ەكسپوزيتسيادا قازاقستان سۋرەتشىلەر وداعى مۇشەلەرى مەن ەلگە بەلگىلى قىلقالام شەبەرلەرى, قازاقستان ونەر اكادەمياسى وكىلدەرى جانە «المالى پاليترا» شىعارماشىلىق بىرلەستىگىنىڭ سۋرەتشىلەرىمەن قاتار, جاڭا بۋىن گرافيكتەردىڭ تۋىندىلارى توعىسقان.
گرافيكا – سىرتتاي قاراعاندا ۇستامدى, ال ىشكى يىرىمىندە اسا كۇردەلى ونەر. قاعاز بەتىندەگى قاراپايىم سىزىقتار مەن نازىك رەڭكتەر ارقىلى سۋرەتشىلەر ۋاقىت پەن كەڭىستىكتى, ادام بولمىسى مەن قوعام تىنىسىن بەينەلەيدى. مۇنداعى تۋىندىلار كورەرمەندى ءۇنسىز ديالوگقا شاقىرىپ, وي تەرەڭىنە جەتەلەيدى.
يۋرگەن بووس: قازاقستان فرانكفۋرت كىتاپ كورمەسىنە قوناق بولۋعا لايىق
ايتا كەتەرلىگى, ەل تاۋەلسىزدىگىنەن بەرگى وتىز جىلدان استام ۋاقىتتا ستانوكتىق گرافيكاعا ارنالعان مۇنداي اۋقىمدى كورمە ەكىنشى رەت ۇيىمداستىرىلىپ وتىر. بۇل – ۇلتتىق ونەر كەڭىستىگىندە گرافيكانىڭ ورنى مەن ماڭىزىن قايتا باعامداۋعا جول اشقان ماڭىزدى قادام.
كورمەگە الماتى, استانا, قاراعاندى, شىمكەنت, تاراز سىندى سەگىز وڭىردەن كەلگەن سۋرەتشىلەر قاتىسىپ, جۇزدەن استام تۋىندى ۇسىنىلعان. وفورت, ليتوگرافيا, لينوگراۆيۋرا سەكىلدى كلاسسيكالىق ادىستەر مەن زاماناۋي ەكسپەريمەنتتىك ىزدەنىستەر قاتار ءورىلىپ, ۇلتتىق بولمىس, تاريحي جاد, بۇگىنگى قوعامنىڭ كۇردەلى ماسەلەلەرى كوركەم تىلدە بەدەرلەنگەن.
جي كومەگىمەن جاڭارعان مۇرا: ەجەلگى پەتروگليفتەر كورمەگە قويىلادى
حاشيم كۋربانوۆ, مارلان نىسانباەۆ, بالتاس وسپان, ليديا دروزدوۆا, ۆيكتور پوليكارپوۆ سىندى تانىمال گرافيكتەر مەن جاس سۋرەتشىلەردىڭ ەڭبەكتەرى ءبىر كەڭىستىكتە توعىسىپ, كورەرمەنگە تۇتاس ءبىر كوركەمدىك پانوراما ۇسىندى.
