قوعام • 21 قاراشا، 2020

مەملەكەتتىك ورگانداردىڭ بيۋدجەت قاراجاتىن تسيفرلاندىرۋعا جۇمساۋ تيىمدىلىگى "Nur Otan" الاڭىندا قارالدى

18 رەت كورسەتىلدى

«Nur Otan» پارتياسى جانىنداعى «مەملەكەتتىك قىزمەت كورسەتۋ» باعىتى بويىنشا كوميسسيانىڭ الاڭىندا مەملەكەتتىك قىزمەت كورسەتۋدىڭ ساپاسى تالقىلاندى، دەپ حابارلايدى Egemen.kz.

نۇروتاندىقتار «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ جەلىسى بويىنشا egov.kz پورتالى جاقسى جۇمىس ىستەپ تۇرعانىن، الايدا كەيدە «ەلەكتروندىق ۇكىمەت» پورتالىندا ورىن الاتىن اقاۋ كوبىنە مەملەكەتتىك ورگانداردىڭ كىناسىنەن بولاتىنىن اتاپ ءوتتى.

كوميسسيا توراعاسى، ءماجىلىس دەپۋتاتى مايرا ايسينانىڭ ايتۋىنشا، وسى جىلى ءتۇرلى مەملەكەتتىك ورگاندارداعى اقپاراتتىق جۇيەلەردىڭ جۇمىسىندا اقاۋلار ورىن العان. بۇل ءوز كەزەگىندە قانداي دا ءبىر انىقتامانى egov.kz. پورتالىنان الۋدى قيىنداتى جىبەرەدى. بۇل جاعدايدا جاۋاپكەرشىلىك مەملەكەتتىك كورپوراتسياعا جۇكتەلمەيدى دەپ ەسەپتەيدى كوميسسيا مۇشەلەرى.

وتىرىسقا قاتىسۋشىلار مەملەكەتتىك ورگانداردىڭ IT-جۇيەلەرىن قۇرۋدى ناقتى كىمگە تاپسىراتىنىنا ەرەكشە نازار اۋداردى. مىسالى، «اقپاراتتاندىرۋ تۋرالى» زاڭعا سايكەس بارلىق مينيسترلىكتەردە اقپاراتتىق ارحيتەكتۋرا بىردەي بولۋى ءتيىس، ال بىرىڭعاي ازىرلەۋشى «ۇلتتىق اقپاراتتىق تەحنولوگيالار» اق بولۋى كەرەك.

«نەگە سىرتقا تاپسىرىس بەرەسىزدەر، ياعني مۇندا جەمقورلىققا مۇمكىندىك اشىلىپ تۇر عوي؟ «ۇات»-عا تاپسىرىس بەرۋلەرىڭىز كەرەك، ولار اقپاراتتىق جۇيە ءۇشىن قانشا قاراجات قاجەت ەكەنىن ايتسىن. ايتپەسە، كىم قانشا قالاسا، سونشا سۇرايدى. مىسالى، اكىمدىكتەردى الاتىن بولساق، بىرەۋلەرىنە 100 ملن، ال ەندى بىرەۋلەرىنە 1 ملرد قاجەت» ،-دەدى مايرا ايسينا.

ورتالىق مەملەكەتتىك ورگاندارداعى اقپاراتتىق جۇيەلەردىڭ جۇمىس ىستەۋىن قامتاماسىز ەتۋ ءۇشىن جۇمسالاتىن قاراجاتتا دا وسىعان ۇقساس جاعداي. بيۋدجەتتەن اقشا جەتكىلىكتى مولشەردە بولىنەدى، بىراق، وكىنىشكە قاراي، اقپاراتتىق جۇيەلەردەگى اقاۋلار ازايماي تۇر.

دەگەنمەن، «مەملەكەتتىك قىزمەت كورسەتۋ» پارتيالىق كوميسسياسىنىڭ وتىرىسىندا تەك ءتۇيىندى ماسەلەلەر عانا تالقىلانعان جوق.

ماسەلەن، تسيفرلىق دامۋ ۆيتسە-ءمينيسترى ابىلايحان وسپانوۆ بيىلعى 10 ايدا حقكو-دا 14،3 ملن، ال egov.kz پلاتفورماسىندا 30 ميلليوننان استام مەملەكەتتىك قىزمەت كورسەتىلگەنىن اتاپ ءوتتى. بۇل حالىقتىڭ تسيفرلىق ساۋاتتىلىعىنىڭ بىرتىندەپ وسكەنىن كورسەتەدى. سونىمەن قاتار، كوروناۆيرۋستىق پاندەميا جانە ونىمەن بايلانىستى كارانتيندىك شەكتەۋ شارالارى ازاماتتاردىڭ مەملەكەتتىك قىزمەتتەردى ونلاين رەجيمدە الۋىنا قوسىمشا ىنتالاندىرۋ بولدى.

«بۇل جەردە تۋىنداعان تاعى ءبىر ماسەلە 1414 بايلانىس ورتالىعىنىڭ جۇمىسىنا قاتىستى بولدى. كارانتينگە بايلانىستى جۇكتەمە بىرنەشە ەسە ءوسىپ، وپەراتورلار جەتىسپەدى. قوڭىراۋلار سانى كۇنىنە 5-تەن 50 مىڭعا دەيىن ءوستى. سوندىقتان ءبىز ازاماتتارعا قىزمەت كورسەتۋ ءۇشىن مەملەكەتتىك كورپوراتسيانىڭ 2 مىڭعا جۋىق قىزمەتكەرىن جەدەل جۇمىلدىردىق»، - دەدى ابىلايحان وسپانوۆ.

وتىرىستى قورىتىندىلاي كەلە، پارتيالىق كوميسسيا مۇشەلەرى قر سىبايلاس جەمقورلىققا قارسى ءىس-قيمىل اگەنتتىگىنە جانە قر مەملەكەتتىك قىزمەت ىستەرى اگەنتتىگىنە الداعى ۋاقىتتا تەحنيكالىق ىركىلىستەرگە جول بەرمەۋ ءۇشىن ءتۇرلى ۆەدومستۆولاردىڭ وزدەرىنىڭ اقپاراتتىق جۇيەلەرىن قۇرۋعا جانە قولداۋعا اقشانى قالاي جۇمسايتىنىن مۇقيات تەكسەرۋدى ۇسىندى.

سوڭعى جاڭالىقتار

الەم كۋبوگى وتەدى

سپورت • كەشە

ۇقساس جاڭالىقتار