بۇرىنعى كەڭەس داۋىرىندەگىدەي ەمەس, قازىرگى نارىقتىق زاماندا نە ساتىپ الامىن دەسەڭ دە تابۋ وڭاي. كەيدە جارنامانىڭ ارباۋىنا تۇسكەننەن بە تىم كوپ تاۋار تۇتىناتىنىمىز بار. وندايدا ءبىر جاڭا كيىمگە قولى جەتپەي وتىرعان وتباسىنىڭ بارىن بىلمەيمىز. ءبارىمىز ەمەس, ارينە. بۇرىندارى ەسكى كيىمدى اۋىلداعى تۋىس-تۋماعا جىبەرۋ دەگەن جاقسى ءداستۇر بار-تىن. قازىر الەمدە «جىلدام ءسان» ۇعىمى قالىپتاسقالى, بيىل ساتىپ العان كيىمىڭ كەلەسى جىلى ساننەن شىعىپ, كيۋگە جارامايتىن بولعان جايى بار. مۇندايدا قوقىسقا كەتكەن كيىمنىڭ قورشاعان ورتانى قانشالىقتى لاستاپ جاتقانىن ايتا كەتكەن ءجون. اقش-تا شامامەن توقىما بۇيىمداردىڭ 85 پايىزى قاجەتسىز بولىپ قالادى ەكەن. بۇل – 1 جىلدا 13 ملن توننا قوقىس پوليگونعا كەتەدى دەگەن ءسوز.
وسىنشاما كيىمنىڭ ءراسۋا بولماي, كەدەيلىك شەگىندە ءومىر ءسۇرىپ جاتقان وتباسىلارعا بەرىلۋى قۇپتارلىق ءىس. وسىنداي قايىرىمدى جوبالاردىڭ ءبىرى – Qarqyn الەۋمەتتىك دۇكەنى. ەل استاناسىنىڭ تۇرعىندارى ءبىر جىلدان بەرى «سىعاناق كوشەسى, 15» مەكەنجايى بويىنشا وزىنە قاجەتسىز كيىم-كەشەكتى الىپ كەلەدى. بۇل دۇكەندە كيىم عانا ەمەس, قايىرىمدى جانداردىڭ بالالارى ويناعان ويىنشىقتارى مەن ۆەلوسيپەدى دە بار. تۋرا سول ءوزىمىزدىڭ «ۇلكەننەن قالعان» يدەياسىن قولدايتىنداي.
Qarqyn قايىرىمدىلىق قورىن ۇيىمداستىرعان ماديار مۇحامەدجان ۇلى مۇقتاج جاندارعا قول ۇشىن سوزۋ تۋرالى بىرنەشە جىل قاتارىنان ويلاستىرىپ جۇرەدى. رولان, بەرىك اعالارىمەن ۇزاق كەڭەسە كەلە, تەگىن الەۋمەتتىك دۇكەن اشۋ تۋرالى شەشىمگە كەلگەن. العاشىندا بۇل باستاماعا كۇمان بىلدىرگەندەر كوپ بولعان. دەگەنمەن ىزگى نيەت پەن شىن كوڭىل ءبارىن جەڭگەن.
2019 جىلدىڭ 23 اقپانىندا اشىلعان دۇكەندى تولتىرۋعا تۋىستار مەن تانىستاردىڭ كومەگى كوپ تيگەن.
«تانىستارىمىز ءبىر-بىرىنەن ەستىپ تەحنيكا, جيھاز, كيىم ىلگىشتەرى سەكىلدى دۇكەنگە قاجەت دۇنيەلەردى الىپ كەلە باستادى. عيماراتتى قالانىڭ ورتالىعىنان جالدادىق. سىرت جاقتا باعا تومەن بولعانىمەن, كيىم-كەشەك وتكىزگىسى كەلگەن نە العىسى كەلگەن جاندارعا الىس بولاتىنىن ەسكەردىك. قوردا 1 ديرەكتور, فيليال ديرەكتورى جانە 8 جۇمىسشى قىزمەت ەتەدى. ۆولونتەرلەر مەن ۋنيۆەرسيتەت ستۋدەنتتەرى دە كومەككە كەلىپ تۇرادى», دەيدى ماديار.
