ءىس-شارا Ońtústik TV جانە YouTube-تا Bridge TV ارنالارىندا كورسەتىلدى.
شىمكەنت قالاسىنىڭ اكىمى مۇرات ايتەنوۆ مەرەكەلى جىلدى قورىتىندىلاپ, تمد مادەني استاناسى ەستافەتاسىن دۋشانبە قالاسىنىڭ توراعاسى رۋستامي ەموماليعا تابىستادى.
–شىمكەنت – 2200 جىلدىق تاريحى بار كونە شاھار. وسىناۋ تاريحي قالامىزدىڭ تمد ەلدەرىنىڭ مادەني استاناسى اتانۋى ءبىز ءۇشىن ۇلكەن مارتەبە. سونىمەن بىرگە, يۋنەسكو بيىل قالامىزدىڭ تاريحى كەمىندە 2 200 جىلدان سىر شەرتەتىنىن رەسمي مالىمدەدى. 
وسىنداي تاريحي ساتتەردىڭ قارساڭىندا ەلباسى ميلليون تۇرعىنى بار, شۋاقتى شىمكەنت قالاسىنا رەسپۋبليكالىق ماڭىزى بار قالا مارتەبەسىن بەردى. مەملەكەت باسشىسى ق.توقاەۆ شىمكەنت قالاسىنىڭ الەۋمەتتىك-ەكونوميكالىق دامۋىنا ايرىقشا ءمان بەرىپ وتىر.
ءبىزدىڭ قالامىز عاسىرلار بويى بۇكىل ازيانىڭ ونەرى مەن مادەني مۇراسى توعىسقان ءىرى ورتالىققا اينالدى.
سول زامانداردان بەرى قاراي, شىمكەنت تۇرعىندارىنىڭ بويىندا ەرەكشە قاسيەت قالىپتاستى. بۇل – ىسكەرلىك, قوناقجايلىلىق جانە وزگەرىسكە دەگەن بەيىمدىلىك.
دوستىق ەستافەتاسىن ۇلى جىبەك جولىمەن دۋشانبەگە جولدايمىز, – دەدى قالا اكىمى قۇتتىقتاۋ سوزىندە.
سونداي-اق, ونلاين جيىندا تمد اتقارۋشى كوميتەتىنىڭ توراعاسى – اتقارۋشى حاتشى لەبەدەۆ س.ن., مەملەكەتارالىق گۋمانيتارلىق ىنتىماقتاستىق قورى باسقارما توراعاسى, ءازىربايجان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى پولاد بيۋلبيۋلوگلى قالا تۇرعىندارى مەن قوناقتارىنا ارنايى مەرەكەلىك قۇتتىقتاۋ تىلەگىن جەتكىزدى.
دوستىق ەستافەتاسى تاجىكستان رەسپۋبليكاسىنىڭ الماتى قالاسىنداعى باس كونسۋلى باحودۋر نازير مىرزاعا تابىستالدى. 2200 كىتاپ, 2200 تۇمار جانە 2200 قىزعالداق تۇينەگىمەن تولتىرىلعان سيمۆولدىق كەرۋەن (شىمكەنت قالاسىنىڭ 2200 جىلدىعىنا وراي) جىبەك جولىمەن تاجىكستان رەسپۋبليكاسىنىڭ دۋشانبە قالاسىنا اتتانادى
مادەني استانا جىلىنىڭ جابىلۋى اياسىندا 6 تەاتر, 5 كىتاپحانا, تسيرك, زووباق, ادەت عۇرىپ جانە سالت ءداستۇر ورتالىعى, مادەنيەت ءۇيى جانە باسقا دا مادەنيەت مەكەمەلەرىنىڭ شىعارماشىلىق ۇجىمدارىنىڭ كۇشىمەن 48 سپەكتاكل, 99 ونلاين-ءىس-شارا, 7 جىلجىمالى تەاتر پەرفومانستارى, 5 مۋزىكالىق پەرفومانستار, اقىندار, جازۋشىلار, ادەبي قايراتكەرلەر بەينەسىندەگى بويلى قۋىرشاقتار شەرۋى ۇيىمداستىرىلدى. شىمكەنت قالاسىنىڭ جاس سۋرەتشىلەرىنىڭ كورمەسى مەن عيماراتتاردىڭ قاسبەتتەرىندە 7 مۋرالدىڭ تۇساۋكەسەرى ۇيىمداستىرىلدى.
