قوعام • 24 قاراشا، 2020

ەلوردادا مەديتسينالىق قىزمەتتەردىڭ ساپاسىنا قاتىستى 18 304 كەمشىلىك انىقتالدى

12 رەت كورسەتىلدى

الەۋمەتتىك مەديتسينالىق ساقتاندىرۋ قورىنىڭ نۇر-سۇلتان قالاسى بويىنشا فيليالىنىڭ ساراپشىلارى تەگىن مەديتسينالىق كومەكتىڭ كەپىلدىك بەرىلگەن كولەمى (تمككك) شەڭبەرىندە جانە ءمامس پاكەتى بويىنشا جەتكىزۋشىلەر كورسەتكەن قىزمەتتەردىڭ ساپاسى مەن كولەمى بويىنشا اي سايىن  مونيتورينگ جۇرگىزىپ وتىرادى، دەپ حابارلايدى Egemen.kz.

2020 جىلدىڭ 30 قازانىنداعى جاعداي بويىنشا تۇرعىندارعا مەديتسينالىق كومەك كورسەتۋگە قاتىستى 18 304 (ونىڭ ىشىندە قازان ايىندا 1 114) كەمشىلىك انىقتالىپ، مەديتسينالىق ۇيىمدارعا  373 136 مىڭ (ونىڭ ىشىندە قازان ايىندا 52 298 مىڭ) سومادان اسا ايىپپۇل سالىندى.

«ايتا كەتەيىك، تۇرعىندارعا تمككك جانە ءمامس پاكەتتەرى بويىنشا ۇسىنىلعان قىزمەتتەردىڭ ساپاسى مەن كولەمىنە مونيتورينگ جۇرگىزىلگەننەن كەيىن عانا، مەديتسينالىق كومەك كورسەتۋ ستاندارتتارى مەن ەرەجەلەرىن، سونداي-اق كلينيكالىق حاتتامالاردىڭ ۇسىنىمدارىن ساقتاي وتىرىپ، قور جەتكىزۋشىلەرىنە ءىس جۇزىندە كورسەتىلگەن جانە قۇجاتپەن راستالعان قىزمەتتەرگە اقى تولەنەدى.

انىقتالعان كەمشىلىكتەردىڭ كوپشىلىگى جان باسىنا شاققانداعى نورماتيۆكە كىرمەيتىن، ءاربىر قىزمەتكە جەكە تولەنەتىن كونسۋلتاتسيالىق-دياگنوستيكالىق قىزمەتتەرگە بايلانىستى. مەديتسينالىق قىزمەتتەردىڭ ساپاسىن مونيتورينگتەۋ ءبولىمىنىڭ ساراپشىلارى جالپى قۇنى 19 259 مىڭ (ونىڭ ىشىندە قازان ايى ءۇشىن 3 423 مىڭ ) تەڭگە بولاتىن 12 310 (ونىڭ ىشىندە قازان ايىندا 708) كەمشىلىك انىقتادى. سونداي-اق امبۋلاتوريالىق-ەمحانالىق كومەك كورسەتۋ كەزىندە جىبەرىلگەن 1 721 (ونىڭ ىشىندە قازان ايىندا 15) كەمشىلىك، ستاتسيونارلاردا مەديتسينالىق كومەك كورسەتۋ كەزىندە 4 273 (ونىڭ ىشىندە قازان ايىندا 391) دەرەك بەلگىلى بولدى»، - دەپ اتاپ ءوتتى «الەۋمەتتىك مەديتسينالىق ساقتاندىرۋ قورى» كەاق نۇر-سۇلتان قالاسى بويىنشا فيليالىنىڭ ديرەكتورى نۇرلىبەك قابدىقاپاروۆ.

ء«تۇرلى مەملەكەتتىك دەرەكقورلارداعى دەرەكتەردى بىرىكتىرۋ جانە IT قۇرالدارىن قولدانۋ وسى دەرەكتەردى وڭدەۋ مونيتورينگىنىڭ ساپاسىن ايتارلىقتاي ارتتىرادى. بۇل ادامي فاكتوردى ازايتۋعا مۇمكىندىك بەرەدى. قازىر قور ءارتۇرلى  اقپارات جۇيەلەرى مەن تىركەۋ جۇيەلەرىنىڭ دەرەكتەرىن ءبىر الاڭدا ينتەگراتسيالاۋ ارقىلى اقپارات جۇيەلەرىندە مەديتسينالىق قىزمەتتەردىڭ ساپاسى مەن كولەمىن تولاسسىز مونيتورينگتەۋ بويىنشا جۇمىس جۇرگىزۋدە. بۇل مونيتورينگ پروتسەسىن بارىنشا اۆتوماتتاندىرۋعا مۇمكىندىك بەرەدى»، - دەپ ءتۇسىندىردى امسق نۇر-سۇلتان قالاسى بويىنشا فيليالىنىڭ مەديتسينالىق كومەك كورسەتۋ ساپاسىن مونيتورينگتەۋ ءبولىمىنىڭ جەتەكشىسى ساندۋعاش بولىسبەكوۆا.

تۇرعىندار تاراپىنان قوعامدىق باقىلاۋ، ءبىر جاعىنان  الەۋمەتتىك مەديتسينالىق ساقتاندىرۋ قورىنا  بۇرمالاۋشىلىقتاردى انىقتاۋعا كومەكتەسەدى، ەكىنشى جاعىنان مەديتسينالىق ۇيىمداردى تارتىپكە كەلتىرەدى. سوندىقتان ازاماتتاردى ءموبيلدى قوسىمشالاردا ءوز دەرەكتەرىن تەكسەرۋگە جانە سايكەسسىزدىكتەر انىقتالعان جاعدايدا قوردىڭ ەلوردالىق فيليالىنا حابارلاۋعا شاقىرامىز. سونداي-اق 1406 تەلەفونىنا نەمەسە Qoldau 24/7 ءموبيلدى قوسىمشاسى ارقىلى حابارلاسۋعا بولادى.

سوڭعى جاڭالىقتار

ۇقساس جاڭالىقتار