ساياسات • 25 قاراشا، 2020

بەيجىڭدە يندۋستريالىق-ينۆەستيتسيالىق ىنتىماقتاستىق تۋرالى تالقىلاندى

10 رەت كورسەتىلدى

بەيجىڭدە "12th China Overseas Investment Fair" شەڭبەرىندە يندۋستريالىق-ينۆەستيتسيالىق ىنتىماقتاستىقتىڭ ءۇشىنشى قازاقستان-قىتاي فورۋمى ءوتتى. ءىس-شارانى "China Overseas Development Association" جانە "KAZAKH INVEST" ۇك" اق ۇيىمداستىردى، دەپ حابارلايدى Egemen.kz

ءىس-شاراعا 200-دەن استام قازاقستاندىق جانە قىتايلىق مەملەكەتتىك جانە كۆازيمەملەكەتتىك ورگانداردىڭ وكىلدەرى، سونداي-اق ەكى ەلدىڭ بيزنەس-قوعامداستىعىنىڭ مۇشەلەرى قاتىستى.

فورۋمدى اشقان قر سىرتقى ىستەر ءمينيسترىنىڭ ورىنباسارى الماس ايداروۆ بۇگىنگى تاڭدا ەكى ەل اراسىنداعى ساۋدا-ەكونوميكالىق جانە ينۆەستيتسيالىق قاتىناستاردىڭ قارقىندى دامىپ كەلە جاتقانىن اتاپ ءوتتى. پاندەميانىڭ قازاقستان ەكونوميكاسىنا تەرىس اسەرىن ازايتۋ ماقساتىندا ەل باسشىلىعى جاڭا ينۆەستيتسيالىق قۇرالدار قۇرۋ تۋرالى شەشىم قابىلدادى. سونداي-اق، مەملەكەت باسشىسى ينۆەستيتسيالىق تارتىمدىلىقتى ارتتىرۋعا، مەملەكەتتىك ساياساتتاردىڭ ترانسپارەنتتىلىگى مەن بولجامدىلىعىن قامتاماسىز ەتۋگە باعىتتالعان ەلەۋلى وزگەرىستەر مەن رەفورمالاردىڭ قاجەتتىگىن اتاپ ءوتتى.

"قازىرگى ۋاقىتتا پرەزيدەنت قاسىم-جومارت توقاەۆتىڭ تاپسىرماسى بويىنشا ستراتەگيالىق ينۆەستيتسيالىق كەلىسىم تۇرىندە ءىرى ينۆەستورلاردى قولداۋدىڭ قوسىمشا قۇرالىن ەنگىزۋ بويىنشا جۇمىستار جۇرگىزىلۋدە. وسى كەلىسىم ينۆەستورلارعا سالىقتىق پرەفەرەنتسيالار، جەڭىلدىكتى قارجىلاندىرۋ، مەملەكەت تاراپىنان كەپىلدىك بەرىلگەن ساتىپ الۋ، سونداي-اق ەكسپورتتىق قولداۋ تۇرىندە مەملەكەتتىك قولداۋ شارالارىنىڭ كەشەندى پاكەتىن ۇسىنادى. زاڭناما تۇراقتىلىعىنىڭ كەپىلدىكتەرى مەن سالالىق پرەفەرەنتسيالاردىڭ بولۋىن اتاپ ءوتۋ ماڭىزدى"، دەدى ا.ايداروۆ.

پاندەميا جاعدايىندا جۇمىستاردى قايتا باستاۋعا جانە قر مەن قحر اراسىنداعى ينۆەستيتسيالىق ىنتىماقتاستىق الەۋەتىنە ارنالعان پانەلدىك سەسسيا شەڭبەرىندە قازاقستاننىڭ ينۆەستيتسيالىق مۇمكىندىكتەرىنىڭ تۇساۋكەسەرىن "KAZAKH INVEST" ۇك" اق باسقارما توراعاسى باۋىرجان سارتباەۆ جاسادى.

