ارنايى جابدىقتار مەن ءموبيلدى دياگنوستيكالىق كەشەن قولدانىلىپ, تەمىر جولدار مەن باعىتتامالى بۇرمالاردى تەكسەرۋ ناتيجەسىندە (تەكسەرۋ قازان ايىندا قازاقستاننىڭ بارلىق وڭىرلەرىندە جۇرگىزىلدى) جولاۋشىلار مەن جۇك پويىزدارى جۇرەتىن تەمىر جولداردا قوزعالىس قاۋىپسىزدىگىنە قاۋىپ توندىرەتىن 1 مىڭنان استام قاتەلىك انىقتالدى. تەكسەرۋدىڭ قورىتىندىسىنا سايكەس, شويىن ماگيسترالدى كۇتىپ ۇستاۋعا قاتىستى ولقىلىقتاردى جويۋ تۋرالى نۇسقامالار بەرىلدى.
پويىزدار قوزعالىسىنىڭ قاۋىپسىزدىگىنە قاۋىپ توندىرەتىن ورەسكەل بۇزۋشىلىقتارعا بايلانىستى 127 تەمىر جول مەن 108 باعىتتامالى بۇرمالاردى پايدالانۋ توقتاتىلىپ, 350 جىلدامدىق شەكتەۋلەرى ەنگىزىلدى. سونداي-اق ارنايى جىلجىمالى قۇرامنىڭ 56 بىرلىگىن پايدالانۋ توقتاتىلدى. بۇل ولقىلىقتاردى جويعانعا دەيىن شىعىس قازاقستان, پاۆلودار, قوستاناي جانە قاراعاندى وبلىستارى مەن باسقا دا وڭىرلەردە قوزعالىس شەكتەلىپ, جولاۋشىلار مەن جۇك پويىزدارىنىڭ ءجۇرۋ كەستەسىندە وزگەرىستەر بايقالدى.
بيىلعى ون ايدا تەمىر جول كولىگى سۋبەكتىلەرى قوزعالىس قاۋىپسىزدىگىنە بايلانىستى 826 دەرەك تىركەلىپ, كولىكتىك باقىلاۋ قىزمەتكەرلەرى 53 ملن تەڭگەگە جۋىق قاراجاتقا اكىمشىلىك ماتەريالدار تولتىردى. بىلتىرعى ۇقساس كەزەڭمەن سالىستىرعاندا اتالعان باعىتتا ورەسكەل قاتەلىكتەردىڭ وسكەنى (2019 جىلى 808 بۇزۋشىلىق تىركەلدى) بايقالادى.
