ءبارى اۋەستىكتەن باستالدى
م.دجونسون ەرەكشە ەڭبەكقورلىعىنىڭ ارقاسىندا الەمگە تانىمال سپورتشى اتاندى. قىسقا قاشىقتىقتا جۇگىرۋدەن وليمپيادانى 4 مارتە, الەمدى 8 مارتە باعىندىرىپ, بىرقاتار رەكورد ورناتتى. مايكل دجونسون 1967 جىلى 13 قىركۇيەكتە تەحاستاعى ۋەيكو قالاسىندا دۇنيەگە كەلگەن ەكەن. اكەسى – شوفەر, اناسى – مۇعالىم. بەس اعايىندى. اتا-اناسى پەرزەنتتەرىنە ەڭ الدىمەن ءبىلىم الۋ كەرەك دەگەن مىندەت قويىپتى. اعايىندىلاردىڭ جازدىڭ جايماشۋاق كۇندەرىنىڭ وزىندە تۇسكە دەيىن ساباق وقىپ, تۇستەن كەيىن دەمالۋ دەگەن شارتى بولىپتى. دجونسون ورتا مەكتەپ بىتىرگەننەن كەيىن جوعارى ءبىلىم الىپ, مەنەدجەر اتاندى.
ول جۇگىرۋمەن مەكتەپ قابىرعاسىندا شۇعىلدانعان. باس كەزىندە بۇل اۋەستىگىنە قاتتى ءمان بەرمەپتى. بۇل تۋرالى ءوزى: «مەن كىشكەنتايىمنان قۇرداستارىمنىڭ اراسىندا ەڭ جىلدام بولدىم. ءتىپتى ەرەسەك بالالارمەن جارىسقاندا وزىپ كەتەتىنمىن. بىراق قانشالىقتى وزىپ جۇرسەم دە, ەشقاشان وليمپيادانى باعىندىرىپ, رەكوردتار يەسى اتانامىن دەپ ويلاماپپىن...» دەيدى.
بولاشاق جەلاياق العاشىندا «تەك ءوزىم ءۇشىن سپورت تۇرىمەن اينالىسىپ ءجۇردىم» دەگەنىمەن, باپكەرى ەڭبەكقور مايكلدىڭ ءتۇپتىڭ تۇبىندە ءبىر جەردەن جارىپ شىعاتىنىن ەرتە بىلگەن ەكەن. بۇل جايىندا جاتتىقتىرۋشىسى كلايد حارت سۇحباتتارىندا ايتىپ ءجۇردى. بىراق مايكل ۇلكەن سپورتتان كەتكەنىنشە جاتتىعۋ تەحنيكاسى مەن ايلا-تاسىلدەر جايىنداعى سىردى ەشكىممەن بولىسپەي, باپكەرى ەكەۋى ءوز ىشىندە ساقتاپ قالدى.
باعى جانعان جىلدار
دجونسوننىڭ جۇلدىزدى ءساتىن تۋعىزعان اتلانتا وليمپياداسى. بىراق وعان دەيىن دە بىرقاتار جەتىستىككە جەتىپ ءجۇردى. 1992 جىلى 4ح400 مەترلىك ەستافەتا جارىسىندا بارسەلونا وليمپياداسىنىڭ التىن مەدالىن ارىپتەستەرىمەن بىرگە جەڭىپ السا, وسى جىلدارى قىسقا قاشىقتىقتا (200 مەتر) الەمدىك رەكوردتى جاڭارتىپ, جەڭىل اتلەتيكانىڭ ايتۋلى جارىستارىندا جۇلدەگەرلەر قاتارىنان كورىندى.
1988 جىلى سەۋل وليمپياداسىنا جاراقاتىنىڭ سالدارىنان قاتىسا الماعاندىقتان, بار كۇشىن 1991 جىلعى توكيوداعى الەم مىقتىلارى باس قوسقان چەمپيوناتقا سالدى. وسى چەمپيوناتتا 200 مەترگە جۇگىرۋدەن باس جۇلدە العان ول بارسەلونا وليمپياداسىنىڭ التىن مەدالىنەن باستى ۇمىتكەر ەدى. بىراق دەنساۋلىعى سىر بەرىپ, دۇرىس ونەر كورسەتە المادى. جەكەلەي سىندا ءتىپتى فينالعا شىعا الماي, ۇياتتى جاعدايعا قالدى. دەگەنمەن جوعارىدا ايتقانىمىزداي, ەستافەتالىق جارىستا جەرلەستەرىمەن بىرگە بارىن سالىپ, ءبىرىنشى ورىندى يەلەندى. بۇل دا كوڭىلگە دەمەۋ.
الدىنا قويعان ماقساتىنا جەتۋدەن ەش قايمىقپايتىن سپورتشى ۇيىنە قايتقاننان كەيىن كۇنىنە ەكى رەت جاتتىعىپ ءجۇردى. نامىسىن قايراعان بارسەلوناداعى ساتسىزدىك وزگە جەتىستىكتەرگە جەتكىزدى. ءبىر جىل وتكەننەن كەيىن, 1993 جىلى شتۋتگارتتا وتكەن جەڭىل اتلەتيكادان الەم بىرىنشىلىگىندە 400 مەترگە جۇگىرۋدەن قارسىلاس شىداتپادى جانە جەرلەستەرىمەن بىرگە 4ح400 مەترلىك ەستافەتالىق جارىستا التىننان القا تاقتى.
