنا توقتالدى. پارتيا بەلسەندىلەرى جانە ەرىكتىلەرى مۇقتاج جانداردان كومەگىن اياماعانىن اتاپ ءوتتى.
«وسىنداي ناقتى جۇمىس پەن جاناشىرلىق بەرەكە-بىرلىگىمىزدى ارتتىرا تۇسەدى. قازاقستان قازىرگى احۋالعا قاراماستان ستراتەگيالىق دامۋ ماقساتتارىن دايەكتى تۇردە ىسكە اسىرادى. بۇل رەتتە ەلباسى ساياساتىنىڭ ساباقتاستىعىن قامتاماسىز ەتۋ – نەگىزگى مىندەتتىڭ ءبىرى. مەن بيىلعى جولداۋىمدا پارتيانىڭ قوعامداعى جەتەكشى ءرولى تۋرالى ايتتىم. ءبىز رەفورمالاردى جۇزەگە اسىرۋ بارىسىندا Nur Otan پارتياسىنىڭ زور الەۋەتىنە سۇيەنەمىز», دەدى ق.توقاەۆ.
ايتا كەتەيىك, مەملەكەت باسشىسى قاسىم-جومارت توقاەۆتىڭ Nur Otan پارتياسىنىڭ كەزەكتەن تىس XX سەزىندە سويلەگەن ءسوزى وسى ماقالادان بولەك, جەكە بەرىلىپ وتىر.
قازاقستاننىڭ تۇڭعىش پرەزيدەنتى مەرەيتويلىق سەزدە سويلەگەن سوزىندە Nur Otan پارتياسى ەلىمىزدەگى ەڭ باستى ساياسي كۇش ەكەنىن اتاپ ءوتتى. پارتيا توراعاسى ەلىمىزدىڭ تاۋەلسىزدىك جىلدارىنداعى نەگىزگى جەتىستىكتەرىنە توقتالدى.
ء«ار پارتيا ءۇشىن سەزد وتكىزۋ – وتە ۇلكەن ماسەلە, وتە ۇلكەن كەزەڭ, وتە ۇلكەن جۇمىس سانالادى. سەزد وتكەن سايىن وتكەنگە قاراپ, قانداي تابىستارعا جەتكەنىمىزدى, حالىق الدىنداعى باعدارلامامىزدىڭ ورىندالۋ بارىسىن قورىتىندىلايمىز. بۇگىندە Nur Otan پارتياسى ەلىمىزدەگى ەڭ باستى ساياسي كۇشكە اينالعانىن كورىپ وتىرمىز. وسى جىلداردىڭ ىشىندە پارتيا ىشكى تۇراقتىلىقتىڭ تىرەگىنە اينالدى. حالىقتىڭ ءال-اۋقاتىن ارتتىرۋ جولىندا ايانباي جۇمىس ىستەدى. مۇنىڭ ءبارى پارتيانىڭ ەل بولاشاعىنا سەنىمى بەرىك ازاماتتاردى بىرىكتىرۋىنىڭ ارقاسىندا مۇمكىن بولدى. 30 جىلدا قانداي قيىنشىلىقتاردان وتسەك تە, ەلىمىز ايتارلىقتاي ءوسىپ-ءوندى, حالىقتىڭ ءال-اۋقاتى جاقساردى. جالپى, وسى جىلداردىڭ ىشىندە باسقا ۇلت ءوسىپ شىقتى. ءبارى كوز الدىمىزدا. از ۋاقىتتىڭ ىشىندە مەملەكەت قۇرىپ, شەكارانى بەكىتىپ, جاڭا استانانىڭ ىرگەسىن قالادىق.
ءىس جۇزىنە كەلەر بولساق, ونىڭ ارتىندا قانشاما اتقارعان ءىس, جۇمىس, قانشاما قيىنشىلىق پەن تارتىس جاتىر. تەك رەسەيمەن اراداعى 7 500 شاقىرىم شەكارانىڭ ءار شاقىرىمىن شەگەندەۋ, ءار اۋىل توڭىرەگىنەن ءوتۋ وتە قيىن بولدى. مىسالى, وزبەكستانمەن شەكارانى شەگەندەگەن كەزدە ءبىر ءۇيدىڭ ءبىر بولمەسى قازاقستاندا, ءبىر بولمەسى وزبەكستاندا قالا جازداعان دا جاعداي كەزىكتى. سونىڭ ءبارىن شەشۋگە تۋرا كەلدى. 14 مىڭ شاقىرىمعا سوزىلعان شەكارامىز تۇڭعىش رەت شەگەندەلىپ, بۇۇ-عا تاپسىردىق. شەكاراسى جوق ەل مەملەكەت ەمەس. شەكاراسىز ەل بولمايدى.
