ماسەلەن, قاراتال اۋدانىنىڭ باس سانيتار دارىگەرىنىڭ قاۋلىسىمەن ۇشتوبە قالاسىنىڭ كىرەبەرىسىنە سانيتارلىق بەكەت ورناتىلدى. ءموبيلدى پوست اۋدان ورتالىعىنا كىرىپ-شىعاتىن جولاۋشىلاردى باقىلاپ, دەنە قىزۋىن ولشەيدى. سونىمەن بىرگە ءۇي كارانتينىندە جاتقان ادامداردى, ولارمەن بايلانىستا بولعانداردى قالادان تىسقارى شىعارماۋدى قاداعالايدى. پوست جۇمىسىنا پوليتسيا وكىلدەرى, مەديتسينا قىزمەتكەرلەرى تارتىلعان. ولار ارنايى قورعانىش قۇرالدارىمەن قامتاماسىز ەتىلگەن. ال قاراتال اۋدانى بويىنشا قاتاڭ شارالاردىڭ قابىلدانۋىنا وڭىردەگى ناۋقاستار سانىنىڭ ون ادامنان اسىپ كەتكەنى سەبەپ بولعان.
جالپى, الماتى وبلىسىندا 21 قاراشادان باستاپ كارانتيننىڭ كەيبىر تالاپتارى قايتادان كۇشەيتىلگەن ەدى. باس سانيتار دارىگەر قول قويعان جاڭا قاۋلىدا وڭىردەگى كارانتيندىك شەكتەۋلەردى ۇزارتۋ جايى قاراستىرىلعان. سونىمەن قاتار جاڭا قۇجاتتا ويىن مەكەمەلەرى, ويىنحانالار, كازينو, ۇتىسقا اقشا تىگىپ, قۇمار ويىندار وتكىزەتىن عيماراتتاردىڭ جۇمىسى توقتاتىلدى.
الماتى وبلىسى