دۇكەن كيىم-كەشەك, اياق كيىم, ويىنشىق, ۆەلوسيپەد, بالالارعا ارنالعان اربا, تەلەفون, ىدىس-اياق, تۇرمىستىق تەحنيكا مەن تاماق ونىمدەرىن دە قابىلدايدى. وسىنىڭ بارلىعى از قامتىلعان وتباسىلارعا, اسىراۋشىسىز قالعان قارتتارعا, جالعىزباستى, ەڭبەككە جارامسىز ادامدارعا, سوعىس جانە ەڭبەك ارداگەرلەرىنە, جەتىمدەر, كوپبالالى وتباسىلار, مۇگەدەكتەر مەن جالعىزباستى انالار مەن اكەلەرگە تەگىن تاراتىلادى.
«وتباسىنىڭ ءار مۇشەسىنە ايىنا 1 رەت 5 زاتتان بەرەمىز. مىسالى, ەگەر وتباسىندا 4 بالا بولسا, وندا اتا-اناسىمەن بىرگە ءبىر ايدا 30 زات الا الادى. مۇقتاج ەكەنىن راستايتىن قۇجاتىن كورسەتۋى كەرەك. ول كىسىلەردى جۇيەمىزگە تىركەپ قويامىز. ءبىزدىڭ ستاتيستيكاعا سايكەس, دۇكەنگە كۇن سايىن شامامەن 75 ادام كەلىپ, 1500-2000-عا جۋىق زات وتكىزەدى. زات الۋعا كەلەتىن ادامداردىڭ دا ۇلەسى كوپ. ايىنا دۇكەنگە شامامەن 70 مىڭنان استام زات كەلىپ تۇسەدى. اشىلعالى بەرى 20 مىڭنان استام ادامعا ءسال دە بولسىن قول ۇشىن سوزدىق», دەيدى م.مۇحامەدجان ۇلى.
جالپى, ورتاشا ەسەپپەن 300 ملن تەڭگەگە جۋىق كومەك كورسەتىلگەن ەكەن. بۇل از دا, كوپ تە ەمەس. قوقىسقا كەتەتىن دۇنيەنىڭ, كەلەسى ءبىر جاننىڭ كەرەگىنە جاراعانى قۋانتادى.
پارلامەنت سەناتى اپپاراتىندا قىزمەت ەتەتىن ماديار قوعامدىق جۇمىسقا دا ۇلكەن ءمان بەرەدى. وسىنداي قايىرىمدى دۇكەندى وزگە قالالاردان دا اشۋ تۋرالى تىلەگى جاقىندا قابىل بولعان ەكەن.
«اياققا تۇرعان سوڭ فيليال اشۋ تۋرالى ءبىرازدان ويلانىپ جۇرگەنبىز. بىردە الماتى قالاسى اۋەزوۆ اۋدانى اكىمدىگى حابارلاسىپ, جوبالارىڭىزدى كوردىك, ۇنادى, قولداۋ كورسەتسەك دەگەن تىلەگىن ءبىلدىردى. وسىلايشا قاراشا ايىندا الماتى قالاسىنىڭ اكىمى ب.ساعىنتاەۆتىڭ قاتىسۋىمەن الماتى قالاسى, جاندوسوۆ كوشەسى 144/1 مەكەنجايىندا دۇكەننىڭ فيليالىن اشتىق», دەيدى كەيىپكەرىمىز.
