ايماقتار • 25 قاراشا، 2020

جامبىلدا مەديتسينالىق قۇرال-جابدىقتار الۋعا 1،6 ميلليارد بولىنگەن

17 رەت كورسەتىلدى

بۇگىندە جامبىل وبلىسىندا كوروناۆيرۋس ىندەتىمەن كۇرەس جۇيەلى تۇردە جۇرگىزىلىپ جاتىر، دەپ حابارلايدى Egemen.kz

وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆتىڭ ايتۋىنشا، وڭىردە ينفەكتسيالىق ستانتسيوناردان 4149 ادام ساۋىعىپ شىققان. الايدا، وسى ۋاقىتقا دەيىن تاۋلىگىنە 10 ادام قاۋىپتى ىندەتتى جۇقتىرعان بولسا، ازىرگە سول كورسەتكىش قايتالانۋدا ەكەن.

ءوڭىردىڭ باس دارىگەرىنىڭ سوزىنشە، وتكەن تاۋلىكتە 4324 جاعداي تىركەلگەن. تىركەلگەن جاعدايلاردىڭ ىشىندە 1908 ناۋقاس سيمپتوممەن، ال، 2416 ناۋقاس سيمپتومسىز بولعان. بۇل رەتتە كوروناۆيرۋسپەن كۇرەستە جەرگىلىكتى بيۋدجەتتەن قوماقتى قاراجات قاراستىرىلعان. ماسەلەن، مەديتسينالىق ماقساتتاعى قۇرال-جابدىقتاردى ساتىپ الۋعا 1،6 ميلليارد تەڭگە بولىنگەن. ول قاراجاتقا 2 ەكستروكورپارالدى مەمبراندى وكسيگەناتسيا اپپاراتى، 100 كوپفۋنكتسيونالدى كەرەۋەت، 14 بىرلىك وكپەنى جاساندى جەلدەتۋ اپپاراتى، 3 كت اپپاراتى، 3 كششس اپپارات، 4 تسيفرلىق رەنتگەن اپپاراتى، 4 وتتەگى ستانتسياسى جانە تاعى دا باسقا  مەديتسينالىق جابدىقتار الىنۋدا.

سونىمەن قاتار، رەسپۋبليكالىق بيۋدجەتتەن جامبىل وبلىسىنىڭ جەدەل جاردەم ستانساسىنا 66 بىرلىك مەديتسينالىق كولىكتەر ليزينگ بويىنشا بەرىلگەن. سونداي-اق، 53 بىرلىك وكپەنى جاساندى جەلدەتۋ اپپاراتى، 8 جىلجىمالى مەديتسينالىق كەشەن الىنعان. باسقارما باسشىسى بۇگىندە وڭىردەگى 78 مەديتسينالىق ۇيىمعا 6 ميلليارد تەڭگە كولەمىندە دارىلىك زاتتار مەن مەديتسينالىق بۇيىمدار جەتكىزىلگەنىن اتاپ ءوتتى.

"ال، مەديتسينالىق ۇيىمدار بويىنشا ايتار بولساق، ولاردىڭ 34-ءى باسقارماعا قارايدى. سونىمەن قاتار، 35 ۇيىم جەكەمەنشىك، قالعان 9 ۇيىم اسكەري-مەديتسينالىق ۇيىمدار. اتالعان 6 ميلليارد تەڭگەنىڭ 1،1 ميلليارد تەڭگەسى كوروناۆيرۋس ىندەتىن  ەمدەۋگە، الدىن الۋعا ارنالعان دارىلىك زاتتار مەن مەديتسينالىق بۇيىمدار الۋعا ارنالعان"، دەيدى اسەت قاليەۆ.

سوڭعى جاڭالىقتار

سقو «قىزىل ايماققا» ەندى

ايماقتار • كەشە

ۇقساس جاڭالىقتار