قۇرىلتايدى شاقىرۋ تۋرالى شەشىمدى پارتيانىڭ ورتالىق كەڭەسىنىڭ پرەزيديۋمى وسى جىلى 2 قاراشادا قابىلدادى. وڭىرلەردەن وكىلدىك نورمالارى بەكىتىلدى. بارلىق فيليالعا پارتيا كونفەرەنتسيالارىن وتكىزۋ تاپسىرىلدى. كونفەرەنتسيالار بەلگىلەنگەن مەرزىمدەردە وتكىزىلدى. وسىلايشا, قۇرىلتايعا 250 دەلەگات سايلانىپتى. سونىڭ 130-ى شەشۋشى داۋىسپەن دەلەگات اتانسا, قالعاندارى كەڭەسشى داۋىسپەن سايلانىپ وتىر. ەپيدەميالىق جاعدايعا بايلانىستى قۇرىلتاي وتكەن عيماراتتا باس-اياعى 47 دەلەگات قانا بولدى. قالعاندارى پارتيانىڭ ايماقتىق فيليالدارىندا قۇرىلتايعا ونلاين رەجىمدە قاتىستى. ولاردىڭ بارلىعى ءتيىستى تىركەۋدەن وتكەن.
– سوڭعى كەزدەگى بىرقاتار وقيعالار تىزبەگى – بىلتىر قازاقستان رەسپۋبليكاسىنىڭ تۇڭعىش پرەزيدەنتى مەملەكەت بيلىگىن وركەنيەتتى تۇردە جاڭا باسشىعا تاپسىرۋى دەر كەزىندە بولعانىن ۋاقىتتىڭ ءوزى دالەلدەپ وتىر. نۇرسۇلتان نازارباەۆتىڭ پرەزيدەنتتىك جۇيەسى ەلىمىزدىڭ تاۋەلسىزدىك باستاۋىندا مەملەكەتتىك ينستيتۋتتاردىڭ قالىپتاسۋىنداعى, تۇبەگەيلى نارىقتىق جانە قوعامدىق رەفورمالاردى جۇرگىزۋدەگى جانە باسقا ەلدەرمەن قارىم-قاتىناس ورناتۋداعى تاريحي ميسسياسىن ورىندادى. كەلەسى كەزەڭگە قازاقستان قالىپتاسقان مەملەكەت رەتىندە اياق باستى. ال ەندىگى ماسەلەلەردى شەشۋ ءۇشىن جاڭا تاسىلدەر كەرەك. مەملەكەت باسقارۋ ىسىنە قوعام جان-جاقتى ارالاسۋى جانە ونى باقىلاۋى قاجەت, – دەدى «اق جول» دەموكراتيالىق پارتياسىنىڭ توراعاسى ازات پەرۋاشەۆ.
ونىڭ ايتۋىنشا, ەلىمىزگە الەۋمەتتىك-ەكونوميكالىق سالادا دا, ساياسي جۇيەگە دە تۇبەگەيلى وزگەرىستەر قاجەت.
– اتالعان وزگەرىستەردى تىم سوزا بەرۋدىڭ قاۋىپتىلىگى سوندا, بۇل ۋكراينا, بەلارۋس پەن قىرعىز ەلىندەگىدەي مەملەكەتتىك داعدارىسقا اكەپ سوعۋى مۇمكىن. ال تاۋەلسىزدىكتىڭ ەڭ باستى كەپىلى – قارۋ ەمەس, ءوز مەملەكەتىن سىيلايتىن, باعالايتىن ازاماتتىق قوعام بولۋى كەرەك. سوندىقتان قازىرگى بيلىك مودەلىنە ءبىر عانا بالاما بار. ول – تەرەڭ الەۋمەتتىك-ەكونوميكالىق جانە ساياسي رەفورمالاردى قابىلداپ, جۇزەگە اسىرۋ قاجەت. «اق جول» دەموكراتيالىق پارتياسى جاڭا جانە ءادىل قازاقستانعا اپاراتىن وزگەرىستەر باعدارلاماسىن ۇسىنادى. سول باعدارلاماداعى باستى باسىمدىعىمىز – تاۋەلسىزدىك جانە الاش ۇلتتىق يدەياسى, – دەيدى پارتيا توراعاسى.