تاعدىردىڭ جازۋىمەن الەمنىڭ ءار قيىرىنا تارىداي شاشىلعان 1 ملن-نان استام قانداسىمىزدى ەلگە قايتاردىق. ول پروتسەسس ءالى توقتاعان جوق. ءالى دە كەلىپ جاتىر. كەلەمىز دەگەن ازاماتتاردىڭ بارلىعىن قازاقستان قۇشاق جايا قارسى الىپ, مۇمكىندىگىنشە كومەكتەسەدى», دەدى تۇڭعىش پرەزيدەنت.
وتىز جىلدا اتقارىلعان شارۋا مول
ەلباسى ءوز سوزىندە ۇزاق جانە قيىن جولدى ءجۇرىپ وتكەنىن ەسكە سالدى. مەملەكەت پەن ءبىرتۇتاس قازاقستاندىق ۇلتتىڭ قالىپتاسۋى وسى ءجۇرىپ وتكەن جولدىڭ ۇلكەن جەتىستىگى سانالادى.
«30 جىل ىشىندە قازاقستان ايتارلىقتاي الەۋمەتتىك جانە ەكونوميكالىق جەتىستىكتەرگە جەتتى. بۇعان, ەڭ الدىمەن, نارىقتىق ەكونوميكاعا كوشۋدىڭ جانە ەلدى جاڭعىرتۋعا باعىتتالعان تۇبەگەيلى رەفورمالاردى جۇزەگە اسىرۋدىڭ ناتيجەسىندە قول جەتكىزدىك. نارىقتىق رەفورمالار, يندۋستريالاندىرۋ جانە شەتەلدەن كەلگەن ينۆەستيتسيا ونىمدىلىكتى ارتتىرۋعا قوزعاۋشى كۇش بولدى. سونداي-اق ەكونوميكالىق ءوسىمدى قامتاماسىز ەتىپ, جاڭا جۇمىس ورىندارىن اشۋعا جانە قوعامنىڭ الەۋمەتتىك ءبولىنىسىن ازايتۋعا مۇمكىندىك بەردى», دەدى ەلباسى.
نۇرسۇلتان نازارباەۆ قازاقستاننىڭ تاۋەلسىزدىك جىلدارىندا ەتنوستىق ارتۇرلىلىكتى ارتىقشىلىققا اينالدىرىپ, ءوزىنىڭ ۇلتتىق بىرەگەي ستاندارتىن قالىپتاستىرعانىن اتاپ ءوتتى. وسى ۇدەرىستەگى نەگىزگى ءرول, ەلباسى اتاپ وتكەندەي, قازاقستان حالقى اسسامبلەياسىنا جۇكتەلگەن.
«ەكونوميكالىق ءوسىم جوعارى بولعان كەزەڭدە قۇرىلعان ۇلتتىق قور قارجى سالاسىنداعى «قاۋىپسىزدىك قالقانىمىزعا» اينالدى. ءبىز 1 400 جاڭا اۋرۋحانا مەن ەمحانا, 1 800 مەكتەپ جانە 900 بالاباقشا سالۋ ارقىلى الەۋمەتتىك ينفراقۇرىلىمدى جاڭارتتىق. «قازاقستان – 2050» ستراتەگياسى اياسىندا ەكونوميكالىق ىنتىماقتاستىق جانە دامۋ ۇيىمى ەلدەرىنىڭ ستاندارتتارىن باسشىلىققا الىپ وتىر», دەدى قازاقستاننىڭ تۇڭعىش پرەزيدەنتى.
ەلباسى Nur Otan پارتياسىنىڭ پاندەميا كەزىندەگى جۇمىسىنا, سونداي-اق پارتيانى قايتا جاڭعىرتۋ ۇدەرىسىنە توقتالدى.
ء«بىزدىڭ پارتيا – باسقارۋ ىسىندە تاجىريبەسى مول جانە بارلىق وڭىردە كادرلىق الەۋەتى زور ەڭ ءىرى ساياسي كۇش. قۇرامىنىڭ ساپاسى بويىنشا Nur Otan بۇكىل قازاقستان قوعامىنىڭ كەسكىنىن كورسەتەدى. سوندىقتان ءبىز الداعى ۋاقىتتا دا مەملەكەتىمىزدىڭ جانە بارشا جۇرتىمىزدىڭ ءال-اۋقاتىن ارتتىرۋ ءۇشىن ەڭبەك ەتۋگە نيەتتىمىز», دەدى قازاقستاننىڭ تۇڭعىش پرەزيدەنتى.
نۇرسۇلتان نازارباەۆ پارتيانىڭ ءاردايىم نەگىزگى ءۇش قاعيدانى باسشىلىققا العانىن جانە الداعى ۋاقىتتا دا سونى ۇستاناتىندىعىن اتاپ ءوتتى. بۇل – جاۋاپكەرشىلىك, جۇدىرىقتاي جۇمىلۋ, ورتاق مۇرات-ماقساتتارعا ادالدىق.
