قازاقستان • 20 قاراشا، 2020

"قازاق تىلىندەگى 100 جاڭا وقۋلىق" جوباسى: 77 وقۋلىق اۋدارىلدى

22 رەت كورسەتىلدى

نۇر-سۇلتان قالاسى اكىمدىگىنىڭ ءباسپاسوز ورتالىعىندا «ۇلتتىق اۋدارما بيۋروسى» قوعامدىق قورىنىڭ اتقارۋشى ديرەكتورى راۋان كەنجەحان ۇلى «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسىنىڭ جۇزەگە اسۋى مەن بۇگىنگى ناتيجەلەرى تۋرالى وي ءبولىستى.

راۋان كەنجەحان ۇلىنىڭ ايتۋىنشا، «رۋحاني جاڭعىرۋ» باعدارلاماسى قولعا الىنعاننان بەرى ءۇش جارىم جىل ىشىندە 77 وقۋلىق اۋدارىلىپ، ەلىمىزدەگى 132 جوو كىتاپحاناسىنا جەتكىزىلدى.

بۇگىنگى تاڭدا 23 وقۋلىق اۋدارىلىپ، باسپاعا دايىندالىپ جاتىر. جوسپار بويىنشا وقۋلىقتار جىل سوڭىنا دەيىن جارىق كورىپ، جوعارعى وقۋ ورىندارىنا تابىستالادى.

وقۋلىقتاردى دايىنداۋعا ەلدەگى بىرقاتار ۋنيۆەريتەتتىڭ وقىتۋشىلارى، عالىمدار مەن رەداكتورلار، اۋدارماشىلار – جالپى سانى 300-گە تارتا مامان قاتىسقان.

«بۇگىندە ءبىلىم بەرۋ مازمۇنى تۇبەگەيلى جاڭاردى. ماسەلەن، فيلوسوفيا، پيسحولوگيا، الەۋمەتتانۋ، ساياساتتانۋ، ءتىل ءبىلىمى سەكىلدى سالالار بويىنشا اۋدارىلعان وقۋلىقتار الەمنىڭ ۇزدىك ۋنيۆەرسيتەتتەرىنىڭ وقۋ باعدارلاماسىنا ەنگەن. دامىعان ەلدەردىڭ وقۋ ورىندارىندا تالقىلاناتىن ماسەلەلەر ءبىزدىڭ اۋديتورياعا دا كەلدى. ءبىر جاعىنان العاندا بۇل جوبا «بولاشاق» باعدارلاماسىنىڭ كەڭ جالعاسى سەكىلدى. ويتكەنى «بولاشاق» باعدارلاماسى اياسىندا ءبىز قابىلەتتى جاستاردى الەمدەگى ەڭ مىقتى دەگەن وقۋ ورىندارىنا جىبەرىپ جۇرسەك، بۇل جوبا سول جەردەگى وقۋ مازۇنىن، يدەيالار مەن كونتسەپتسيالاردى ەلگە الىپ كەلىپ، قازاق تىلىنە اۋدارىپ، بارلىق ستۋدەنتتەرگە قولجەتىمدى ەتۋدى كوزدەيدى»، – دەيدى راۋان كەنجەحان ۇلى.

«ۇلتتىق اۋدارما بيۋروسى» باسشىسىنىڭ سوزىنشە، بۇل جوبا بۇعان دەيىن قازاق تىلىندە مۇلدە بولماعان جاڭا سالالارعا جول اشتى. ماسەلەن، ستاتيستيكا، دەموگرافيا، زەرتتەۋ ادىستەرى، ماركەتينگ، ماكرو جانە ميكروەكونوميكا، ۇيىمدىق مىنەز-ق ۇلىق، ينتەرنەت پسيحولوگياسى سەكىلدى ماڭىزدى سالالارعا قاتىستى جاڭا ءبىلىم بەرۋ قۇرالدارى پايدا بولدى.

سونداي-اق راۋان كەنجەحان ۇلى جۇمىس ناتيجەسىندە وزىندىك جۇمىس ىستەۋ تەحنولوگياسى، ۇستانىمدارى بار اۋدارما مەكتەبى قالىپتاسقانىن اتاپ ءوتتى.

سونىمەن قاتار بيىل مەملەكەت باسشىسىنىڭ تاپسىرماسىمەن اباي قۇنانباي ۇلىنىڭ شىعارمالار جيناعى الەمنىڭ 10 تىلىنە اۋدارىلدى.
راۋان كەنجەحان ۇلىنىڭ ايتۋىنشا، جۇمىس بارىسىندا اباي شىعارمالارى بۇرىن مۇلدە اۋدارىلماعان ەلدەردىڭ تىلىنە اۋدارىلىپ، كوركەم اۋدارما تۇرعىسىنان دا ەرەكشە نازار اۋدارىلعان.

سوڭعى جاڭالىقتار

الەم كۋبوگى وتەدى

سپورت • كەشە

ۇقساس جاڭالىقتار