قازاقستان • 25 قاراشا، 2020

​​ەكولوگيا مينيسترلىگى جەمقورلىقپەن قالاي كۇرەسۋدە؟

7 رەت كورسەتىلدى

قر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ بۇل ۇستانىمدى سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆتىڭ قاتىسۋىمەن وتكەن وتىرىستا ايتتى. كەزدەسۋ ەكولوگيالىق باقىلاۋ، سۋ رەسۋرستارى، گەولوگيا، ورمان شارۋاشىلىعى جانە جانۋارلار الەمى مەكەمەلەرىندە سىبايلاس جەمقورلىق قۇقىق بۇزۋشىلىقتاردىڭ الدىن الۋ ماسەلەلەرىنە ارنالدى. ءىس-شارا تاراپتاردىڭ ءوزارا باستاماسى بويىنشا ۇيىمداستىرىلدى.

«مينيسترلىك قۇرىلعان كۇننەن باستاپ سىبايلاس جەمقورلىققا قارسى ءىس-قيمىل ماسەلەلەرىن تالقىلاۋ بويىنشا بۇقارالىق اقپارات قۇرالدارى مەن ۇكىمەتتىك ەمەس ۇيىمدار وكىلدەرىنىڭ قاتىسۋىمەن ءتورت القا وتكىزدى. جەمقورلىققا قارسى كۇرەس جونىندەگى جوسپار ازىرلەندى جانە ىسكە اسىرىلۋدا. سونداي-اق، جەمقورلىق تاۋەكەلدەرىنىڭ كارتاسى مەن سىبايلاس جەمقورلىققا قارسى ستاندارت بەكىتىلدى. جەمقورلىق تاۋەكەلدەرىنىڭ كارتاسى پرەزيدەنت اكىمشىلىگىنە دە ۇسىنىلدى»، - دەپ اتاپ ءوتتى ماعزۇم مىرزاعاليەۆ.

وتىرىسقا بەينەكونفەرەنتسبايلانىس ارقىلى مينيسترلىكتىڭ بارلىق كوميتەتتەرىنىڭ، قۇرىلىمدىق بولىمشەلەرىنىڭ، اۋماقتىق ورگاندارىنىڭ جانە ۆەدومستۆولىق باعىنىستى ۇيىمدارىنىڭ باسشىلارى، سونداي-اق وبلىستاردىڭ، نۇر-سۇلتان، الماتى جانە شىمكەنت قالالارىنىڭ جەرگىلىكتى اتقارۋشى ورگاندارىنىڭ بەيىندى باسقارمالارىنىڭ باسشىلارى قاتىستى.

سونداي-اق، كەزدەسۋ بارىسىندا اگەنتتىكتىڭ سۋ رەسۋرستارى، ەكولوگيالىق رەتتەۋ جانە باقىلاۋ، ورمان شارۋاشىلىعى جانە جانۋارلار دۇنيەسى كوميتەتتەرىندە بۇرىن جۇرگىزگەن سىبايلاس جەمقورلىق تاۋەكەلدەرىنە سىرتقى تالداۋلارىنا قاتىستى جۇمىس ناتيجەلەرى قارالدى. مەملەكەتتىك قىزمەتتەردى ەلەكتروندىق فورماتتا كورسەتۋ كورسەتكىشىن 88%-عا دەيىن جەتكىزۋگە جانە اگەنتتىكتىڭ ۇسىنىمدارىن ورىنداۋدا ايتارلىقتاي پروگرەسكە قول جەتكىزۋگە مۇمكىندىك بەرگەن مينيسترلىك باسشىلىعىنىڭ سىبايلاس جەمقورلىقتىڭ الدىن الۋ ماسەلەسىندەگى ۇستانىمى اتاپ ءوتىلدى.

ايتا كەتەيىك، ەگترم اگەنتتىكپەن بىرلەسىپ وتكەن جىلى «ادالدىق الاڭى» جوبالىق كەڭسەسىن ىسكە قوستى. قازىرگى تاڭدا مينيسترلىكتىڭ وڭىرلىك مەكەمەلەرىندە جوبالىق كەڭسەنىڭ 17 فيليالى جۇمىس ىستەيدى.