«بۇگىن جاريالانىپ وتىرعان Nur Otan پارتياسىنىڭ باعدارلاماسى – قارجىلىق, ادامي جانە باسقا دا رەسۋرستارمەن قامتاماسىز ەتىلگەن جانە جان-جاقتى تارازىلانعان ءورشىل ماقساتتار مەن مىندەتتەر. باعدارلاما – قولعا العان رەفورمالارىمىزدىڭ زاڭدى جالعاسى. مەن تاۋەلسىزدىك جىلدارى ءاردايىم ناقتى ماقساتتاردى بەلگىلەدىم. سولارعا جەتۋ ءۇشىن ءتۇرلى قيىندىقتى جەڭىپ, ايانباي تەر توگۋ كەرەك دەپ ايتىپ كەلەمىن», دەدى Nur Otan پارتياسىنىڭ توراعاسى.
ەلباسى پارتيانىڭ رەفورما جۇرگىزۋ تاجىريبەسى مول جانە بارلىق جوسپارلاردى جۇزەگە اسىرۋعا ساياسي ەرىك-جىگەرى جەتكىلىكتى ەكەنىن باسا ايتتى.
«پارتيانىڭ جاڭا باعدارلاماسى ورىندالادى. بۇل قۇجات ەلدى ودان ءارى جاڭعىرتۋعا جانە بارلىق قازاقستاندىقتاردىڭ تۇرمىس ساپاسىن جاقسارتۋعا جول اشادى. سايلاۋ ناۋقانىن ويداعىداي وتكىزۋ ءۇشىن پارتيا رەسپۋبليكالىق جانە ايماقتىق شتابتاردىڭ جۇمىسىن ۇيلەسىمدى ۇيىمداستىرۋ قاجەت. كانديداتتار, بەلسەندىلەر, سەنىمدى وكىلدەر بارلىق ايماقتاردى ارالاپ, ءار سايلاۋشىعا جەتۋى كەرەك», دەدى قازاقستاننىڭ تۇڭعىش پرەزيدەنتى.
سونداي-اق ەلباسى كەلەر جىلى قازاقستاننىڭ تاۋەلسىزدىك العانىنا 30 جىل تولاتىنىن اتاپ ءوتىپ, بۇل ماڭىزدى كەزەڭ ەكەنىن ەسكە سالدى.
«پرەزيدەنت قاسىم-جومارت كەمەل ۇلى توقاەۆ سايلاۋالدى باعدارلامانىڭ نەگىزگى باعىتتارىنا توقتالدى. ءبىز ونى تولىق جۇزەگە اسىرۋىمىز كەرەك. باعدارلامانى ورىنداۋ ارقىلى قيىندىقتاردى ەڭسەرىپ قانا قويماي, حالىقتىڭ ءومىر ءسۇرۋ ساپاسىن ارتتىرىپ, ەلىمىزدىڭ تابىستى دامۋىن قامتاماسىز ەتۋگە جول اشۋىمىز قاجەت. كەلەر جىلى ۇلان-بايتاق دالامىزدا تاۋەلسىز مەملەكەت قۇرعانىمىزعا 30 جىل تولادى. بۇل – وتە قاسيەتتى كەزەڭ. اتا-بابامىزدىڭ قانىمەن, انالارىمىزدىڭ تەرىمەن كەلگەن. سوندىقتان قولىمىزعا تۇسكەن وسى تەڭدەسى جوق التىندى الىپ ءجۇرۋ ءبىزدىڭ موينىمىزعا جۇكتەلگەن پارىز.
وتكەن عاسىردا حالقىمىز ءتۇرلى الاپاتتى باستان كەشىردى. ەكىنشى دۇنيەجۇزىلىك سوعىس, زۇلمات اشارشىلىق, ۇلت-ازاتتىق قوزعالىستار, قۋعىن-سۇرگىن جىلدارىندا 4 ملن ادام قىرشىن كەتىپ, 1,5 ملن قازاق بوسقىنعا اينالىپ, شەت مەملەكەتتەرگە باس ساۋعالادى.
بۇل – ۇلتىمىز ءۇشىن اۋىر قاسىرەت. قاي حالىق وسىنداي قاسىرەتتى باسىنان كەشىرگەن ەكەن؟! سوعان قاراماستان, حالقىمىز اتا-بابامىز قالدىرعان جەرىندە ءوزىنىڭ مەملەكەتىن قۇرىپ وتىر. ەلورداسىن ەلدىڭ ورتاسىنا اكەپ ورناتتىق. دۇنيەگە ەلىمىزدى پاش ەتتىك.
«تاعدىردىڭ تەزىنەن, توزاقتىڭ وزىنەن» ءوتىپ, «مىڭ ءولىپ, مىڭ تىرىلگەن», تاۋەلسىزدىكتىڭ ءتاتتى ءدامىن سەزىنگەن حالقىمىزدىڭ ەندى نە ىستەسە دە جولداسى سابىر مەن اقىل عانا بولۋى كەرەك», دەدى نۇرسۇلتان نازارباەۆ.
