«جاقسىلىق ەتسەڭ جاسىر, جاقسىلىق كورسەڭ اسىر» دەۋشى ەدى اتام قازاق. ۇندەمەستەن ۇلكەن ءىس تىدىرىپ جۇرگەن جاستاردىڭ يگى شارۋالارىن ايتپاي قالۋعا بولماس. اسىرەسە بيىل, اتى جامان ىندەت ەلدى ۇرەيلەندىرگەن تۇستا تارباعاتايلىقتاردىڭ ۇيىمشىلدىعىنا كوپشىلىك قىزىعا قاراعان. دەندەگەن دەرتكە توتەپ بەرۋى ءۇشىن ءبارى ءبىر اتانىڭ بالاسىنداي ورتاق قازانعا قارجى جيناپ, اۋداننىڭ اۋرۋحانالارىنا وكپەنى جاساندى جەلدەتۋ اپپاراتتارىنان باستاپ ۇساق-تۇيەك كەرەك-جاراقتارىنا دەيىن الىپ بەرە قويعان. ۇيىمشىلدىق دەگەن سول ەمەس پە؟!
سونداي-اق ۆولونتەرلەر ەكپىن, قۇمكول جانە اقسۋات اۋىلدارىنداعى جالعىزباستى انالاردىڭ باسپانالى بولۋىنا كومەكتەسكەن. جاڭااۋىلدا جاستار دەمەۋشىلىگىمەن اۋىلدىڭ ءبىر كوشەسىنە جارىق تارتىلدى. ەندى بۇل اۋىلدا «جاستار ۇيىنە» جوندەۋ جۇمىستارى جۇرگىزىلىپ, اۋىلدىق وكرۋگ اكىمدىگىنىڭ بالانسىنا بەرىلمەك.
اۋدانداعى «بارقىتبەل جاستارى» قوعامدىق بىرلەستىگى بيىل اۋىلدىق جەرلەردەگى ۇكىمەتتىك ەمەس ۇيىم الەۋەتىن ارتتىرۋ ماقساتىندا ۇيىمداستىرىلعان گرانتتىق جوباعا قاتىسىپ, 500 مىڭ تەڭگە گرانتقا يە بولعان. ولار ۇتىپ العان قارجىعا جاستارعا ارنالعان «كوۆوركينگ» ورتالىعىن اشۋدى قولعا العان. سونىمەن قاتار ۇيىم جاستارى مۇمكىندىگى شەكتەۋلى جاندارعا, قارتتارعا, جالعىزباستى انالاردىڭ ۇيلەرىنە ءار سەنبى سايىن جاردەمدەسىپ, قايىرىمدىلىق اكتسياسىن ۇيىمداستىرۋدى داستۇرگە اينالدىرعان.
توتەنشە جاعداي كەزىندە «بارقىتبەل جاستارى» ۆولونتەرلەر توبى اۋدان تۇرعىندارىنىڭ قاۋىپسىزدىگى ءۇشىن اقپارات ماتەريالدارى مەن تەگىن ماسكالار تاراتتى. سانيتارلىق بەكەتتەردە تۇرعان قىزمەتكەرلەرگە تاماق اپارىپ بەرىپ ءجۇردى. قايىرىمدى جاستار توتەنشە جاعداي كەزىندە مۇمكىندىگى شەكتەۋلى جاندار مەن قارتتاردى دا ازىق-ت ۇلىكپەن قامتاماسىز ەتىپ وتىردى.
تۇرعىندارعا پايدالى اقپارات تاراتۋ ماقساتىندا الەۋمەتتىك جەلىدە «جاستار ورتالىعى» اتتى پاراقشا اشىلىپ, ازاماتتار مازالاعان سۇراقتارىنا جاۋاپتى سول جەردەن تاپقان.
اۋدانداعى بەلسەندى جاستار اراسىندا ۆولونتەرلىك جۇمىستاردان بولەك مەملەكەتتىك ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى ارقىلى بيزنەس اشۋدى كوزدەگەندەر دە بار. «جاس كاسىپكەر» جوباسى اياسىندا 20 جاس گرانت الۋعا ۇمىتكەر جانە 13 جاس «باستاۋ» جوباسىنا قاتىسقان. الداعى ۋاقىتتا 150 جاستى كاسىپتىك ماماندىق يگەرۋگە وقىتۋ جوسپارلانىپ وتىر. سونىمەن قاتار, BIRGEMIZ جوباسى اياسىنداعى گرانتتىق جوباعا 3 جوبا ۇسىنىلدى. سونىڭ ءبىرى «بىرگەمىز اسىل مۇرا» جوباسى اياسىندا نازەركە قىزىروۆا گرانت ۇتىپ الىپ, تاريحي-مادەني ورىندارعا ۆولونتەرلەردى تارتۋ جۇمىستارىن جۇرگىزىپ جاتىر. جازعى ماۋسىمدا جوبا اياسىندا ۆولونتەرلەر ەلەكە سازى جايلاۋىنا ەكسكۋرسياعا بارىپ, تۋعان جەر تاريحىمەن تانىسىپ قايتتى. جوبانىڭ نەگىزگى كوزدەگەنى, تارباعاتاي شەكارالىق ايماققا جاتاتىندىقتان جاستاردى اۋدانعا تارتىپ, اۋدان حالقىنىڭ سانىن ارتتىرۋ.
– جاس مامان تىڭ يدەيالارىمەن اۋدانعا كەلىپ جاتسا, كادر تاپشىلىعى بولماس ەدى. اۋداننىڭ الەۋمەتتىك-ەكونوميكالىق احۋالى جوعارلايدى. جالپى جاستاردىڭ اۋداندا دا ءوسىپ-وركەندەۋىنە جاعداي جاسالعان, – دەيدى جوبا جەتەكشىسى نازەركە قىزىروۆا.
تارباعاتاي تالانتتاردىڭ جەرى. جۋىق ارادا جاس ونەرتاپقىشتاردى قولداۋ ماقساتىندا Tarbagatai inventor اتتى جاس ونەرتاپقىشتار كورمەسىن وتكىزۋ جوسپارلانىپ وتىر.
شىعىس قازاقستا وبلىسى,
تارباعاتاي اۋدانى