ودان بولەك قور قىزمەتكەرلەرى ماقتاارالداعى سۋ تاسقىنى كەزىندە 3 جۇك كولىك كيىم-كەشەك جولداعان ەكەن. ەسكى زاتتاردى الىپ سورتتاۋ, تازالاۋدىڭ ءوزى ۇلكەن ەڭبەكتى قاجەت ەتەدى. ادەتتە جۇمىس بارىسىندا كولدەنەڭ كەلەتىن قيىندىق تا كوپ. جۇرەك قالاۋىڭمەن اتقاراتىن ىسىڭە ادال بولىپ قالۋ ءۇشىن قانشالىقتى ىنتا كەرەك دەسەڭىزشى.
«بۇل دۇكەندە قيىندىق پەن قىزىق قاتار جۇرەدى. تەگىن بەرىلەتىن زاتتار بولعاننان كەيىن سىناۋشىلار دا, شىنايى ريزاشىلىعىن ايتىپ كەتەتىندەر دە جەتكىلىكتى. «جاڭا زات بەرسەڭدەر بولادى عوي» دەيتىن كىسىلەردى دە كەزدەستىرەمىز. قۇجاتسىز كەلىپ تۇرىپ الاتىندار دا جەتكىلىكتى. راستايتىن قۇجاتسىز بەرىلمەيدى دەسەڭىز, ايقايدىڭ اكەسىن تانىتاتىندار بولادى. كەيدە جەتىمدەر ۇيىنەن, قارتتار ۇيىنەن, مۇگەدەكتەرگە ارنالعان, پروباتسيالىق ورتالىقتاردان كومەك سۇرايدى. مۇنداي مەكەمەلەرمەن تىعىز جۇمىس ىستەيمىز. سۇراعان زاتتارىن تاۋىپ بەرۋگە تىرىسامىز, ءبىر شەتكە بولەك قويىپ جينايمىز. دۇكەنگە كەلۋشىلەر تۇسىنبەي, وزدەرىڭە قاجەت زاتتاردى جيناپ الادى ەكەنسىڭدەر دەپ ايىپتايدى. سىندى دا قابىلداي بىلەمىز», دەيدى جوبانىڭ بارلىق ماشاقاتىن كورگەن قىزمەتكەرلەر.
بيىلعى پاندەميانىڭ وتباسىلاردىڭ الەۋمەتتىك جاعدايىنا اسەر ەتكەنى بەلگىلى. تابىسسىز, مۇلدەم جۇمىسسىز قالعاندارى دا كوپ. كارانتين كەزىندە كەلگەن كىسىلەردىڭ 70 پايىزى ازىق-ت ۇلىك, بالالارعا ارنالعان تاعام سۇراعان ەكەن. مۇنداي كەزدە دۇكەندەگىلەر قولدان كەلگەنشە تاۋىپ بەرۋگە تىرىستىق دەيدى. ودان بولەك SanaMed مەديتسينالىق كومپانياسىمەن بىرلەسىپ, №2 قالالىق بالالار اۋرۋحاناسىنا COVID-19 ىندەتىن انىقتايتىن 300 دانا تەست تابىستاعان.
جوبانىڭ جابىلىپ قالماۋىنا قول ۇشىن سوزىپ وتىرعان «ترانستەلەكوم» سەكىلدى كومپانيالار دا بار. قالالىق اكىمدىك تە سوڭعى جارتى جىلدا جوباعا وڭ باعا بەرىپ, مەملەكەتتىك قولداۋ كورسەتىپ وتىرعان كورىنەدى. ۇيىمداستىرۋشىلار وسى سەكىلدى قايىرىمدى جوبالاردىڭ عۇمىرى ۇزاق بولعانىن قالايتىن جۇرت وزىنەن ارتىلعان دۇنيەسىن تاسۋدان شارشاماسا دەيدى. «جاقسىلىق جاساپ جارىسايىق» دەگەن بەرىك ۇستانىمعا سەنەتىن ماديارعا دۇكەندەر جەلىسىنىڭ كوبەيىپ, جالپىحالىقتىق قوزعالىسقا اينالۋىن شىن جۇرەكتەن تىلەدىك.