نۇرسۇلتان نازارباەۆ رەسپۋبليكالىق سايلاۋالدى شتابتىڭ جەتەكشىسى بولۋعا پارتيا توراعاسىنىڭ ءبىرىنشى ورىنباسارى باۋىرجان بايبەكتىڭ كانديداتۋراسىن ۇسىندى.
بۇدان ءارى سەزد جۇمىسىن جۇرگىزۋ Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەككە تاپسىرىلدى. ب.بايبەك 18 قاراشادا وتكەن Nur Otan پارتياسى فراكتسياسىنىڭ وتىرىسىندا «قازاقستان 2021: بىرلىك. تۇراقتىلىق. جاسامپازدىق» سايلاۋالدى باعدارلاماسىنىڭ ورىندالۋى بويىنشا پرەمەر-ءمينيستردىڭ ەسەبى تىڭدالعانىنا توقتالدى. سونىمەن قاتار ساياسي كەڭەس Nur Otan پارتياسىنىڭ جارعىسىنا پرايمەريز وتكىزۋگە جانە پارتيا دوكتريناسىن بۇدان بىلاي ساياسي پلاتفورما دەپ اتاۋعا قاتىستى وزگەرتۋلەر مەن تولىقتىرۋلار داۋىسقا سالىنعانىن جەتكىزدى.
«ەلباسىنىڭ, پارتيا توراعاسى نۇرسۇلتان نازارباەۆتىڭ اتىنا «ەدينايا روسسيا» پارتياسى توراعاسى, رەسەي فەدەراتسياسى قاۋىپسىزدىك كەڭەسى توراعاسىنىڭ ورىنباسارى دميتري مەدۆەدەۆتىڭ, قىتاي كوممۋنيستىك پارتياسى ورتالىق كوميتەتىنىڭ باس حاتشىسى, قىتاي حالىق رەسپۋبليكاسى باسشىسى سي ءتسزينپيننىڭ, تۇركيا پرەزيدەنتى, ادىلەت پارتياسىنىڭ توراعاسى رەدجەپ تايپ ەردوعاننىڭ, جاپونيا پرەمەر-ءمينيسترى يوشيحيدە سۋگەنىڭ جانە ايماقتاعى باسقا دا كوشباسشى پارتيالار اتىنان قۇتتىقتاۋ حاتتار كەلىپ ءتۇستى», دەدى ب.بايبەك.
بيزنەس پەن قوعامدى بايلانىستىراتىن كوپىر
بۇدان كەيىن جارىسسوزگە Nur Otan پارتياسىنىڭ دەلەگاتتارى قاتىسىپ, ءوز پىكىرىمەن ءبولىستى. پارتيانىڭ قاراعاندى وبلىسى ۇلىتاۋ اۋدانى فيليالىنىڭ توراعاسى, وسى اۋداننىڭ اكىمى بەرىك ابدىعالي ۇلى حالقىمىزدىڭ وتە جاۋاپتى كەزەڭدى باستان كەشىپ وتىرعانىن جەتكىزدى.
«الەمگە جايىلعان پاندەميا, ساياسي قايشىلىقتار مەن قارجىلىق قيىندىقتار بەلەڭ الدى. مۇنىڭ ءبارى – ءبىزدىڭ ەلگە دە اسەر ەتەتىنى ءسوزسىز.وسىنداي شاقتا وتىز جىلدىق بەلەستى ەڭسەرگەن تاۋەلسىزدىگىمىزدىڭ تۇعىرىن نىعايتىپ, ماقساتىمىزدى ءبىر ارناعا توعىستىرۋ – الدىمىزدا تۇرعان ەڭ وزەكتى ماسەلە.
قازاق ەلى بۇگىندە – ۇلت پەن ۇلىستىڭ باسىن قوسىپ, ءبىر اتانىڭ بالاسىنداي تاتۋلىق ورناتقان شۋاقتى شاڭىراق. بۇل – شاڭىراقتىڭ دىڭگەگىن كوتەرىپ, ءوز قولىمەن ۋىعىن قاداعان ەلباسىمىزدىڭ ەرەن ەڭبەگى. Nur Otan پارتياسى «قايتا جاندانۋدى» قولعا الىپ, پارتيانىڭ الدىن الا سايلاۋىن وتكىزدى.
اۋداندىق پارتيا فيليالىنىڭ توراعاسى رەتىندە ارنايى وسى پرايمەريزگە قاتىسىپ, وڭىرلىك سايلاۋالدى باعدارلامامىزدى جەرلەستەرىمىزدىڭ الدىندا تالقىلاپ, قورعاپ شىقتىق.
