ايماقتار • 20 قاراشا، 2020

بالاعا قامقورلىق – باستى نازاردا

33 رەت كورسەتىلدى

بالالاردىڭ قۇقىعىن قورعاۋ، ولارعا قامقور بولۋ جانە قوعامدا بالالار يگىلىگى ءۇشىن قايىرىمدىلىق شارالارىن وتكىزۋ – ۋاقىتتىڭ وزەكتى ماسەلەسى. وسى ورايدا ء«وزىن-ءوزى تانۋ: بالا ءۇشىن ميسسيا» اتتى حالىقارالىق فورۋم ءوتىپ، كۇن تارتىبىندەگى كەلەلى ماسەلەلەردى تالقىعا سالدى. وي-پىكىرلەرىمەن ءبولىستى.

ZOOM پلاتفورماسى ارقىلى وتكەن كونفەرەنتسيا اۋقىمى وتە كەڭ بولدى. ءبىلىم جانە عىلىم مينيسترلىگى، «بوبەك» ۇلتتىق عىلىمي-پراكتيكالىق، ءبىلىم بەرۋ جانە ساۋىقتىرۋ ورتالىعى ماماندارىنان باستاپ مەكتەپكە دەيىنگى جانە ورتا ءبىلىم بەرۋ مەكەمەلەرىنىڭ قىزمەتكەرلەرى، عالىمدار جانە شەتەلدىك سەرىكتەستەر تىكەلەي بايلانىسقا شىقتى.

كونفەرەنتسيا باسىندا «بوبەك» قورىنىڭ نەگىزىن قالاۋشى سارا نازارباەۆانىڭ قۇتتىقتاۋ حاتى مەن ۆيدەودارىسى قاتىسۋشىلار نازارىنا ۇسىنىلدى.

«بۇل جولعى فورۋم تاقىرىبى وتە تەرەڭ. ءبىز ءارتۇرلى ەلدە ءومىر ءسۇرىپ، ءارتۇرلى تىلدە سويلەيمىز، ءتۇرلى ءدىندى ۇستانامىز، بىراق بارىمىزدە بالالاردىڭ جاقسى ءومىر ءسۇرىپ، باقىت پەن قۋانىشقا قول جەتكىزگەنىن قالايمىز. ەگەر ءبىز ءوزىمىز رۋحاني-ادامگەرشىلىك باعىتىندا تەرەڭ ءارى ورتاق تۇسىنىستىكتە بولا الساق، ءوزىمىز بالالارعا ۇلگى بولا الساق، وندا ولاردىڭ ارمانى مىندەتتى تۇردە ورىندالادى. سوندا ءبىزدىڭ ۇرپاقتارىمىز تاتۋلىق پەن ۇيلەسىمدىلىك سالتانات قۇرعان عاجايىپ الەمدە ءومىر سۇرەتىن بولادى» دەلىنگەن سارا نازارباەۆانىڭ قۇتتىقتاۋ حاتىندا.

«بوبەك» ۇعببسو باس ديرەكتورى ەلەنا ساكەنوۆانىڭ ايتۋىنشا، ەرەسەكتەر ءوزىنىڭ ەشقاشان بالانىڭ قامقورشىسى ءھام جول كورسەتۋشىسى ەكەنىن ۇمىتپاۋى ءتيىس. بالاعا دەگەن ماحاببات پەن مەيىرىم ۇنەمى جاڭعىرىپ تۇرۋى كەرەك دەيدى.

– كونفەرەنتسيانىڭ ءدال بۇگىن وتكىزىلۋى دە بەكەر ەمەس. ويتكەنى ءدال وسى، 20 قاراشا كۇنى بۇۇ باس اسسامبلەياسىنىڭ بالا قۇقىعى جونىندەگى دەكلاراتسياسى قابىلدانعان ەدى. بۇل كۇن بارشا الەمدەگى بالالاردىڭ باقىتتى ءومىر كەشۋىن قامتاماسىز ەتۋگە باعىتتالعان ىنتىماقتاستىق پەن بىرلىكتىڭ كۇنى سەكىلدى. ءبىزدىڭ ارقايسىمىز وسى يدەيامەن ءومىر ءسۇرىپ كەلەمىز. بۇل يگىلىكتى جولعا ءبىزدى سارا الپىسقىزى نازارباەۆا باعىتتادى. قازىر «بوبەك» قورى بالالارعا ءبىلىم مەن تاربيە بەرۋ جولىندا زاماناۋي يننوۆاتسيالىق تاسىلدەردى اينالىمعا ەنگىزىپ، كوپكە ۇلگى بولىپ وتىر. بۇل رەتتە بالاعا ءتالىم بەرەتىن پەداگوگتاردىڭ ۇلەسى وراسان. ۇستاز ءوز وقۋشىسىنىڭ بويىندا رۋحاني قۇندىلىقتاردى ءسىڭىرۋ، ازاماتتىق ۇستانىمدى قالىپتاستىرۋ، ادامگەرشىلىك سەنىمدەردى وياتۋ جولىندا ايانباي ەڭبەك ەتەدى. فورۋم قاتىسۋشىلارىمەن ارامىزدى ميلليونداعان شاقىرىم ءبولىپ جاتقانىنا قاراماستان ءبىزدىڭ تۇسىنىگىمىز بەن دوستىعىمىز اركەز بيىك دەڭگەيدە قالا بەرەدى. تاجىريبە الماسۋ پروتسەسى ەشقاشان توقتامايدى، – دەيدى ەلەنا ساكەنوۆا.

ودان سوڭ قوناقتار ءسوز سويلەپ، بالانى زاماناۋي ۇردىستەرگە بەيىمدەۋ، ولاردى زياندى، قاجەتسىز دۇنيەلەردەن قورعاۋ جانە ولاردىڭ قۇقىقتارىن قامتاماسىز ەتۋ ماسەلەسىنە باسا كوڭىل ءبولدى. ەۋروپالىق جالپى ادامدىق قۇندىلىقتار ينستيتۋتىنىڭ (ESSE) ديرەكتورى مارياننا مەيەر، «اتا-انالار قامقورلىعى» حالىقارالىق قوزعالىسىنىڭ ءتورايىمى كلارا مانسۋروۆا، لومونوسوۆ اتىنداعى ممۋ پسيحولوگيا فاكۋلتەتىنىڭ دەكانى ريزا حاليلوۆ، داعىستان مەملەكەتتىك پەداگوگيكالىق ۋنيۆەرسيتەتىنىڭ تۇزەتۋ پەداگوگيكا جانە ارنايى پسيحولوگيا كافەدراسىنىڭ مەڭگەرۋشىسى دجافار ماللاەۆتار جانە تاعى دا باسقا قاتىسۋشىلار ءوز پىكىرلەرىن ورتاعا سالدى.

فورۋم بارىسىندا قاتىسۋشىلارعا سارا نازارباەۆانىڭ العىس حاتتارى تابىس ەتىلەتىنى ايتىلدى.

 

اباي ايماعامبەت،

"Egemen Qazaqstan" 

الماتى

سوڭعى جاڭالىقتار

سقو «قىزىل ايماققا» ەندى

ايماقتار • كەشە

ۇقساس جاڭالىقتار