ا.پەرۋاشەۆتىڭ پىكىرىنشە, ەلىمىزدىڭ تاۋەلسىزدىگى مەن ۇلتتىق مۇددەلەر – مەملەكەتتىڭ نەگىزگى باسىمدىقتارى. سوندىقتان ەل ەگەمەندىگىن قامتاماسىز ەتۋ جانە ونىڭ ۇلتتىق مۇددەلەرىن قورعاۋ – ءوزىن رەسپۋبليكا ازاماتى سانايتىن كەز كەلگەن ادامنىڭ پارىزى.
– تاۋەلسىزدىك – ءبىزدىڭ ەلىمىز, جەرىمىز, ءتىلىمىز بەن ءدىلىمىز. تاۋەلسىزدىك – ءبىزدىڭ ءوز جولىمىزدى تاڭداۋ مۇمكىندىگىمىز, كەلەشەك ۇرپاقتىڭ بولاشاعى ءۇشىن ءبىزدىڭ جاۋاپكەرشىلىگىمىز. تاۋەلسىزدىك پەن ەلىمىزدىڭ تۇتاستىعى – ءاربىر ادامنىڭ ءومىرى, قۇقىعى جانە بوستاندىعىمەن قاتار تۇراتىن باستى قۇندىلىق. تاۋەلسىزدىك باستاۋىندا قازاق حالقىنىڭ ەركىندىگى مەن ەلدىگىنىڭ تاريحي مۇراتى رەتىندەگى الاش ۇلتتىق يدەياسى جاتىر. قازاق ەلىنە الاشتان ارتىق يدەيا جوق. «اق جول» دەموكراتيالىق پارتياسى مەملەكەتتىك ءتىلدىڭ قولدانۋ اياسىن كەڭەيتۋدى قولدايدى. ءتىلىمىزدى ەكونوميكا مەن قارجى سالاسىنا, مەملەكەتتىك باسقارۋ مەن شەتەلدىك ينۆەستورلار جۇمىسىنا مەملەكەتتىك دەڭگەيگە ساي ەنگىزۋىمىز كەرەك, – دەيدى ا.پەرۋاشەۆ.
پارتيا توراعاسىنىڭ ايتۋىنشا, بيىل «الاش» اۆتونومياسىنان باستاۋ الاتىن جانە قازىرگى قازاقستاننىڭ نەگىزىن قالاعان قازاق رەسپۋبليكاسىنا 100 جىل تولىپ وتىر.
– الدىمەن قاتەلەسىپ, «قىرعىز» اۆتونوميالىق رەسپۋبليكاسى دەپ اتالىپ, 5 جىلدان كەيىن سۇلتانبەك قوجان ۇلى, ساكەن سەيفۋللين, جالاۋ مىڭباي ۇلى جانە دە باسقا تۇلعالاردىڭ ارقاسىندا رەسپۋبليكامىزعا ۇلتىمىزدىڭ ءتول اتاۋى قايتارىلدى. وتكەن جىلى «اق جول» دەموكراتيالىق پارتياسى ۇكىمەتكە بۇل تاريحي داتانى رەسمي اتاپ ءوتۋدى جانە «قازاقستان» اتىمەن قاتار, توتاليتارلىق كەڭەس بيلىگىنىڭ ءوزى مويىنداعان «قازاق رەسپۋبليكاسى» اتاۋىن قولدانۋ تۋرالى ماسەلەنى كوتەردى. بۇل باستامانى ش.ءۋاليحانوۆ اتىنداعى تاريح ينستيتۋتى دا قولدادى, بىراق ءبىزدىڭ شەنەۋنىكتەر ءۇنسىز قالدى. سوندا دا ءبىز تاريحي بىرەگەيلىگىمىزدى بىلدىرەتىن قازاق رەسپۋبليكاسى مەملەكەتتىك اتاۋىن قايتارۋدى ءجون دەپ سانايمىز, – دەيدى پارتيا توراعاسى.
