بۇعان دەيىن رايىمبەك اۋدانىنداعى مەملەكەتتىك قىزمەت كورسەتۋ سەكتورىنىڭ ماماندارى 395 شارشى مەتردى قۇرايتىن جالدامالى نىساندا جۇمىس ىستەگەن ەدى. ەندى ولار قاجەتتى دەڭگەيدە جابدىقتالعان, اۋماعى 1087 شارشى مەتر ءزاۋلىم عيماراتتا قىزمەت كورسەتەتىن بولادى.
«بۇل جەردە قىزمەت الۋشىلار ءۇشىن بارلىق جاعداي جاسالىپ, مۇمكىندىگى شەكتەۋلى جاندار ءۇشىن پاندۋستار مەن شاقىرتۋ تۇيمەلەرى قاراستىرىلعان. حالىقتىڭ يگىلىگى ءۇشىن وسىنداي سۋ جاڭا عيمارات سالۋعا مۇرىندىق بولعان الماتى وبلىسىنىڭ اكىمدىگىنە ريزاشىلىعىمىزدى بىلدىرەمىز», - دەدى «ازاماتتارعا ارنالعان ۇكىمەتتىڭ» الماتى وبلىستىق فيليالىنىڭ ديرەكتورى ەرمەك بەكجۇنىسوۆ.
اشىلۋ سالتاناتىنا قاتىسقان الماتى وبلىسىنىڭ اكىمى اماندىق باتالوۆتىڭ ايتۋىنشا, 40 مىڭنان استام حالقى بار اۋدان ءۇشىن زامانعا ساي جاساقتالعان حالىققا قىزمەت كورسەتۋ ورتالىعىن اشۋ قاجەتتىلىگى بۇرىننان تۋىنداعان.
«2018 جىلى وبلىسىمىزداعى ءبىر اۋدان رايىمبەك جانە كەگەن اۋداندارى بولىپ ەكىگە ءبولىندى. ناتيجەسىندە اۋدان ورتالىعى مارتەبەسىنە يە بولعان نارىنقول جاڭا سەرپىنمەن دامىپ, گۇلدەنىپ كەلەدى. سونىڭ ءبىر كورىنىسى – حالىق يگىلىگىنە ارنالعان وسىنداي جاڭا ورتالىقتىڭ اشىلۋى», - دەدى ول.
جاڭا تەحنيكا جانە جيھازدارمەن جابدىقتالعان ورتالىقتىڭ وپەراتسيالىق زالىندا 12 مامان قىزمەت ەتەدى, ال دايىن قۇجاتتاردى بەرۋ سەكتورىندا 10 جۇمىس ورنى بار. زەينەتكەرلەرگە, كوپبالالى وتباسىلارعا جانە مۇمكىندىگى شەكتەۋلى جاندارعا ارنالعان جەڭىلدىك تەرەزەسى دە ۇيىمداستىرىلعان.
سونداي-اق ءزاۋلىم عيماراتتا مەملەكەتتىك كورپوراتسيانىڭ فرونت-وفيس ماماندارى عانا ەمەس, جىلجىمايتىن م ۇلىكتىڭ تەحنيكالىق سيپاتتاماسى مەن جەر كاداسترىن, زەينەتاقىلار مەن جاردەماقىلاردى ەسەپتەيتىن بەك-وفيس بولىمدەرى دە ورنالاستىرىلعان. ورتالىق اۋلاسىندا قىزمەت الۋشىلارعا ارنالعان اۆتوتۇراق تا بار.