"پاندەمياعا قاراماستان ءبىز جۇمىس فورماتىن ۋاقىتىلى قايتا قۇرا الدىق. پاندەميا شىڭى كەزەڭىندە ينۆەستورلاردىڭ ىسكەرلىك بەلسەندىلىگىنىڭ تومەندەۋىنە بايلانىستى ءبىز جۇمىستىڭ فوكۋسىن جوعارى پىسىقتالعان جوبالاردى قولداۋعا باعىتتادىق. قۇرىلىس-مونتاج جۇمىستارىن باستاۋ، شەتەلدەن زاماناۋي جابدىقتاردى اكەلۋ، سونداي-اق جۇمىس ىستەپ تۇرعان كاسىپورىنداردىڭ جۇمىسىن قايتا باستاۋ ماسەلەلەرى جەدەل شەشىلدى. زاماناۋي تسيفرلىق تەحنولوگيالاردىڭ كومەگىمەن زاۋىتتى قاشىقتىقتان ىسكە قوسۋ-جوندەۋ جۇمىستارىن جۇرگىزۋدىڭ العىشارتتارى بار. بۇگىندە KAZAKH INVEST شەتەلدىك بيزنەسپەن قارقىندى بايلانىس ورناتىپ وتىر. جوبالارمەن جۇمىس ىستەيتىن كومپانيالارمەن ۇنەمى بەينەكونفەرەنتسيالار وتكىزىلىپ تۇرادى. سونىمەن قاتار، ءبىز سۇرانىستاردىڭ بارلىق تۇرلەرى ءۇشىن 24/7 جەدەل جەلىسىن ەنگىزدىك"، دەپ اتاپ ءوتتى ب. سارتباەۆ

سونىمەن قاتار، احقو-نىڭ قحر-داعى وكىلى ت.ماليكوۆ قاتىسۋشىلارعا احقو الاڭى ۇسىناتىن قر مەن ورتالىق ازيادا بيزنەس جۇرگىزۋدىڭ بىرەگەي شارتتارىن تانىستىردى.

سونداي-اق فورۋمدا "China Overseas Development Association" پرەزيدەنتى حۋ ۆەيپين، قحر دامۋ جانە رەفورمالار جونىندەگى مەملەكەتتىك كوميتەتىنىڭ شەتەلدىك ينۆەستيتسيالار دەپارتامەنتى ديرەكتورىنىڭ ورىنباسارى چجەن چجيپين، China Power International Holding، China Tianchen Engineering Corporation، Universal Energy، China International Investment Management Consulting، General China Insurance، PICC، China Credit Insurance، China Nonferrous Metal، Gezhouba Overseas investment كومپانيالاردىڭ باسشىلارى ءسوز سويلەدى.

ءىس-شارا بارىسىندا پاندەميا كەزەڭىندە ينۆەستيتسيالىق جوبالاردى ىسكە اسىرۋ بويىنشا ءوزارا ءىس-قيمىل ماسەلەلەرى، ينۆەستيتسيالىق ىنتىماقتاستىقتىڭ پەرسپەكتيۆالارى، قازىرگى ۋاقىتتا بىرلەسكەن ينۆەستيتسيالىق جوبالاردى ىسكە اسىرۋ كەزىندە ەكى ەلدىڭ كومپانيالارى تاپ بولۋى مۇمكىن تاۋەكەلدەر جانە ولاردى ەڭسەرۋ جولدارى تالقىلاندى.

ايتا كەتۋ كەرەك، بۇگىنگى تاڭدا 25 مىڭنان استام جۇمىس ورنىن قۇرا وتىرىپ، $24،7 ملرد سوماسىنا قازاقستان-قىتاي جوبالارى ءارتۇرلى پىسىقتاۋ ساتىسىندا تۇر. $4 ملرد-قا 16 جوبا ىسكە اسىرىلدى. ولاردىڭ قاتارىندا اۆتوموبيلدەر مەن ەلەكتروكارلار ءوندىرىسى، راپس مايىن ءوندىرۋ جانە جالپى قۋاتتىلىعى 180 مۆت بولاتىن 3 كۇن ەلەكتر ستانتسياسى بار. سونىمەن قاتار، كەلەسى جىلى اوك، تمك، ينفراقۇرىلىم، جەڭىل جانە تاماق ونەركاسىبى سالالارىندا بىرقاتار جوبانى پايدالانۋعا بەرۋ جوسپارلانىپ وتىر.

"China Overseas Investment Fair" پەكين قالاسىندا وتكىزىلەتىن جىل سايىنعى ينۆەستيتسيالىق فورۋم. ءىس-شارا قحر دامۋ جانە رەفورمالار جونىندەگى مەملەكەتتىك كوميتەتىنىڭ تاپسىرىسى بويىنشا وتكىزىلەدى، ۇيىمداستىرۋشىلار "China Overseas Development Association". جىل سايىن فورۋمعا 500-دەن استام بيزنەس وكىلدەرى قاتىسادى.

سوڭعى جاڭالىقتار

سقو «قىزىل ايماققا» ەندى

ايماقتار • كەشە

ۇقساس جاڭالىقتار