رۋسلاندى قاعىپ كەتكەن كولىك سۇيەگىن سىندىرعانىمەن, ەرىك-جىگەرىن سىندىرعان جوق. باستىسى – باسى امان, باۋىرى ءبۇتىن. زايسان اۋدانىنداعى ۇلكەن قاراتال اۋىلىنىڭ تۇرعىنى رۋسلان قايراحوۆ بۇگىندە تەمىردەن ءتۇيىن ءتۇيىپ, سۇيىكتى ءىسىن كاسىبىنە اينالدىرعان. شەبەردىڭ قولى ورتاق دەگەندەي, ويۋلاپ جاساعان ءتۇرلى-ءتۇرلى بۇيىمدارىنا ارىسى سەمەي, وسكەمەننەن, بەرىسى زايساننان تاپسىرىستار ءتۇسىپ جاتادى. اسىرەسە گۇل قوياتىن سورەلەرگە, ويۋ-ورنەكتى قاقپاعا تاپسىرىس كوپ. شەبەر جىگىت تاعدىردىڭ سىناعىنا تاپ بولماس بۇرىن, اۆتوكولىكتەردىڭ شاناعىن تۇزەتۋمەن, بوياۋمەن اينالىسقان. سول ءۇشىن دە ۇستالىق جۇمىس وعان جات ەمەس.
– مەملەكەتتىڭ «ەڭبەك» باعدارلاماسى ارقىلى 2 ملن تەڭگە گرانت ۇتىپ الىپ, تەمىر يەتىن ستانوكقا قول جەتكىزدىم. جازداي مەكتەپتەرگە گۇل قوياتىن سورەلەر جاسادىم. ءسويتىپ كاسىبىمدى دوڭگەلەتىپ وتىرعان جايىم بار, – دەيدى رۋسلان.
كاسىبىنەن ناپاقاسىن ايىرىپ وتىرعان ول باستى بايلىق دەنساۋلىعى ەكەنىن ۇعىنعان. ۇنەمى بەلگىلى ۋاقىتتاردا وڭالتۋ ورتالىقتارىندا ەم الىپ, دەنساۋلىعىن تۇزەۋگە تىرىسادى. اپتاسىنا ەكى رەت زايسان قالاسىنداعى «دارمەن» ورتالىعىنا بارىپ, ءتۇرلى جاتتىعۋلارىن جاساپ, ماسساجىن الادى.
ەرەكشە قاجەتتىلىكتەرى بار بالالارعا, مۇمكىندىگى شەكتەۋلى ازاماتتارعا ارنايى الەۋمەتتىك قىزمەت كورسەتەتىن «دارمەن» كۇندىزگى بەيىمدەۋ ورتالىعى العاش 2015 جىلى اشىلعاندا 15 ادامعا عانا قىزمەت كورسەتەتىن. ال بۇگىندە 55-تەي ادام مۇندا كەلىپ ەم الادى. جىل وتە قىزمەت كورسەتۋ اياسى دا كەڭەيگەن. قازىرگى ۋاقىتتا ورتالىقتا پسيحولوگيالىق, پەداگوگيكالىق, ەڭبەك كابينەتتەرى, ماسساج بولىمدەرى, قولونەر جانە ۆوكال ۇيىرمەلەرى جۇمىس ىستەيدى.
– ەرەكشە قاجەتتىلىكتەرى بار بالالارعا بەيىمدەۋ ورتالىعىنىڭ الەۋمەتتىك پەداگوگتەرى, مەدبيكەلەر, ماسساجيستەر قىزمەت كورسەتەدى. قىزمەت تۇرلەرى الەۋمەتتىك قىزمەت كورسەتۋ ستاندارتىمەن شەكتەلىپ قانا قويماي, مۇمكىندىگى شەكتەۋلى جانداردىڭ جەكە باس ماسەلەلەرىنە دە الاڭداۋشىلىق ءبىلدىرىپ وتىرادى. ولار ارقاشان كومەك قولدارىن سوزۋعا ءازىر, – دەيدى «دارمەن» ورتالىعىنىڭ جەتەكشىسى جانسايا مۇستابەكوۆا.