وسى جولى رەسپۋبليكا بويىنشا ءاربىر اۋدان, قالا, وبلىس پارتيا فيليالدارى ءاربىر ايماقتىڭ ەرەكشەلىگىن ەسكەرەتىن 216 وڭىرلىك ارنايى باعدارلاماسىن قابىلداپ, ەل الدىندا سونى ورىنداۋعا مىندەت الدى. پرەزيدەنتىمىز قاسىم-جومارت كەمەل ۇلى تانىستىرعان پارتيانىڭ سايلاۋالدى باعدارلاماسى – وسى قۇجاتتاردىڭ جيىنتىعى دەپ ايتۋعا ابدەن بولادى.
مەملەكەت باسشىسىنىڭ جاقىندا عانا جاريالاعان جولداۋىنداعى رەفورمالارعا نەگىزدەلگەن كەسەك-كەسەك باعىتتاردان تۇراتىن بۇل قۇجات – ىسكە اسىرۋعا ىڭعايلى, بارلىق شىعىندارى ەسەپتەلگەن ناقتى باعدار. ماڭىزدىسى, قاراپايىم ازاماتتاردى مەملەكەتتىك دەڭگەيدەگى شەشىم قابىلداۋعا جانە ولاردى جۇزەگە اسىرۋعا ارالاستىرۋ كوزدەلگەن.
«حالىق ۇنىنە قۇلاق اساتىن مەملەكەت» تۇجىرىمداماسى اياسىندا Nur Otannyń «تىكەلەي بايلانىستىڭ» جاڭا فورماتتارىن ەنگىزىپ جاتقانى قۋانتادى. بۇل, ءبىر جاعىنان, قوعامنىڭ جاۋاپكەرشىلىگىن ارتتىرسا, ەكىنشى جاعىنان, سىبايلاس جەمقورلىقتىڭ الدىن الۋعا ىقپال ەتەدى.
اۋىلدىڭ تۇرعىنى رەتىندە باعدارلامادا «اۋقاتتى اۋىلدار» ءبولىمنىڭ بولعانى قاتتى قۋانتادى. ويتكەنى اۋىل – ۇلتىمىزدىڭ بەرەكەسى. اۋىلدىڭ ءومىر ساپاسىن جاقسارتۋ – ەڭ الدىمەن حالىقتىڭ ءوزى ءجيى كوتەرەتىن گاز, اۋىز سۋ, جول, ينتەرنەت پەن موبيلدىك تەلەفون بايلانىسى ماسەلەلەرىن شەشۋ. وسىنىڭ بارىمەن اۋىلداردى جاقىن ارادا قامتۋ باعدارلامادا ناقتى قاراستىرىلعان.
ءدال وسىنداي شەشىمدەر ەكونوميكامىزدىڭ باسقا باعىتتارىنا دا ارنالعان. بۇلاردى ويداعىداي ىسكە اسىرۋعا پرەزيدەنت جانىنداعى جوعارعى ەكونوميكالىق كەڭەس, جاقىندا قۇرىلعان ستراتەگيالىق جوسپارلاۋ جانە باسەكەلەستىك اگەنتتىكتەرى سياقتى ناقتى تەتىكتەرى ۇلكەن سەپ بولادى دەپ سەنەمىز», دەدى ب.ابدىعالي ۇلى.
سونداي-اق جيىن بارىسىندا الماتى وبلىسى جامبىل اۋدانىنا وتكەن پرايمەريز جەڭىمپازى, بەلگىلى جۋرناليست, 9 بالانىڭ اناسى ءاليا ابسەمەتوۆا ءسوز سويلەدى.
«بۇگىنگى سەزدە سىزدەردىڭ الدىڭىزدا ءسوز سويلەۋ مەن ءۇشىن زور قۋانىش. مەن – كوپبالالى انامىن, ءجۋرناليسپىن ءارى ۆولونتەرمىن. الماتى وبلىسىنىڭ قارعالى اۋىلىنان وسىناۋ ۇلكەن مىنبەرگە پرايمەريز ارقىلى كەلىپ وتىرمىن.
سوڭعى ءۇش اي مەن ءۇشىن ۇلكەن قاربالاسپەن ءوتتى. ءوزىم تۇراتىن اۋدانداعى 24 اۋىلدىق وكرۋگتى تۇگەل ارالاپ, تۇرعىندارمەن كەزدەستىم. ولارعا پارتيامىزدىڭ باعدارلاماسىن ءتۇسىندىردىم, اماناتتارىن جينادىم. دەبات كەزىندە پارتيانىڭ سايلاۋالدى باعدارلاماسىن جان-جاقتى تالداپ, ايتىپ بەردىم. وسىنىڭ ارقاسىندا ءۇش كەزەڭنەن دە سۇرىنبەي ءوتتىم. مەنىڭشە, جاڭا عانا پرەزيدەنتىمىز ۇسىنعان پارتيانىڭ باعدارلاماسىندا ايتىلعان «بارشاعا تەڭ مۇمكىندىك بەرۋ» دەگەن وسى.
