قوعام • 24 قاراشا، 2020

ەرالى توعجانوۆ COVID-19-عا قارسى ۆاكتسينا شىعاراتىن زاۋىتتىڭ سالىنۋ بارىسىمەن تانىستى

14 رەت كورسەتىلدى

پرەمەر-ءمينيستردىڭ ورىنباسارى ەرالى توعجانوۆ باستاعان ۇكىمەتتىك دەلەگاتسيا قورداي اۋدانىنا باردى، دەپ حابارلايدى Egemen.kz پرەمەر-ءمينيستردىڭ ءباسپاسوز قىزمەتىنە سىلتەمە جاساپ.

جۇمىس ساپارى بارىسىندا ۆيتسە-پرەمەر گۆاردەيسكي اۋىلىنداعى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى جانىنداعى وتاندىق يممۋندىق پرەپاراتتار شىعاراتىن زاۋىتتىڭ قۇرىلىسى بارىسىمەن تانىستى.

زاۋىت مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس سالىنۋدا. قۇرىلىس-مونتاجداۋ جۇمىستارى بيىل اياقتالادى، قازىرگى ۋاقىتتا بارلىق ينجەنەرلىك كوممۋنيكاتسيالار جۇرگىزىلگەن.

جۇمىسقا 145 ادام جانە 30 بىرلىك تەحنيكا جۇمىلىلعان. زاۋىت ءوز جۇمىسىن كەلەسى جىلدىڭ ءبىرىنشى توقسانىندا باستايدى. مۇندا الەمدىك ستاندارتتارعا سايكەس يممۋنوبيولوگيالىق پرەپاراتتار، ونىڭ ىشىندە كوروناۆيرۋس ينفەكتسياسىنا، تۇماۋعا، تۋبەركۋلەزگە، برۋتسەللەزگە، نودۋليارلىق دەرماتيتكە باسقا دا ينفەكتسيالىق اۋرۋلارعا قارسى ۆاكتسينالار شىعارىلاتىن بولادى. جىل سايىن بيوپرەپاراتتاردىڭ 30-60 ملن دوزاسىن ءوندىرۋ جوسپارلانىپ وتىر.

پرەمەر-ءمينيستردىڭ ورىنباسارى ينستيتۋت قىزمەتكەرلەرىمەن كەزدەسىپ، ولاردى اڭگىمەگە تارتتى. 

"بيوفارماتسەۆتيكالىق زاۋىتتىڭ قۇرىلىسى جانە كوروناۆيرۋسقا قارسى وتاندىق ۆاكتسينا جاساۋ ەل پرەزيدەنتىنىڭ ەرەكشە باقىلاۋىندا. ءبىز بۇگىن بارلىق كوكەيكەستى ماسەلەلەردى وسى جەردە تالقىلاپ، شەشۋ ءۇشىن ارنايى كەلىپ وتىرمىز. تۇرعىن ۇيمەن جانە ماتەريالدىق-تەحنيكالىق قامتاماسىز ەتۋ، جالاقىنى كوتەرۋ ماسەلەلەرى قازىردىڭ وزىندە شەشىمىن تابۋدا. سونىمەن بىرگە سىزدەرگە ۇلكەن جاۋاپكەرشىلىك جۇكتەلىپ وتىر. بۇكىل ەل سىزدەرگە ءۇمىت ارتادى"، - دەدى ە. توعجانوۆ.

جامبىل وبلىسىنىڭ اكىمى بەردىبەك ساپارباەۆ ءىرى زاۋىتتىڭ سالىنۋى ايماق ەكونوميكاسىنىڭ دامۋىنا جاڭا سەرپىن بەرەتىنىن اتاپ ءوتتى. بۇدان سوڭ ەرالى توعجانوۆ ينستيتۋت  قىزمەتكەرلەرىنە ارنالعان 60 پاتەرلىك ءۇيدىڭ قۇرىلىس بارىسىمەن تانىستى.

نىساننىڭ قۇرىلىسى تامىز ايىندا باستالعان، ول كەلەسى جىلدىڭ باسىندا پايدالانۋعا بەرىلەدى. تاعى ەكى تۇرعىن ءۇيدىڭ قۇرىلىسى جوسپارلانۋدا. ينستيتۋت جۇمىسىمەن تانىسقان سوڭ ەرالى توعجانوۆ قورداي اۋدانىنىڭ دامۋى، سونداي-اق عىلىمي-زەرتتەۋ ينستيتۋتىنىڭ وزەكتى ماسەلەلەرىن شەشۋ جونىندە كەڭەس وتكىزدى.

سوڭعى جاڭالىقتار

ۇقساس جاڭالىقتار