سپورت • 24 قاراشا، 2020

ايەلدەر كۇرەسىنەن قازاقستان چەمپيوناتى اياقتالدى

31 رەت كورسەتىلدى

الماتىداعى "دوستىق" سپورت كەشەنىندە ايەلدەر كۇرەسىنەن قازاقستان چەمپيوناتى ءوز مارەسىنە جەتتى. بۇل باسەكەدە ساقا سپورتشىلارمەن قاتار، دارىندى جاستار دا بوي كورسەتتى. ءبىر عانا تاۋلىك ىشىندە ولار 10 سالماق دارەجەسى بويىنشا جەڭىمپازدار مەن جۇلدەگەرلەردى انىقتادى، دەپ حابارلايدى Egemen.kz.

ايتۋلى جارىستاعى 76 كيلو سالماقتىڭ فينالدىق سايىسى كوپشىلىك نازارىن وزىنە اۋداردى. ويتكەنى شەشۋشى سىندا جولدارى قيىسقان قوس قارسىلاس تا وتە مىقتى ەدى. اتاپ ايتساق، قاراعاندىلىق ەلميرا سىزدىقوۆا ازيا ويىندارىندا ءبىر مارتە جانە ازيا بىرىنشىلىگىندە بەس رەت جەڭىس تۇعىرىنا كوتەرىلگەن. وسكەمەندىك ەكاتەرينا لاريونوۆا الەم جانە قۇرلىق چەمپيوناتتارىنىڭ قولا جۇلدەنى ەنشىلەگەن. بۇل بالۋاننىڭ ەكەۋى دە 2016 جىلى ريو وليمپياداسىندا ءۇشىنشى ورىنعا تابان تىرەپ، الىستاعى برازيليادا كوك بايراعىمىزدى بيىكتە جەلبىرەتتى. عالامدىق دودادا ولار ءتۇرلى سالماق دارەجەلەرىندە كۇش سىناسقان ەدى. ال الماتى تورىندەگى تارتىستا ەلميرانىڭ باسىمدىعى بايقالدى. ەكاتەرينادان ايلاسىن اسىرعان ول التىننان القا تاعىندى.

الماتى وبلىسىنىڭ نامىسىن قورعاعان قۇرلىق بىرىنشىلىگىنىڭ ەكى دۇركىن جۇلدەگەرى اياۋلىم قاسىموۆا (62 كيلو) مەن ازيا چەمپيونى ءجاميلا باقبەرگەنوۆا (68 كيلو) وزدەرىنىڭ مىقتىلىعىن بىردەن مويىنداتتى. اقتىق سىنعا دەيىن القىنباي جەتكەن اياۋلىم شەشۋشى تۇستا ءوزىنىڭ كوماندالىق ارىپتەسى يرينا كۋزنەتسوۆانى قاپى قالدىرسا، ءجاميلا شىعىس قازاقستان وبلىسىنىڭ وكىلى يرينا كوزيۋليناعا شاڭ قاپتىرىپ كەتتى.

نۇر-سۇلتاننان كەلگەن بۇرىمدىلار دا بابىندا ەكەندەرىن بايقاتىپ، ءۇش رەت جەڭىس تۇعىرىنىڭ ەڭ بيىك ساتىسىنا كوتەرىلدى. بۇل جولى سۆەتلانا انكيچەۆا (50 كيلو)، ەمما تيسينا (57 كيلو) جانە ديانا كايۋموۆانىڭ (57 كيلو) باعى جاندى. سونداي-اق قىزىلوردالىق اسىلزات ساعىمباي (53 كيلو)، شىمكەنتتىك ايشا ءۋاليشان (55 كيلو)، گاۋحار مۇقاتاي (65 كيلو) جانە ۆالەريا گونچاروۆا (72 كيلو) سىندى ارۋلار التىن مەدالدى مويىندارىنا ءىلدى.     

سوڭعى جاڭالىقتار

ۇقساس جاڭالىقتار