باعدارلاماداعى «ايەلدەردىڭ باسشىلىق ورىندارداعى ۇلەسى 30 پايىزعا جەتەدى» دەگەن ماقساتتىڭ ورىندالاتىنا تولىق سەنەمىن. سوزىنە قاشاندا ءىسى ساي Nur Otan پارتياسى ءۇشىن قازاقستاندىق ايەلدەردىڭ قوعامداعى ءرولى كۇشەيگەنى وتە ماڭىزدى», دەدى ءا. ابسەمەتوۆا.
بۇدان كەيىن ءسوز كەزەگى Nur Otan پارتياسى ساياسي كەڭەسىنىڭ مۇشەسى, «اتامەكەن» ۇلتتىق كاسىپكەرلەر پالاتاسى باسقارما توراعاسى ابىلاي مىرزاحمەتوۆكە بەرىلدى.
«ەلباسى جەتەكشىلىك ەتەتىن پارتيا بيزنەس پەن قوعام اراسىنداعى بايلانىستىرۋشى كوپىرگە اينالدى. قازىرگىدەي داعدارىستى كەزەڭدە بيزنەس وكىلدەرىنە ەڭ اۋەلى تۇراقتىلىق پەن ەرتەڭگى كۇنگە دەگەن سەنىم قاجەت. ونى ءبىزدىڭ Nur Otan پارتياسى عانا بەرە الادى.
جاڭا عانا مەملەكەت باسشىسى قاسىم-جومارت كەمەل ۇلىنىڭ بايانداماسىندا ايتىلعانداي, پارتيانىڭ باعدارلاماسىندا شاعىن نەسيەلەر سانىن ۇلعايتۋ, سالىقتار سانىن قىسقارتۋ, سالىق سالۋدا تسيفرلى تەحنولوگيالاردى ەنگىزۋ سياقتى كوپتەگەن ۇسىنىستار بار. مۇنىڭ ءبارى ەلدەگى شاعىن جانە ورتا بيزنەستى ودان ءارى دامىتۋعا, ياعني ۇلتتىق ەكونوميكانى كۇشەيتۋگە مۇمكىندىك بەرەتىنى ءسوزسىز.
نۇرسۇلتان ءابىش ۇلى, ءسىز جۇرگىزگەن رەفورمالاردىڭ ناتيجەسىندە, ەلىمىزدە ىسكەرلىكتىڭ وركەندەۋىنە بارلىق جاعداي جاسالدى. ءبىز نارىقتىق ەكونوميكاعا كوشتىك, وتاندىق كاسىپكەرلىكتىڭ تۇتاس بۋىنى قالىپتاستى, جاڭا ءوندىرىس ورىندارى اشىلىپ, يندۋستريالاندىرۋ باعدارلاماسى, بيزنەستىڭ جول كارتاسى سياقتى ماڭىزدى قۇجاتتار قابىلداندى.
وسى جىلدارى ەل ەكونوميكاسىنا 330 ملرد دوللار تىكەلەي ينۆەستيتسيا قۇيىلعان. ءسىزدىڭ باستاماڭىزبەن قازاقستاندىق بيزنەستى بىرىكتىرگەن «اتامەكەن» ۇلتتىق كاسىپكەرلىك پالاتاسى قۇرىلدى», دەدى ا.مىرزاحمەتوۆ.
جيىن بارىسىندا پەتروپاۆل قالاسىندا وتكەن پرايمەريزدىڭ جەڭىمپازى, حالىقارالىق دارەجەدەگى سپورت شەبەرى, جەڭىل اتلەتيكادان ازيا چەمپيونى يرينا ەكتوۆا دا ءوز پىكىرىمەن ءبولىستى.
«دوستارىممەن بىرگە Biz Birgemiz اكتسياسىنا قاتىستىم. ءبىز ۆولونتەر بولىپ, قالامىزداعى جۇزدەگەن وتباسىنا باردىق. ازىق-ت ۇلىك جەتكىزىپ, ىستىق تاماق تاسىدىق. وسىنداي يگى ىستەر ارقىلى پارتيا ادامدارعا جاقىنداي ءتۇستى.
مەن – Jas Otannyń بەلسەندىسىمىن, بىراق ساياساتقا جاقىندا عانا قىزىعۋشىلىق تانىتا باستادىم. ءوز ەلىمە دەپۋتات رەتىندە پايدا اكەلگىم كەلەدى. سوندىقتان پرايمەريزگە قاتىسىپ, كۇشىمدى سىناپ كورەمىن دەپ شەشتىم. بۇل مەن ءۇشىن ناعىز جارىس.
ناتيجەسىندە, پەتروپاۆل قالاسى بويىنشا ايەلدەر مەن جاستار اراسىندا ءبىرىنشى ورىن الدىم. ماعان سەنىپ, داۋىس بەرگەندەردىڭ بارلىعىنا راحمەت ايتقىم كەلەدى», دەدى ي.ەكتوۆا.