«ادالدىق الاڭى» جوبالىق كەڭسەسىنىڭ مونيتورينگتىك توبىنىڭ وكىلدەرى مەملەكەتتىك ساتىپ الۋ بويىنشا جۇمىس توبىنىڭ، جۇمىسقا قابىلداۋ بويىنشا كونكۋرستىق كوميسسيانىڭ، تارتىپتىك كوميسسيانىڭ قۇرامىنا كىرەدى. ءبىزدىڭ باستامامىز بويىنشا اگەنتتىك مينيسترلىك كوميتەتتەرىندە جەمقورلىق تاۋەكەلدەرىنە سىرتقى تالداۋ جۇرگىزدى. سونداي-اق، تاۋەكەلدەردى جويۋ بويىنشا شارالار جوسپارى قابىلداندى»، - دەدى مينيستر.

سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ جۇرگىزىلىپ جاتقان جۇمىستا اشىقتىق دەڭگەيىن ارتتىرۋ قاجەتتىگىنە ەرەكشە نازار اۋداردى.

«تابيعي بايلىقتى ساقتاۋ جانە كوبەيتۋ – ءبىزدىڭ حالىق پەن ۇرپاقتار الدىنداعى كيەلى مىندەتىمىز. بۇل جولدا سىزگە اشىقتىق، ايقىندىلىق جانە قولجەتىمدىلىك دەمەۋ بولادى. وسى قاعيدالاردى ۇستانۋ جاڭا كوزقاراستاعى باسشىلاردى انىقتايدى. وسى ورايدا مينيسترگە العىسىمدى بىلدىرەمىن. ورتالىق مەملەكەتتىك ورگاندارعا بويىندا ادىلدىك پەن ادالدىق قاسيەتتەرى باسىم جاس باسشىلاردىڭ كەلۋى قۋانتادى. باق-پەن، ازاماتتىق بەلسەندىلەرمەن ءوزارا ءىس-قيمىلعا، تسيفرلىق شەشىمدەردى ەنگىزۋگە، قىزمەتكەرلەردىڭ ەڭبەك جاعدايلارىن جاقسارتۋعا نەگىزدەلگەن كەشەندى ءتاسىل عانا جەمقورلىق قۇقىق بۇزۋشىلىقتاردى جاساۋدىڭ تامىرىن كەسۋگە مۇمكىندىك بەرەدى»، - دەپ اتاپ ءوتتى اگەنتتىك توراعاسى.

سونىمەن قاتار، ول الدىن الۋ مەن اعارتۋ شارالارى جەمقورلىقتى تەجەيتىن فاكتورلار ەكەنىن اتاپ ءوتتى.
«زاڭنامالىق ولقىلىقتارعا، سەبەپتەر مەن جاعدايلارعا، تاۋەكەلدەرگە، اكىمشىلىك كەدەرگىلەر مەن بيۋروكراتياعا جول بەرمەۋ كەرەك. سىبايلاس جەمقورلىقتى ءبىز بەلسەندى ازاماتتىق ۇستانىمى بار قوعاممەن عانا جەڭە الامىز. سونداي-اق، ءبىلىم بەرۋ، تاربيەلەۋ جانە سىبايلاس جەمقورلىققا قارسى مادەنيەتتى قالىپتاستىرۋ ماڭىزدى»، - دەپ باسا ايتتى اليك شپەكباەۆ.

ء«بىزدىڭ مينيسترلىك سىبايلاس جەمقورلىققا مۇلدەم توزبەۋ قاعيداتتارىن باسشىلىققا الادى. ازاماتتاردىڭ بارلىق وتىنىشتەرى مەن ساۋالدارىنا ۋاقىتىلى جاۋاپ بەرۋ ماسەلەسى ەرەكشە باقىلاۋدا. جەمقورلىقتىڭ الدىن الۋ جونىندەگى مىندەتتەردى ىسكە اسىرۋدى كۇشەيتۋ جانە زاڭناما نورمالارىنىڭ ورىندالۋىن، ءبىرىنشى كەزەكتە، وزىنەن جانە ودان كەيىن بارلىق قىزمەتكەرلەردەن تالاپ ەتۋ قاجەت»، - دەپ تۇيىندەدى ماعزۇم مىرزاعاليەۆ.

سوڭعى جاڭالىقتار

سقو «قىزىل ايماققا» ەندى

ايماقتار • كەشە

ۇقساس جاڭالىقتار