سونىمەن قاتار 1990 جانە 1994 جىلدارى ىزگى نيەت ويىندارىندا (گۋدۆيلل) جانە جابىق الاڭداعى جارىستاردا مارەگە ءبىرىنشى بولىپ كەلىپ ءجۇردى. 1995 جىل مايكل ءۇشىن تابىستى بولدى. گەتەبورگتا وتكەن الەم چەمپيوناتىندا 200 جانە 400 مەتر قاشىقتىقتا جان شىداتپادى. ونىمەن قويماي, ەستافەتادا كوماندالاستارىمەن تاعى ءبىر مارتە الەمنىڭ ۇزدىكتەرى ەكەنىن دالەلدەي ءبىلدى. ءسويتىپ, ءبىر چەمپيوناتتان 3 التىن مەدال ەنشىلەدى.
جەلاياق بۇدان كەيىنگى تولاعاي جەتىستىگىنە 1996 جىلى وتكەن اتلانتا وليمپياداسىندا قول جەتكىزدى. العاشقى جەڭىسى – 200 مەتر قاشىقتىقتا مارە سىزىعىن ءبىرىنشى بولىپ كەسكەننەن كەيىن-اق سەنساتسيالىق حابار تارادى. سەبەبى جەلاياق سپورتشىنىڭ جىلدامدىعى شەكتەن تىس بولدى. مۇنداي ەنەرگيا جۇمساعان ادامنىڭ تاعى دا ءبىر قاشىقتىقتا جۇگىرىپ التىننان القا تاعۋى ادام سەنبەيتىن ءىس ەدى. بىراق دجونسون ءبارىن تاڭعالدىرىپ تاعى ءبىر مارتە چەمپيون اتاندى. ءسويتىپ, جەڭىل اتلەتيكا تاريحىندا ەكى قاشىقتىقتا (200, 400 مەتر) قاتارىنان توپ جارعان سپورتشى رەتىندە تاريح پاراعىنا تاڭبالاندى. بۇعان دەيىن وسىنداي اتاقتىڭ يەسى بوب بيمون (بيىكتىككە سەكىرۋ) بولعان ەكەن.
2000 جىلى سيدنەي وليمپياداسىندا 400 مەترلىك جارىستى ۇتتى. سونىمەن قوسا, ەستافەتالىق جارىستى دا جەڭىپ الدى. بىراق كەيىن ءبىر كوماندالاسى تىيىم سالىنعان ءدارى قابىلدادى دەپ, بۇل جۇلدەنى قايتارۋعا تۋرا كەلدى.
2002 جىلى سپورتتىق عۇمىرى اياقتالعاننان كەيىن مايكل دجونسون BBC ارناسىندا كوممەنتاتورلىق قىزمەتتى جانە «دەيلي تەلەگراف» گازەتىندە سپورت ءمۇيىسىن جۇرگىزدى. 2007 جىلى جەكەمەنشىك Ultimate Performance اتتى سپورتتىق مەنەدجمەنت سالاسىنداعى كومپانيا اشىپ, جاستار مەن كاسىبي سپورتشىلاردى دايارلاۋعا اتسالىسىپ ءجۇر. بۇگىنگى تاڭدا وتباسىمەن كاليفورنيادا تۇرادى.
كىم جۇيرىك؟
وسى سۇراقتى كوپتەگەن سپورت مامانى مەن جانكۇيەر قويىپ ءجۇر. سالىستىرىپ جۇرگەندەرى – مايكل دجونسون مەن ۋسەين بولت. ءبىزدىڭ ويىمىزشا, بۇلاي سالىستىرۋ مۇلدەم قيسىنسىز. ويتكەنى ەكەۋىنىڭ سپورتتىق عۇمىرى ەكى كەزەڭدە بولعاننان كەيىن قوس جۇيرىكتىڭ الەۋەتى دە ءارتۇرلى. ءبىز تەك ەكەۋىنىڭ ەرەكشەلىكتەرىنە عانا توقتالۋدى ءجون كوردىك.
مايكل دجونسون جۇگىرۋ كەزىندە دەنەسى ارتقا قاراي ءيىلىپ, ورتاشا اياق ادىمىمەن ەرەكشەلەنسە, ۋسەين بولتتىڭ بويى ۇزىن بولعاندىقتان, سورەدەن العاش شىققان كەزدە-اق جىلدامدىق الادى. مۇندايدا نەگىزگى سالماق دەنەگە ەمەس, اياققا تۇسەدى دەيدى سپورت ماماندارى.
مايكل دجونسون – وتكەن عاسىردىڭ سوڭعى ونجىلدىعىندا ەشكىمگە دەس بەرمەي, ءوز بيىگىندە ۇلكەن سپورتتان كەتكەن مايتالمان. قيىندىق بولسا مويىماي, كەرىسىنشە, نامىسىنا قامشى سالىپ, بيىكتەردى باعىندىرعان الەمنىڭ ەڭ مىقتى جەلاياقتارىنىڭ ءبىرى. بۇل جايىندا ءوزى: «مەنىڭ وسىنشاما ۇزاق سپورتتىق عۇمىرىمنىڭ بولعانىن جانە ناتيجەلى كورسەتكىشتەرىمدى ساقتاي العانىمدى ماقتان تۇتامىن. مۇنىڭ ءبارى دە, ارينە, ءبارى دە ەڭبەكتىڭ ارقاسى», دەيدى.
دجونسون بۇگىنگى تاڭدا ءوزىنىڭ بار بىلگەنىن شاكىرتتەرىنە ۇيرەتىپ ءجۇر. جىل سايىن الەمنىڭ ءارتۇرلى مەملەكەتىنە ارنايى بارىپ, جەرگىلىكتى جەلاياقتار مەن ولاردىڭ باپكەرلەرىنە ارنايى ءدارىس تە وقيدى.