سونىمەن قاتار سەزدە بەلگىلى ايتىسكەر اقىن مۇحتار نيازوۆ تا ءسوز سويلەپ, Nur Otan بوس سوزگە ەمەس, ءىس تىندىرۋعا ۇمتىلاتىن پارتيا ەكەنىن جەتكىزدى.
«قازاق دەگەن ىرىمشىل حالىقتىڭ بالاسىمىن عوي, وسىنى جاقسىلىققا بالاپ, كوڭىلدەگى كوركەم ويدى اقتارسام دەيمىن. تاۋەلسىزدىك العان جىلدارى مەن مەكتەپ تابالدىرىعىن ەندى اتتاعان بالا ەدىم. كوك بايراقتىڭ استىندا ءوسىپ-جەتىلگەنىمدى جاڭا ءداۋىردىڭ ۇرپاعى ەكەنىمدى ماقتانىش ەتەم!
بۇگىندە ءبىزدىڭ قازاقستان – ءتورت قۇبىلاسى تەڭ, ىرىسى تولىق, بىرلىگى مىعىم ەل. وسى جىلدارداعى ولجامىزدى تۇگەندەسەك, ۇلان-عايىر جەرىمىزدىڭ شەكاراسىن شەگەلەدىك. ارقانىڭ توسىنە استانامىزدى سالدىق. توقسانىنشى جىلدارى حالىقتىڭ ۇشتەن ءبىرى عانا بولعان قازاقتىڭ سانى بۇگىندە 70 پايىزدان استى. از جىلدا باسقا ەلدەرمەن تەرەزەمىز تەڭەستى. ءتول مادەنيەتىمىز بەن ۇلتتىق ونەرىمىزدىڭ قۇرمەتى ءوستى», دەدى م.نيازوۆ.
ايتىسكەر اقىن ءوز سوزىندە جىل سايىن پارتيانىڭ قولداۋىمەن «التىن دومبىرا» رەسپۋبليكالىق ايتىسى, ەل ىشىندە ءارتۇرلى رەسپۋبليكالىق جانە ايماقتىق ايتىستار وتەتىنىنە نازار اۋداردى.
«بيىل تۇڭعىش رەت وتكەن پارتيانىڭ الدىن-الا سايلاۋى – پرايمەريزدى مەن ايتىسقا ۇقساتامىن. ەل اۋماعىندا وتكەن ايتىس-دەباتتاردى ءدۇيىم جۇرت تاماشالادى. پىكىرتالاستار اشىق جانە ءادىل ءوتتى. بەلگىلى ايتىسكەر اعالارىمىز – ارقانىڭ سال-سەرىسى امانجول التاەۆ پەن ايتىستىڭ اقتاڭگەرى ايبەك قاليەۆ ساياسي دودادا جۇزدەن جۇيرىك شىعىپ, جەڭىسكە جەتتى.
Nur Otan وسىلايشا تىڭنان تۇرەن سالىپ, كوزى اشىق, كوكىرەگى وياۋ ازاماتتاردى قوعامدىق ىستەرگە تارتىپ, ەل ساياساتىنا ارالاسۋعا ۇيىستىرىپ ءجۇر. سوڭعى جارتى جىلدا بارلىق ايماقتا پارتيانىڭ وڭىرلىك باعدارلامالارى تالقىلاندى, حالىق سۇزگىسىنەن ءوتتى. مەن دە قىزىلوردا قالاسىنىڭ جانە وبلىستىڭ باعدارلاماسىن دايىنداۋعا ءۇن قوستىم. بىردە-ءبىر پارتيا ءدال وسىنداي حالىقتىق تالقىلاۋدان وتكەن, ءار اۋىل, ءار ايماقتىڭ ماسەلەسىن شەشۋدى كوزدەگەن 216 باعدارلاما جاساعان ەمەس», دەدى م.نيازوۆ.
سونىمەن قاتار ول پارتيانىڭ رەسپۋبليكالىق باعدارلاماسى ءوزىنىڭ كەشەندىلىگىمەن, ناقتى ازاماتتارعا ارنالعاندىعىمەن وزگەشە دەپ ەسەپتەيتىنىن جەتكىزدى.
«حالىقتىڭ مۇددەسىن تۇگەندەيتىن, قوعامنىڭ تالاپ-تىلەكتەرىن ەسكەرگەن قۇجات بۇل. ونىڭ ىشىندە مادەنيەتى بيىك, ويى وزىق قوعام قۇرۋعا ارنالعان بولىگى كوڭىلىمنەن شىقتى. Nur Otan اقىن-جازۋشىلاردى, دراماتۋرگ-ستسەناريستەردى, شىعارماشىلىق تۇلعالاردى قولدايدى. ياعني حالىقتىڭ ار-ۇجدانىن ويلايدى. ۇلتتىق تاريح پەن مادەنيەتتى قاستەرلەپ, كينو, مۇراجاي مەن كىتاپحانالارعا قامقورلىق جاسايدى. مۇنىڭ ءبارى پارتيا باعدارلاماسىندا تايعا تاڭبا باسقانداي انىق جازىلعان.
