ايماقتار • 24 قاراشا، 2020

ەرالى توعجانوۆ قورداي اۋدانىنىڭ تۇرعىندارىمەن كەزدەستى

28 رەت كورسەتىلدى

قازاقستان رەسپۋبليكاسى پرەمەر-ءمينيسترىنىڭ ورىنباسارى ەرالى توعجانوۆ باستاعان ۇكىمەتتىك دەلەگاتسيا جۇمىس ساپارىمەن جامبىل وبلىسىندا بولىپ، قورداي اۋدانى، سورتوبە اۋىلىندا اۋدان تۇرعىندارىمەن كەزدەستى. كەزدەسۋگە اۋداننىڭ قاراكەمەر، ماسانچي، سورتوبە جانە اۋقاتتى اۋىلدارىنىڭ قاريالارى مەن زيالى قاۋىم وكىلدەرى قاتىستى، دەپ حابارلايدى Egemen.kz.

جيىندا ۇكىمەت باسشىسىنىڭ ورىن­باسارى ەرالى توعجانوۆ پەن جامبىل وبلى­سىنىڭ اكىمى بەردىبەك ساپار­باەۆ جەر­گىلىكتى تۇرعىندارمەن بىرگە وزەكتى ماسە­لەلەردى جانە مەملەكەتتىك باعدارلاما­لاردىڭ ىسكە اسىرىلۋ بارىسىن تالقىلادى.

– بيىل كوپتەگەن الەۋمەتتىك ماسەلەلەر شەشىلدى. اۋىلدار گازبەن، سۋمەن، ينتەرنەتپەن قامتاماسىز ەتىلۋدە. جولدار جوندەلىپ، الەۋمەتتىك نىساندار سالىنۋدا. بەيبىتشىلىك پەن كەلىسىم بولماسا، مۇنىڭ بارىنە قول جەتكىزۋ مۇمكىن ەمەستىگىن تۇرعىندار جاقسى تۇسىنەدى. اعا بۋىن ءوز تاراپىنان ۇلتارالىق كەلىسىم ماسەلەلەرىنە ايرىقشا كوڭىل ءبولىنىپ، جاستاردى حالىقتىق داستۇرلەر مەن سىيلاستىق نەگى­زىندە تاربيەلەۋدەمىز، – دەدى قورداي اۋدان­دىق «قوعامدىق كەلىسىم» قوعامدىق كەڭەسىنىڭ توراعاسى ابدىبەك سەيىلحانوۆ.

 – تۇڭعىش پرەزيدەنت – ەلباسى ن.نازار­باەۆتىڭ باستاماسىمەن قۇرىلعان قازاقستان حالقى اسسامبلەياسى ەلىمىزدە تۇراتىن كوپتەگەن ەتنوستار اراسىنداعى بەيبىت جانە ۇيلەسىمدى قارىم-قاتىناستى نىعايتۋعا كومەكتەستى. وسى بىرەگەي مودەل­سىز ەلدىڭ تۇراقتى دامۋى مۇمكىن ەمەس ەدى. وس­كەلەڭ ۇرپاققا وسى قۇندىلىقتاردى ساقتاۋ جانە جەتكىزۋ – ءاربىر ادامنىڭ مىن­دەتى. «مەملەكەت باسشىسىنىڭ تاپسىرماسى بويىنشا قورداي اۋدانىن دامىتۋعا بيىل 35 ملرد تەڭگە ءبولىندى. مۇنىڭ ءبارى حالىقتىڭ يگىلىگى ءۇشىن، ءومىر ءسۇرۋ ساپاسى مەن دەڭگەيىن ارتتىرۋ ماقساتىندا جاسالۋدا. ءبىزدىڭ ارمان-تىلەگىمىز ورتاق، ءبارىمىز بەيبىتشىلىكتە ءومىر ءسۇرۋدى قالايمىز، –دەدى ە.توعجانوۆ.

