ساياسات • 24 قاراشا، 2020

كانديداتتار ءتىزىمى بەكىتىلدى

10 رەت كورسەتىلدى

ەلوردادا قازاقستان حالىق پارتياسىنىڭ كەزەكتەن تىس XVI سەزى ءوتتى. جيىن بارىسىندا پارتيا وكىلدەرى سايلاۋالدى باعدارلاماسىنىڭ جوباسىن جانە ماجىلىسكە دەپۋتاتتىققا كانديداتتاردىڭ ءتىزىمىن تانىستىردى.

ءىس-شارا بارىسىندا ءماجىلىس دەپۋتاتى يرينا سميرنوۆا قازاقستان حالىق پارتياسىنىڭ سايلاۋالدى باعدارلاماسىنىڭ جوباسى تۋرالى باياندادى. ونىڭ ايتۋىنشا، قازاقستان حالىق پارتياسى قاراپايىم ادامداردىڭ قۇقىقتارى مەن زاڭدى مۇددەلەرىن قورعاۋ ءىسىن جالعاستىرۋ ءۇشىن پارلامەنتكە بارماق.

«بىرىنشىدەن، ءبىلىم مەن مەديتسينانىڭ قولجەتىمدىلىگى مەن ساپاسى ەسكەرىلىپ وتىر. ءبىلىم الۋ قولجەتىمدى بولۋى ءتيىس. ول ءۇشىن تەگىن ءبىلىم الۋعا كوشۋ كەرەك. ەكىنشىدەن، حالىقتىڭ باسپانا ماسەلەسىن شەشۋگە ەكپىن قويىلادى. ءبىز قازاقستاندىقتار ءۇشىن جەر تەلىمى ماسەلەسىن تۇبەگەيلى شەشەمىز. ءار وتباسى باس­پانا جانە ءۇي شارۋاشىلىعى نىسانىن سالۋ ءۇشىن 20 سوتىق جەر الادى. مەملەكەت بۇل تەلىمدەرگە قاجەتتى ينفراقۇرىلىمدى تارتادى. ءۇشىنشى باستاما زەينەت جاسىنا جەتكەندەرگە جاعداي جاساۋعا ارنالعان. وسى ورايدا زەينەت جاسىن 60 جاسقا دەيىن تومەندەتۋ ەسكەرىلگەن. ءتورتىنشى باستامادا جەر رەسۋرستارىنا مەملەكەتتىك مەنشىكتى قورعاۋ قامتىلعان. بەسىنشىدەن، اۋىل شارۋاشىلىعى ەكونوميكانىڭ درايۆەرى بولىپ، ەلدىڭ ازىق-ت ۇلىك قاۋىپسىزدىگىن قامتاماسىز ەتەدى»، دەدى ي.سميرنوۆا.

سونداي-اق سايلاۋالدى باعدارلامادا بانكتەردىڭ ەسەبىنەن جەكە ءارى زاڭدى تۇلعالار ءۇشىن نەسيەلىك راقىمشىلىق جۇرگىزۋ قادامى قاراستىرىلعان. بۇدان بولەك، سالىق ساياساتى، مەملەكەتتىك شەشىمدەردى جۇزەگە اسىرۋدىڭ تيىمدىلىگىن باقىلاۋ باستاماسى قامتىلعان. مۇنىمەن قوسا سوت جۇيەسىنە قاتىستى ۇسىنىستار ەسكەرىلىپ، حالىقتىڭ رۋحاني مۇراسىنا نازار اۋدارىلىپ وتىر.

قازاقستان حالىق پارتياسىنىڭ جيىن بارىسىندا ماجىلىسكە دەپۋتاتتىققا كانديداتتاردىڭ پارتيالىق ءتىزىمى بەكىتىلدى. بۇل تۋرالى پارتيا حاتشىسى جامبىل احمەتبەكوۆ بايانداما جاسادى.

ء«بىز ساياسي شوۋ جاساۋدان اۋلاق بولدىق. بۇل تۇرعىدا كاسىبي بىلىكتى ادامداردى تاڭداۋعا، ولاردىڭ ەڭبەگى مەن جەتىستىگىنە قاراۋعا ءمان بەردىك. اتاپ ايتقاندا، دەپۋتاتتىق مىندەتىن ادال اتقاراتىنداردى، قيىندىقتارعا مويىمايتىن ازاماتتاردى ىرىكتەيمىز. تىزىمگە پارتيا جۇمىسىندا ءوزىن كاسىبي بىلىكتىلىگى جاعىنان كورسەتە العان ادامدار ەندى.

ءبىزدىڭ پارتيا ءماجىلىس جانە ءماسليحات سايلاۋىنا قاتىسادى. قازاقستان حالقى ءبىزدىڭ يدەيالار مەن باستامالاردى قولدايدى دەپ ۇمىتتەنەمىز. 125 ادام تاڭدالدى، ونىڭ ىشىندە ەرلەردىڭ ۇلەسى – 89 ادام نەمەسە 71،2 پايىزى، ال ايەلدەر – 36 ادام نەمەسە 28،8 پايىزى. جاستاردىڭ ۇلەسى – 7،2 پايىز، ياعني 9 ادام ەندى. ناتيجەسىندە، زاڭعا سايكەس كۆوتانى ەسكەرىپ وتىرمىز. وسىلايشا، ونىڭ مولشەرى 36 پايىزعا جەتتى. كانديداتتاردىڭ ورتاشا جاسى – 46-دا»، دەدى ج.احمەتبەكوۆ.

ماجىلىسكە ۇسىنىلعان ۇمىتكەرلەر اراسىندا قازىر­گى ءماجىلىس دەپۋتاتتارى ايقىن قوڭىروۆ، جامبىل احمەتبەكوۆ، يرينا سميرنوۆا، ماگەررام ماگەر­را­موۆ، بۇعان قوسا، «كيپر» ساراپتاما توبىنىڭ جەتەك­شىسى ەرلان سمايلوۆ، ءال-فارابي اتىنداعى قازاق ۇلتتىق ۋنيۆەرسيتەتى فيلوسوفيا جانە ساياساتتا­نۋ فاكۋلتەتىنىڭ دەكانى ءاليا ماساليموۆا، قارا­عان­دىلىق ازاماتتىق بەلسەندى ۆاسيلي كليماكوۆ بار.

سوڭعى جاڭالىقتار

اۋليە اتا ءھام ۇلى جىراۋ

رۋحانيات • كەشە

ۇقساس جاڭالىقتار