راس, الداعى بەس جىلدىڭ جۇگى اۋىر. ءبىر قازان ءسۇتتىڭ ءبىر قاسىق ۇيتقىسى بولادى. Nur Otan بوس سوزگە ەمەس, ءىس تىندىرۋعا ۇمتىلاتىن پارتيا! ءاردايىم جابىرقاعاننىڭ جانىنان تابىلىپ, جاردەم بەرىپ كەلەدى. سوندىقتان ەلدىڭ تىنىشتىعى مەن بەرەكەسىن ويلاعان ازاماتتار ەلباسى مەن مەملەكەت باسشىسىنىڭ ساياساتىن, پارتيانىڭ باعىتىن قولدايدى. جاماندىقتى اماندىق جەڭەدى, تاتۋ ەلگە تاقسىرەت جۋىمايدى», دەدى م.نيازوۆ.
كانديداتتار ءتىزىمى بەكىتىلدى
سەزد بارىسىندا ءماجىلىس سايلاۋىنا Nur Otannyń پارتيالىق ءتىزىمى بەكىتىلدى. تىزىمدە 126 كانديدات بار. ولاردىڭ ىشىندە 77 كانديدات پارتياىشىلىك پرايمەريز قورىتىندىسى, ال 49 ادام ورتالىق پارتيالىق كۆوتا بويىنشا انىقتالدى.
كانديداتتاردىڭ جالپى تىزىمىندە پارلامەنت ءماجىلىسىنىڭ قىزمەتتەگى دەپۋتاتتارى 20 پايىزدان اسپايدى. مەملەكەتتىك باسقارۋ سالاسىنىڭ وكىلدەرى – 13 پايىز, ءبىلىم جانە دەنساۋلىق ساقتاۋ سالاسى – 12 پايىز, ۇكىمەتتىك ەمەس ۇيىمدار – 9 پايىز جانە ونەركاسىپ وكىلدەرى 8 پايىزدى قۇرادى.
سونداي-اق تىزىمدەگى ەكونوميستەر ۇلەسى – 28 پايىز, زاڭگەرلەر – 20 پايىز, كاسىپكەرلەر – 17 پايىز. ال 21 ۇمىتكەردىڭ عىلىمي دارەجەسى بار, ونىڭ ىشىندە 10-ى – عىلىم دوكتورى, 11-ءى – عىلىم كانديداتى. تىزىمدەگى كانديداتتاردىڭ ۇشتەن ءبىرى – ايەلدەر. كانديداتتاردىڭ ورتاشا جاسى بۇرىنعى پارتيالىق تىزىمدەرمەن سالىستىرعاندا 4 جىلعا تومەندەپ, 48 جاسقا جەتتى.
ەسكە سالا كەتەيىك, Nur Otan پارتياسىنىڭ پرايمەريزىنە 10 مىڭنان استام كانديدات, ال رەسپۋبليكالىق ونلاين-داۋىس بەرۋگە 662 مىڭنان اسا ادام نەمەسە بارلىق نۇروتاندىقتاردىڭ 84 پايىزى قاتىستى.
ونىڭ قورىتىندىسى بويىنشا 6 253 ادام Nur Otannyń بارلىق دەڭگەيدەگى 216 ماسليحاتقا ارنالعان پارتيالىق تىزىمىنە ەندى. تالداۋ كورسەتكەندەي, وڭىرلىك پارتيالىق تىزىمدەردە ايەلدەردىڭ ۇلەس سانى 22-دەن 34 پايىزعا دەيىن, جاستار – 3,5 ەسە, 7-دەن 24 پايىزعا دەيىن ارتتى. ورتاشا جاسى ءماسليحاتتاردىڭ قىزمەتتەگى قۇرامىمەن سالىستىرعاندا 7 جاسقا – 51-دەن 44-كە دەيىن جاساردى. پارتيالىق تىزىمدەردىڭ 24 پايىزىن ءماسليحاتتاردىڭ قىزمەتتەگى دەپۋتاتتارى قۇرايدى, ال 76 پايىزى – جاڭا تۇلعالار.
بۇل رەتتە پارتياعا 42 مىڭنان اسا جاڭا مۇشە قوسىلدى. ولاردىڭ 1000-نان استامى پارتياىشىلىك سايلاۋعا قاتىسىپ, ءاربىر ءۇشىنشىسى Nur Otannyń پارتيالىق تىزىمىنە ەندى.
حالىقتىڭ بەلسەندى قاتىسۋىنىڭ ارقاسىندا پرايمەريز بارىسىندا Nur Otan پارتياسىنىڭ 216 وڭىرلىك سايلاۋالدى باعدارلاماسى تالقىلانىپ, قابىلداندى. وندا ازاماتتاردان تۇسكەن 17 مىڭنان استام ۇسىنىس ەسكەرىلدى.