سورتوبە اۋىلىنداعى كەزدەسۋدە مەم­لەكەت باسشىسى قاسىم-جومارت توقاەۆ­تىڭ تاپسىرماسى بويىنشا اۋداندا جۇزەگە اسىرىلعان «بەيبىتشىلىك پەن كەلىسىم» جو­باسىنىڭ ناتيجەلەرى سارالاندى. بەيبىت­شىلىك پەن كەلىسىمدى ساقتاۋ مەن نىعايتۋعا باعىتتالعان جوبا اياسىندا قوعامدىق-ساياسي احۋالعا مونيتورينگ جۇرگىزىلىپ، جەرگى­لىكتى تۇرعىنداردى مازالايتىن ماسە­لەلەر انىقتالىپ، شەشىمىن تاپقان. جۇمىس توپتارى مىڭنان استام كەز­دەسۋ وتكىزىپ، وندا 30 مىڭعا جۋىق تۇر­عىن قامتىل­عان. وڭىرگە ساپارى بارىسىندا ەرالى توع­جانوۆ ماسانچي اۋىلىن­داعى اعىمدا­عى جىلدىڭ اقپان ايىندا ورىن العان تار­تىپسىزدىكتەردەن كەيىن قاي­تا قالپىنا كەلتى­رىلگەن بىرقاتار كوممەرتسيا­لىق نىساندار مەن تۇرعىن ۇيلەردى ارالادى. اۋىل تۇر­عىندارى كورسەتكەن قولداۋى ءۇشىن مەم­لەكەت باسشىسىنا العىستارىن جەتكىزدى.

دەلەگاتسيا قورداي اۋدانىنىڭ گۆار­دەيسكي اۋىلىنداعى بيولوگيالىق قاۋىپ­سىزدىك پروبلەمالارىن عىلىمي-زەرتتەۋ ينستيتۋتىنىڭ جانىنداعى وتاندىق يممۋندىق پرەپاراتتار شىعاراتىن زاۋىت­تىڭ قۇرىلىسىن بارىپ كوردى. اتالعان زاۋىت مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس سالىنۋدا. ۆيتسە-پرەمەرگە زاۋىتتىڭ قۇرىلىس-مون­تاجداۋ جۇمىستارىنىڭ بيىل اياقتا­لاتىندىعى، قازىر بارلىق ينجەنەرلىك كوممۋنيكاتسيالار جۇرگىزىلگەنى باياندالدى. زاۋىت ءوز جۇمىسىن كەلەسى جىلدىڭ ءبىرىن­شى توقسانىندا باستايدى دەپ جوس­پارلانۋدا. مۇندا الەمدىك ستاندارتتارعا سايكەس يممۋنوبيولوگيالىق پرەپاراتتار، ونىڭ ىشىندە كوروناۆيرۋس ينفەكتسياسىنا، تۇماۋعا، تۋبەركۋلەزگە، برۋتسەللەزگە، نودۋليارلىق دەرماتيتكە جانە باسقا دا ينفەك­تسيالىق اۋرۋلارعا قارسى ۆاكتسينالار شىعارىلاتىن بولادى. جىل سايىن بيو­پرەپاراتتاردىڭ 30-60 ميلليون دوزاسىن ءوندىرۋ جوسپارلانعان. ۇكىمەت باسشى­سىنىڭ ورىنباسارى ينستيتۋت قىزمەت­كەر­لەرىمەن كەزدەسىپ، ولارمەن اڭگىمەلەستى.

  جامبىل وبلىسىنىڭ اكىمى بەردىبەك ساپارباەۆ اتالعان ءىرى زاۋىتتىڭ سالىنۋى ايماق ەكونوميكاسىنىڭ دامۋىنا جاڭا سەرپىن بەرەتىنىن اتاپ ءوتتى. بۇدان سوڭ ە.توعجانوۆ ينستيتۋت  قىزمەتكەرلەرىنە ار­نالعان 60 پاتەرلىك ءۇيدىڭ قۇرىلىس بارى­سىمەن تانىستى. نىسان كەلەسى جىلدىڭ باسىندا پايدالانۋعا بەرىلەدى. تاعى ەكى تۇرعىن ءۇيدىڭ قۇرىلىسى جوسپارلانۋدا. ينستيتۋت جۇمىسىمەن تانىسقان سوڭ دەلەگاتسيا قورداي اۋدانىنىڭ دامۋى، سونداي-اق عىلىمي-زەرتتەۋ ينستي­تۋ­تى­نىڭ وزەكتى ماسەلەلەرىن شەشۋ جونىن­دە كەڭەس وتكىزدى.

 سونىمەن قاتار، ە.توعجانوۆ وبلىستىق جەدەل جاردەم ستانساسىنىڭ باس دارىگەرى ۆەنەرا بالقىبەكوۆاعا جەدەل جاردەم كولىكتەرىنىڭ كىلتىن تابىس ەتتى.