سونىمەن قاتار ورتالىققا كەلگەن مۇمكىندىگى شەكتەۋلى ءار ادامعا قۇقىقتىق, پسيحولوگيالىق كەڭەستەر بەرىلەدى. مەرەكەلىك ءىس-شارالاردا اق داستارقان جايىلىپ, كونتسەرتتىك باعدارلامالار ۇسىنىلادى. قامكوڭىل جانداردىڭ كوڭىلدەرىن كوتەرۋ ءۇشىن ءتۇرلى ويىندار ويناتىلادى. شەكتەۋ شارالارىنا بايلانىستى ونداي مەرەكەلىك باسقوسۋلار بيىل عانا توقتاپ تۇر. بىراق بۇل قىسىلتاياڭ كەزەڭدە دە ورتالىقتىڭ ماماندارى تىنىم تاپپاعان. مۇمكىندىگى شەكتەۋلى جاندارعا مۇگەدەكتىك ساناتىن ونلاين اپەرۋ, قۇجاتتارىن رەسىمدەۋ سىندى جۇمىستاردى جۇيەلى ۇيىمداستىرىپ, ۋاقتىلى جوندەتىپ وتىرۋعا كومەكتەسكەن.
ورتالىقتىڭ تارباعاتاي اۋدانىندا سەگىز بولىمشەسى جۇمىس ىستەيدى. ولار الەۋمەتتىك تاپسىرىس اياسىندا اۋدانداعى 80 جالعىزباستى قارت اناعا ارنايى الەۋمەتتىك قىزمەت كورسەتەدى. ودان بولەك, جالعىز تۇراتىن قاريالارعا دا كومەك كورسەتىلەدى. اتاپ ايتساق, الەۋمەتتىك قىزمەتكەرلەر گۇلدانا ورازعاليەۆا, اسىلعايشا ىقىباەۆا, گۇلدانا قابدىراحمانوۆا 2016 جىلدان باستاپ جالعىز تۇراتىن قاريالارعا دەمەۋ بولىپ, قامقورلىق كورسەتىپ كەلەدى. ولار قارتتاردىڭ ۇيلەرىن جۋىپ-شايىپ, ازىق-ت ۇلىكتەرىن ۋاقتىلى اكەلىپ بەرىپ وتىرادى. اۋىرىپ قالعان جاعدايدا تولىققاندى ەم الۋىن جاۋاپكەرشىلىكپەن قاداعالايدى. مەرەكە-مەيرامداردا سىيلىقتارىن تاپسىرىپ, تۇرمىس جاعدايلارىنا بايلانىستى ازىق-ت ۇلىكپەن قامتاماسىز ەتەدى.
تاعدىر تالقىسىنا تۇسكەن جاندارعا قانداي كومەك كورسەتىلسە دە ازدىق ەتپەيدى. ولار ءۇشىن ەڭ كەرەگى – قوعامدا كەمباعال كۇي كەشپەي, مۇمكىندىكتەرىنە قاراي ەڭبەككە, وقۋ مەن بىلىمگە ارالاسۋ. سوندىقتان دا «دارمەن» سىندى بەيىمدەۋ ورتالىقتارىندا بىلىكتى ماماندار قىزمەت ەتىپ, قولدان كەلگەن كومەكتەرىنەن ايانىپ قالىپ وتىرعان جوق. ورتالىق ماماندارىنىڭ پىكىرىنشە, مۇمكىندىگى شەكتەۋلى ءار جان رۋسلانداي جىگەرىن قايراپ, وقىسا, ءبىلىم السا, ەڭبەك ەتسە, ەشكىم ەشكىمنەن كەم ءومىر سۇرمەيدى.
شىعىس قازاقستان وبلىسى,
زايسان اۋدانى