– جامبىل وبلىسىنا جۇمىس ساپارىمدى قورداي اۋدانىنان باستادىم. پرەزيدەنت قاسىم-جومارت توقاەۆتىڭ تاپسىرماسىنا سايكەس، بەيبىتشىلىك جانە كەلىسىم جوباسى اياسىنداعى كۇن تارتىبىندە تۇرعان ماسەلەلەر وندا ءجۇز پايىز ورىندالعانىن كوردىم. جەرگىلىكتى حالىقپەن، ءاربىر ەتنوس وكىلدەرىمەن كەزدەسىپ، پىكىرلەستىم. كوروناۆيرۋستىڭ اسەرىنەن مەديتسينا سالاسىندا كوپتەگەن قيىندىقتار تۋىنداعانىن بىلەسىزدەر. ول كەزەڭدى بىرلىكتىڭ ارقاسىندا بۇكىل ەل بولىپ بىرگە ەڭسەردىك. ونداي قيىندىق ەندى بولماسىن دەپ تىلەيىك. مىنە، بۇگىن ءوڭىردىڭ دەنساۋلىق سالاسىن ىلگەرىلەتەتىندەي ماتەريال­دىق-تەحنيكالىق بازاسى جاراقتاندىرىلىپ وتىر. الەمدى جايلاعان وسى ىندەتتىڭ الدىن الۋ شارالارىنا بايلا­نىستى ناقتى تاپسىرمالار دا بەرىلدى. سونىڭ ءبىرازى جۇزەگە اسىرىلعان. ءدارى-دارمەكتىڭ ەكى ايلىق قورى تولىقتاي قامتاماسىز ەتىلگەن. سونىمەن قاتار ءاربىر وبلىستا ارنايى تۇراقتىلىق قورلارى قۇرىلعان بولاتىن. جامبىل وبلىسى دا بۇل ءىستى ستاندارتقا ساي ورىنداپ وتىر، – دەدى ۆيتسە-پرەمەر.

ۇكىمەتتىك دەلەگاتسيا ايماقتىڭ كوروناۆيرۋس ىندەتىنە ىقتيمال جاڭا تولقىنىنا دايىندىعىن تەكسەرىپ، تاراز قالالىق 200 توسەكتىك كوپبەيىندى اۋرۋحاناسىنىڭ ينفەكتسيالىق بولىگىنە باردى. بۇل رەتتە ە.توعجانوۆ مەديتسينا قىزمەتكەرلەرىنە ناۋقاسقا وكپەنى جاساندى جەلدەتۋ قاجەت بولاتىن اسقىنۋلاردىڭ الدىن الۋ جانە بولدىرماۋ قاجەتتىگىن تاپسىردى.

وڭىرگە ساپارى بارىسىندا ە.توعجانوۆ جامبىل اۋدانىنا دا باردى.ول ءوندىرىس جەلىسىن، ءدارى-دارمەكتەر مەن مەديتسينالىق بۇيىمداردىڭ قويماسىن ارالاپ، سەرىك­تەستىكتىڭ جۇمىسىن جوعارى باعالادى. سونىمەن قاتار دارىگەرلەرگە ەرەن ەڭبەگى ءۇشىن العىس ايتىپ، مەملەكەت باسشىسى كوروناۆيرۋسقا قارسى ءىس-قيمىل بويىنشا ۇكىمەت پەن دارىگەرلەردىڭ الدىنا ناقتى مىندەتتەر قويعانىن اتاپ ءوتتى.

– ءبىزدىڭ مىندەتىمىز – وسى تاپسىرما­لاردىڭ بارلىعىن ورىنداۋ. بۇل ءۇشىن ءدارى-دارمەكتەردىڭ ەكى ايلىق قورى قا­لىپ­تاستى، دەنساۋلىق ساقتاۋ مەكەمەلەرىنىڭ ماتەريالدىق-تەحنيكالىق بازاسى جاڭار­تىلۋدا. جامبىل وبلىسىنىڭ شالعاي ەلدى مەكەندەرىن ساپالى مەديتسينالىق كومەكپەن قامتاماسىز ەتۋ ءۇشىن سەگىز ءموبيلدى كەشەن الىندى. جەدەل جاردەم ستانساسىنىڭ اۆتوپاركى جاڭارتىلۋدا. مۇنىڭ ءبارى كومەكتى دەر كەزىندە كورسەتۋگە مۇمكىندىك بەرەدى، – ۆيتسە-پرەمەر. بۇدان كەيىن وبلىستىق اكىمدىكتە بەينە-بايلانىس ارقىلى ۇكىمەتتىك دەلەگاتسيانىڭ وڭىرگە جۇمىس ساپارىنىڭ قورىتىندىسى سارالاندى.

 

جامبىل وبلىسى

 

سوڭعى جاڭالىقتار

ۇقساس جاڭالىقتار